KNDR nazvała napadzieńnie USU na Kurskuju vobłaść aktam ahresii i teroru
18 žniŭnia MZS KNDR apublikavała zajavu dla presy, pryśviečanaje ŭvarvańniu USU ŭ Kurskuju vobłaść. KNDR nazvała heta aktam teroru, za jakim stajać «ZŠA i ich satelity», jakija «doraha zapłaciać za svajo biasčynstvy».
18.08.2024 / 16:05
U limuzinie Aurus, padoranym Pucinym Kim Čen Ynu. Fota: Gavriil Grigorov, Sputnik, Kremlin Photo via AP
MZS KNDR piša, što Ukraina ździejśniła «ŭzbrojeny napad na śviatuju terytoryju Rasii».
«MZS KNDR stroha asudžaje ŭzbrojeny napad maryjanietačnych uład Zialenskaha na terytoryju Rasii, jaki ździajśniajecca pa ŭkazcy i pad padtrymkaj ZŠA i Zachadu, jak niedapuščalnuju ahresiju i terakt, jakija hruba parušajuć terytaryjalnuju cełasnaść i biaśpieku suvierennaj dziaržavy i zabivajuć mir», — havorycca ŭ zajavie.
Adkaznaść za situacyju KNDR pierakładaje na ZŠA.
«ZŠA — hałoŭny vinavaty ŭ situacyi va Ukrainie, aktyŭna paturajučy złačynstvam uzbrojenych band USU, jakija zabivajuć ni ŭ čym nie vinavatych žycharoŭ i razburajuć mirnyja pasieliščy Rasii», — havorycca ŭ zajavie.
«My ŭpeŭnienyja, što vojska i narod Rasii naniasuć biaźlitasny ŭdar uzbrojenym ahresaram i dasiahnuć svajoj mety ŭ Kursku — hieraičnaj ziamli, dzie 80 ź lišnim hadoŭ nazad razhramili vialikaje vojska hitleraŭskich fašystaŭ i adkryli pierałomnuju fazu vajny», — piša MZS.
Paŭnočnakarejskija dypłamaty zapeŭnivajuć, što buduć zaŭsiody na baku Rasii.
«KNDR budzie zaŭsiody stajać razam z RF, jakaja doblesna padniałasia na baraćbu za ažyćciaŭleńnie mižnarodnaj spraviadlivaści, niaźmienna i mahutna padtrymlivać śviatuju vajnu rasijskaj armii i naroda za abaronu suvierenitetu i intaresaŭ biaśpieki dziaržavy», — paviedamlaje MZS KNDR.
«Jeŭropa adpačyvaje». Ryžankoŭ pra ŭražańni ad vizitu ŭ KNDR
Biełaruś budzie supracoŭničać z KNDR u śfiery adukacyi