25 hod tamu ŭ Minsku adkryli Maskoŭski aŭtavakzał — zhadvajem jaho los FOTY
Roŭna 25 hod tamu, u žniŭni 1999 hoda, u stalicy adkryli aŭtavakzał «Maskoŭski». Jon praisnavaŭ amal 15 hod i byŭ całkam źniesieny ŭ 2014-m. Zhadvajem, jakim jon byŭ i jak vyhladaje «hazpramaŭskaja» budoŭla na jaho miescy ciapier.
19.08.2024 / 16:12
Vakzał na Filimonava, 63 pačali prajektavać jašče ŭ saviecki čas — u 80-ja. Budaŭnictva, raspačataje ŭ 1990-m, zaciahnułasia amal na dziesiać hadoŭ praz prablemy ź finansavańniem — na fonie ekanamičnych prablem u suviazi z raspadam SSSR. Tak što adkryli vakzał tolki ŭ 1999-m.
«Najlepšy ŭ krainach SND, a, moža, i Jeŭropy», — tak pisali pra aŭtavakzał u hazietach paśla adkryćcia. Fota:vk.com/avtovokzalmoskovskiy
Dla taho času heta ličyłasia architekturnym praryvam, što paćviardžajecca šmatlikimi premijami i naminacyjami, jakimi ŭhanaravali stvaralnikaŭ prajekta.
Aŭtavakzał u nulavyja. Fota: vk.com/avtovokzalmoskovskiy
Aŭtarskaja hrupa instytuta «Minskprajekt» — Mikałaj Navumaŭ, Leanid Vaŭčecki, Juryj Rušaŭ — atrymała za svaju pracu dziaržaŭnuju premiju. I heta była daloka nie adzinaja ŭznaharoda. Hran-pry na VII Respublikanskim ahladzie-konkursie najlepšych architekturnych tvoraŭ hoda ad Biełaruskaha sajuza architektaraŭ, premija Ministerstva architektury i budaŭnictva Biełarusi imia U. Karala ŭ naminacyi «Architektura i budaŭničaje mastactva»… Adznačali vakzał i na mižnarodnym uzroŭni.
Asnoŭnuju zału vakzała ŭpryhožyli sieryjaj dekaratyŭnych pano mastaka Viktara Chackieviča, a jašče skulpturaj Uładzimira Papsujeva. Fota: @lianina_minsk
Fota: «Anłajnier»
Fota: «Anłajnier»
Fota: «Anłajnier»
Mienavita tamu, kali ŭ 2012-m zajšła razmova pra mahčymy znos vakzała i pieradaču terytoryi «Hazpramu» pad zabudovu sa 189-miatrovym šmatpaviarchovikam u centry, architekturnaja supolnaść aburałasia i vystupała suprać. Jak i pasažyry, jakija vakzałam aktyŭna karystalisia dla pajezdak na leciščy, u aeraport ci za miažu.
Fota: vk.com/avtovokzalmoskovskiy
Ale haradskija ŭłady pryvodzili svaje arhumienty. Tak, tahačasny staršynia Minharvykankama Mikałaj Ładućka nazvaŭ jaho architekturna «małaznačnym». Ale asnoŭnaj nahodaj dla znosu stała «małaja zapatrabavanaść». U «Minsktransie» tady dali spravazdaču, što «Maskoŭski» absłuhoŭvaje tolki 24% pasažyrapatoku, i pry hetym sam abjekt niaprosty ŭ ekspłuatacyi.
Fota: vk.com/avtovokzalmoskovskiy
U vyniku ŭ 2014 hodzie pačalisia pracy pa znosie, a taksama padrychtoŭčy praces dla ŭźviadzieńnia tam ofisa «Hazprama» i novaj darožnaj raźviazki Niezaležnaści — Filimonava. Praŭda, z płanami ŭsio pajšło zusim nie hładka — budaŭnictva niekalki razoŭ prypyniali i kansiervavali praz prablemy z hruntam i prajektnaj dakumientacyjaj, a taksama praz roznahałośsie pamiž zamoŭcam i hienieralnym padradčykam.
Pieršapačatkova kompleks płanavali zdać u 2020-m. Hetaha, jak viadoma, nie adbyłosia. Praces budaŭnictva trapiŭ pad krytyku Łukašenki. «My što, dalej budziem ciarpieć hety hazpramaŭski płot u centry Minska? Jany ž prasili: dajcie nam kavałak ziamli, my chočam pabudavać pryhožy budynak. Dzie hety budynak?» — zadavaŭsia jon pytańniem u 2021-m.
Tady, za siem hod «budaŭnictva», tam byŭ faktyčna skončany tolki fundamient, italjanski zabudoŭščyk sa skandałam pajšoŭ z abjekta, «Hazpram transhaz Biełaruś» prasiŭ Łukašenku praciahnuć terminy budaŭnictva.
U pačatku 2024-ha budaŭnictva na abjekcie znoŭ adnaviłasia ŭ aktyŭnym režymie. Na siońnia tam usio tak ža viaducca pracy nad budučym šmatpaviarchovikam, jaki abiacaje stać samym vysokim u stalicy. Pa apošnim dedłajnie abjekt spadziajucca zdać u 2027 hodzie.
Praca na miescy źniesienaha vakzała letam-2024. Fota: minsknews.by
Na budplacoŭcy «Hazpram-centra» ŭ Minsku pačalisia mantažnyja raboty
Nakolki za hod padaraželi arendnyja kvatery ŭ Minsku i dzie samyja papularnyja łakacyi