Лукашэнка апраўдваўся на расійскім ТБ за адвод войскаў ад украінскай мяжы
Аляксандр Лукашэнка даў інтэрв'ю тэлеканалу «Расія». Сярод тэм згадваўся і адвод беларускіх войскаў ад мяжы з Украінай. Частка расійскіх Z-каналаў тады абуралася Лукашэнкам, асабліва калі ўкраінцы зайшлі ў Курскую вобласць. Цяпер у інтэрв'ю Лукашэнка патлумачыў: гэта ён дадатковыя сілы адвёў, але асноўныя, маўляў, засталіся.
18.08.2024 / 12:41
Фота: БелТА
Лукашэнка заявіў, што сітуацыя абвастрылася ў канцы чэрвеня-пачатку ліпеня, калі вялася падрыхтоўка да парада ў Мінску на Дзень незалежнасці. Тады ў Беларусь з Расіі перамясцілася нямала лятальных апаратаў і падраздзяленні сухапутных войскаў, якія ўдзельнічалі ў парадзе.
«Ясна, што яны [ва Украіне] бачылі перасоўванне да нас, амерыканцы ж ім усю інфармацыю даюць. І падумалі, што, як яны сказалі, «Пуцін зноў будзе наступаць з тэрыторыі Беларусі». З-пад Гомеля, як гэта было ў пачатку СВА. І яны да 120 тысяч пачалі перакідваць вайскоўцаў. У адказ я вымушаны быў амаль траціну войска перакінуць дадаткова на ўзмацненне таго, што было», — заявіў Лукашэнка.
Пасля, па яго словах, «па канале камунікацыі, які існуе з украінскімі спецслужбамі», удалося наладзіць сітуацыю і дадатковыя сілы ад мяжы адвялі.
«А тыя падраздзяленні, якія два з паловай года там былі ўведзеныя, яны і тады, і цяпер. І з іх боку, і з нашага боку прысутнічаюць. Гэта смерці падобна, каб мы свае войскі з мяжы з Украінай прыбралі. Вайна ідзе», — апраўдваўся Лукашэнка.
Палітык дадаў, што яны цяпер вымушаны рэагаваць і на беспілотнікі, якія залятаюць з тэрыторыі Украіны (трэба адзначыць, што маніторынгавая група «Гаюн» фіксавала толькі залёты шахедаў, што было раней, а ўкраінскіх беспілотнікаў не назірала; афіцыйна ж паведамлялася пра 13 беспілотнікаў, што заляцелі з Украіны 9 жніўня).
«У тым ліку разгарнуўшы Узброеныя Сілы і зноў тыя ж войскі, якія мы адвялі. Лічыце, траціну арміі мы ўвялі [на тэрыторыі паблізу паўднёвай мяжы]. І нават на Захадзе мы правялі мабілізацыю і перакінулі на поўдзень, на палігон рыхтаваць нашы часткі. Гэта было планавае мерапрыемства. Там таксама некалькі тысяч хлопцаў рыхтуюцца — заходняга, паўночна-заходняга напрамку. Адтуль мы перакінулі».
Лукашэнка таксама зрабіў некалькі рэверансаў у бок Пуціна. Ён заявіў, што расійскія войскі «знясуць украінскіх вайскоўцаў» у Курскай вобласці.
Вайну Лукашэнка ахарактарызаваў, як «барацьбу з сапраўднай імперыяй (Расіяй. — НН), якая дакладна яшчэ не пачала па-сапраўднаму ваяваць».
І заявіў, што ўкраінцы бягуць ад службы ў войску праз Беларусь.
«Сёння ў Польшчы і іншых краінах, сяброўскіх да Украіны, пачалі ўсіх адлоўліваць — і на фронт. Яны куды пабеглі? У Расію ж не могуць — пабеглі б у Расію, але там фронт. Яны да нас пачалі бегчы. Бягуць да нас, праз нас вялікімі патокамі».