U centry Miłana biełarusku abrabavali z dapamohaj adkrutki
Incydent adbyŭsia ŭ paniadziełak 12 žniŭnia ŭ 23.30 na płoščy Duka d'Aosta pierad Centralnym čyhunačnym vakzałam.
19.08.2024 / 08:24
Fota: italjanskaja palicyja
Pahražajučy našaj suajčyńnicy instrumientam, 27-hadovaja ŭradženka Nieapala, jakaja pryjechała ŭ Miłan, zapatrabavała jaje mabilny. U biełaruski nie było inšaha vybaru, jak addać svoj smartfon. Rabaŭnica źnikła, piša «Biełaruś i śviet».
Paciarpiełaja źviarnułasia pa dapamohu da pravaachoŭnikaŭ. Vartavyja paradku nieadkładna adreahavali. Im udałosia zatrymać pravaparušalnicu, raniej sudzimuju, i dastavić jaje ŭ haradski rajon San-Vitorya, dzie znachodziacca miascovaje adździaleńnie palicyi i turma. Našaj suajčyńnicy, niahledziačy na pieražyty strach, dapamoha miedykaŭ nie spatrebiłasia.
Cikava, što litaralna napiaredadni, u noč na niadzielu 11 žniŭnia, taja ž samaja žančyna paŭdzielničała ŭ ździajśnieńni inšaha złačynstva ŭ rajonie kałanady San-Łarenca — centry načnoha žyćcia Miłana. Kala 01.00 jana adciahnuła ŭvahu rumynki svaich hadoŭ, jakaja baviła viečar ź siabrami, a tym časam saŭdzielnik — 19-hadovy ałžyrac — ściahnuŭ u toj sumačku.
Usio adbyłosia ŭ ličanyja siekundy, ale paciarpiełaja zaŭvažyła toje, i jaje siabar kinuŭsia ŭ pahoniu za złodziejami. Tyja paśpieli dabracca da płoščy Pjaca, i tam maładomu čałavieku ŭdałosia spynić ich z dapamohaj patrulnych. Paśla aryštu i ździajśnieńnia ŭsich pracesualnych dziejańniaŭ žančynu adpuścili. I voś — novaje zatrymańnie.