JESPČ admoviŭ Andreju Hniotu ŭ abaronie ad ekstradycyi napiaredadni razhladu jaho skarhi ŭ Białhradzie
Heta adbyłosia za niekalki dzion da razhladu jaho skarhi na rašeńnie ab ekstradycyi.
20.08.2024 / 08:48
Biełaruski režysior Andrej Hniot paviedamiŭ, što Jeŭrapiejski sud pa pravach čałavieka (JESPČ) treci raz admoviŭ jamu ŭ abaronie ad ekstradycyi. Heta adbyłosia za niekalki dzion da razhladu jaho skarhi na rašeńnie ab ekstradycyi ŭ Biełaruś u apielacyjnym sudzie Białhrada, piša Reform.news.
«Heta značyć, što ciapier u mianie ŭsio jašče niama nijakaj mižnarodnaj padtrymki pierad abliččam Apielacyjnaha suda 27-ha žniŭnia ŭ Białhradzie. JESPČ ličyć moj zapyt zaŭčasnym. Jon moža źmianić svajo rašeńnie …paśla sierbskaha suda, jaki budzie apošnim i kančatkovym», — napisaŭ Hniot u fejsbuku.
Jon adznačyŭ, što ciapier jamu treba «padklučać jašče bolš jurydyčnych resursaŭ unutry Sierbii».
«Jany pracujuć tolki pa pieradapłacie. Zaŭtra — užo pozna. Siońnia — u samy raz», — napisaŭ jon. U fejsbuku ž jon pakazaŭ svaje rekvizity, pa jakich usie žadajučyja mohuć akazać jamu finansavuju padtrymku.
Jak paviedamlałasia, sierbski sud pastanaviŭ ekstradziravać režysiora Andreja Hniota ŭ Biełaruś. Biełarus sprabuje damahčysia admieny hetaha rašeńnia.