Pamior samy stary čałaviek na płaniecie
Maryja Brańjas Marera, jakaja źjaŭlałasia z 2022 hoda najstarejšym žyvym čałaviekam na Ziamli, pamierła va ŭzroście 117 hadoŭ, pra heta paviedamiła jaje siamja na staroncy ŭ sacsietcy X.
20.08.2024 / 13:52
Wikimedia Commons
Maryja Brańjas Marera naradziłasia ŭ San-Francyska 4 sakavika 1907 hoda, jana była dačkoj žurnalista z Pampłony i maci-katałonki. U dziacinstvie jana pierajechała ź siamjoj u Novy Arlean, dzie jaje baćka zasnavaŭ časopis Mercurio i paśpiachova vydavaŭ jaho dla ispanamoŭnych amierykancaŭ.
U 1915 hodzie siamja pryniała rašeńnie viarnucca ŭ Ispaniju, adnak baćka pamior ad suchotaŭ prosta na karabli. Hulajučy sa svaimi bratami, Brańjas zvaliłasia ź vierchniaj pałuby na nižniuju, straciŭšy słych na adno vucha.
Maci z dačkoj pasialiłasia ŭ Katałonii, dzie Maryja ŭ 1931 hodzie vyjšła zamuž za doktara Žaana Mareta. Padčas Hramadzianskaj vajny ŭ Ispanii jana pracavała pobač ź im u jakaści miedsiastry ŭ palavym špitali ŭ Truchiljo.
U ich było troje dziaciej, adzinaccać unukaŭ i trynaccać praŭnukaŭ. U 1990-ja hady Maryja Brańjas padarožničała pa Jehipcie, Italii, Niderłandach i Anhlii, zajmałasia šyćciom, muzykaj i čytańniem. Z 2000 hoda žyła ŭ domie sastarełych u Ołacie.
U 2019 hodzie Maryja adkazała na pytańnie ab tym, jak jana ŭsprymaje techničnyja, sacyjalnyja i hramadskija źmieny za doŭhija hady svajho žyćcia: adbylisia tatalnyja źmieny, u tym liku i prahresiŭnyja. Usio prajšło doŭhi šlach, asabliva toje, jak ludzi majuć kantaktavać dzin z adnym. Ciapier heta lohka, a raniej było ciažka».
U krasaviku 2020 hoda ŭ doŭhažycharki vyjavili lohkuju formu kavidu: u jaje raźviłasia infiekcyja močavyvodnych šlachoŭ, i jana adčuła niedamahańnie, ale nie vyjaŭlała zvyčajnych simptomaŭ, takich jak lichamanka i dychavica. Jana była źmieščana ŭ karancin u svaim pakoi i pieraadoleła chvarobu biez špitalizacyi.