Hałoŭny transpłantołah krainy paskardziŭsia na biełarusaŭ — žyvyja nie chočuć addavać svaje orhany
Dyrektar Minskaha navukova-praktyčnaha centra chirurhii, transpłantałohii i hiematałohii Aleh Rumo raskazaŭ vydańniu «Minsk-Naviny», jak farmirujecca list čakańnia na transpłantałohiju ŭ krainie, čym biełarusy adroźnivajucca ad uschodnich narodaŭ i čamu nie ŭsim zamiežnikam pierasadku orhanaŭ u Biełarusi zrobiać.
18.08.2024 / 17:10
Aleh Rumo paskardziŭsia vydańniu, što biełarusy nie chočuć addavać svaje orhany na transpłantacyju.
— U Biełarusi, jak i ŭ jeŭrapiejskich krainach, u ZŠA, u asnoŭnym pierasadžvajuć orhany pamierłych ludziej. Takaja śpiecyfika nacyjanalnych zakanadaŭstvaŭ, asablivaść ładu žyćcia, razumieńnia prablemy.
Uschodni śviet inšy. Tam asnoŭnaja masa apieracyj pa transpłantacyi orhanaŭ vykonvajecca ad žyvych donaraŭ (rodnasnyja, niarodnasnyja pierasadki). Heta abumoŭlena šeraham pryčyn. Pa-pieršaje, na Uschodzie siemji vialikija. U nas, u ZŠA, u Jeŭropie nie tak. Akramia taho, u žycharoŭ uschodnich krain inšy mientalitet. U ich dzieci, naprykład, matyvavanyja ratavać žyćcio svaich baćkoŭ — addavać im svaju nyrku abo frahmient piečani. U nas, naadvarot, matyvavany baćki, a jany nie zaŭsiody zdarovyja i nie mohuć być donarami.
U toj ža čas u maim žyćci było šmat vypadkaŭ, kali darosłyja dzieci ŭ jakaści donaraŭ padychodzili svaim baćkam (im patrabavałasia pierasadka), ale tata (mama) ni pry jakich abstavinach nie išli na hety krok. Naadrez admaŭlalisia. Takija našy psichałohija i mientalnaść, — havoryć jon.
Tamu rodnasnyja transpłantacyi darosłym, kaža Rumo, biełaruskija transpłantołahi vykonvajuć u asnoŭnym za miažoj, kudy ich zaprašajuć, — u Armienii, Kazachstanie, Uźbiekistanie.
Rumo ličyć, što takaja situacyja «paradaksalnaja».
«Svaju luboŭ da rodnych treba vyjaŭlać nie tolki słovami, ale i ŭčynkami», — kaža jon.
Rumo raspavioŭ, što čarha na transpłantacyju ŭ Biełarusi na piečań «nie praźmierna vialikaja».
«U siarednim na praciahu troch-čatyroch miesiacaŭ hramadzianinu Biełarusi abaviazkova vykanajuć pierasadku piečani. Razmova idzie ab płanavych apieracyjach. Ekstrannyja robim adrazu, jak tolki źjaŭlajecca donar», — kaža jon.
Pierasadku donarskaj nyrki, pavodle Rumo, treba čakać mienš za 200 dzion.
Hramadzianam Biełarusi apieracyi pa pierasadcy orhanaŭ i tkanak robiać biaspłatna. «Sabiekošt apieracyi pa transpłantacyi nyrki — 8 000-15 000 rubloŭ, piečani — 20 000-30 000 rubloŭ plus nastupnaje zabieśpiačeńnie pacyjentaŭ preparatami, jakija pieraškadžajuć adryńvańniu donarskaha orhana».
Dla zamiežnika apieracyja pa transpłantacyi piečani kaštuje 132 000 dołaraŭ, nyrki — 67 000 dołaraŭ.
«Ceny adpaviadajuć jeŭrapiejskim. Biełaruś — jeŭrapiejskaja kraina. I jakaść u nas jeŭrapiejskaja. Pry hetym ludzi płaciać za apieracyju. Nie za orhan, jaho dajuć biaspłatna, a za pracu śpiecyjalistaŭ», — kaža Rumo.
Na apieracyju prymajuć nie ŭsich zamiežnikaŭ, u asnoŭnym z bałkanskich krain: Bośnii i Hiercahaviny, Sierbii, Čarnahoryi. Akramia taho, z Centralnaj Azii i Zakaŭkaźzia.
«U jeŭrapiejskich krainach jość usie mahčymaści dla vykanańnia hetych apieracyj u siabie.
Tamu my pryncypova dajom admovu žycharam Zachodniaj Jeŭropy, ZŠA. Heta naša dakładnaje praviła, jakoha niaŭchilna prytrymlivajemsia. Raniej dapamahali hramadzianam Ukrainy, zaraz, pa abjektyŭnych pryčynach, ich adzinki.
Nievialikaja kolkaść pacyjentaŭ ź Izraila. Hramadzianie hetaj krainy pryjazdžajuć na pierasadku piečani», — kaža Rumo.