«Заблакавана больш за 4000 аўтамабіляў». Што беларусы робяць з машынамі, якія захраслі ў Клайпедзе
Прайшло ўжо больш за два месяцы, як беларусы не могуць забраць з порта ў Клайпедзе аўтамабілі, набытыя ў ЗША, Канадзе і Карэі. Паглядзелі, што робяць людзі і якія ёсць альтэрнатывы.
20.08.2024 / 13:24
Ілюстрацыйны здымак. Фота: «Наша Ніва»
Намагаюцца дагрукацца да прэзідэнта Літвы
Калі верыць тэксту петыцыі, якую беларусы дадалі на сайце openpetition.eu, у літоўскім порце Клайпеда знаходзіцца больш за 4000 аўто з ЗША, Канады і Карэі, якія беларусы не могуць вывезці з Літвы праз санкцыі і дадатковыя патрабаванні ад мытні.
Петыцыя адрасавана прэзідэнту Літвы, міністру фінансаў і кіраўніку літоўскага мытнага дэпартамента.
Аўтары петыцыі просяць даць калідор для экспарту аўтамабіляў, набытых грамадзянамі Беларусі ў ЗША, Еўропе і Карэі яшчэ да таго, як стала вядома пра новыя патрабаванні.
Фота: скрыншот з сайта openpetition.eu
Па стане на 19 жніўня пад петыцыяй падпісалася 1066 чалавек.
Пра тое, што такіх машын можа быць сапраўды шмат, таксама сведчыць колькасць удзельнікаў спецыяльнага чата ў тэлеграме. У ім налічваецца 2658 удзельнікаў.
Якія ёсць альтэрнатывы?
У тых, чые аўтамабілі захраслі ў Літве праз новыя патрабаванні і абмежаванні, ёсць некалькі варыянтаў, як выйсці з сітуацыі.
Аўтамабіль можна даставіць у Беларусь альтэрнатыўным шляхам праз Грузію. Перавозчыкі прапануюць дастаўку морам у кантэйнеры або адразу аўтавозам. Першы варыянт больш працяглы па часе, але крыху таннейшы.
За дастаўку аўто з Клайпеды ў Мінск праз Грузію морам просяць 4500-6000 даляраў у залежнасці ад кампаніі перавозчыка і памеру аўто.
За дастаўку з Клайпеды ў Мінск праз Грузію аўтавозам бяруць 6000-7000 даляраў у залежнасці ад кампаніі і памеру аўто.
Дастаўка такім чынам такога буйнагабарытнага транспарту, як пікапы, каштуе каля 9-11 тысяч даляраў.
Ілюстрацыйны здымак. Фота: «Наша Ніва»
Іншы варыянт — паспрабаваць прадаць аўтамабіль, пакуль ён знаходзіцца ў порце. Для гэтага ў месенджарах таксама створаныя адмысловыя чаты.
Яшчэ адзін варыянт — знайсці чалавека з грамадзянствам або ДНЖ у адной з краін ЕС і размытніць аўтамабіль на яго. А гэта 10% мыта, плюс 21% ПДВ. Але нават пасля выпуску ў вольны абарот на тэрыторыі ЕС такую машыну ўсё адно давядзецца прадаваць у Еўропе, бо яе экспарт у Беларусь у любым выпадку забаронены. Таму і гэты варыянт наўрад ці карыстаецца вялікім попытам.
Чакаюць ля мора пагоды
У адным з апытанняў у чаце больш за палова рэспандэнтаў, чые аўто захраслі ў Літве, адказвалі, што працягваюць спадзявацца на цуд. І пакуль яны ледзь не ў прамым сэнсе чакаюць ля мора пагоды, кожны дзень капае ад 5 да 20 еўра за захоўванне аўто на тэрыторыі порта.
Фота: скрыншот з тэлеграм-чата ZapretNaVivoz2024
Яшчэ ў 35% апытаных аўтамабілі знаходзяцца ў стадыі чакання адпраўкі альтэрнатыўным шляхам.
Толькі ў 13% з удзельнікаў апытання машыны ўжо адправіліся з Клайпеды ў Мінск альтэрнатыўным шляхам.
Якія аўто едуць наўпрост з Літвы ў Беларусь?
Аўтамабілі з аб'ёмам рухавіка меншым за 1,9 літра, а таксама машыны з рухавікамі большага аб'ёму, калі ім споўнілася 5 гадоў, працягваюць купляць і накіроўваць у порт Клайпеды.
Фота: скрыншот з сайта carsusa.by
Аўто з аб'ёмам рухавіка, большым за 1,9 літра, і маладзейшыя за 5 гадоў, а таксама гібрыды і электрамабілі адразу накіроўваюць са Штатаў у Грузію.
Праз гэта іх дастаўка стала даражэйшай прыблізна на 1500— 2000 даляраў у параўнанні з дастаўкай праз Клайпеду. Разам з тым павялічваецца і тэрмін дастаўкі. Праз Грузію машыны едуць на 1-1,5 месяца даўжэй, чым гэта было праз Літву.
Падсанкцыйныя люксавыя аўто ўрастаюць у зямлю ў латвійскай вёсцы на мяжы з Беларуссю. Сярод іх ёсць нават «Майбах»
Гады ідуць, а цэны растуць. Як у Беларусі падаражэлі народныя аўтамабілі
Грузаперавозчыкі і камерсанты б'юць трывогу — даводзіцца перасаджвацца з «Мерседэсаў» на ГАЗэлі