Bajden uchvaliŭ sakretnuju stratehiju dla padrychtoŭki da imaviernaha jadziernaha supraćstajańnia z Rasijaj, Kitajem i Paŭnočnaj Karejaj
Na hetaje rašeńnie prezidenta ZŠA Džo Bajdena paŭpłyvali adrazu niekalki tryvožnych tendencyj u śviecie, daviedałasia vydańnie The New York Times.
21.08.2024 / 09:44
Džo Bajden. Fota: Evan Vucci / AP
Pavodle zaćvierdžanaj Bajdenam novaj sakretnaj jadziernaj stratehii, ZŠA pavinny rychtavacca da mahčymaha skaardynavanaha jadziernaha supraćstajańnia z Rasijaj, Kitajem i Paŭnočnaj Karejaj. U minułym taki scenar padavaŭsia nierealnym, piša vydańnie The New York Times.
Vydańnie adznačaje, što amierykanskaja stratehija jadziernaha strymlivańnia, jakaja abnaŭlajecca kožnyja čatyry hady, nastolki mocna zasakrečanaja, što niama anijakich elektronnych kopij, tolki nievialikaja kolkaść drukavanych kopij, jakija razdajucca niekalkim vysokapastaŭlenym čynoŭnikam i aficeram Pientahona, adkaznym za nacyjanalnuju biaśpieku krainy.
Ale dvum ludziam, jakija aznajomilisia z dakumientam, było aficyjna dazvolena davać ścipłyja kamientary ŚMI nakont źmiestu novaj stratehii, pakul jaje peŭnuju častku ŭ budučyni nie ahučyć publicy sam Bajden pierad tym, jak pakinie pasadu prezidenta.
Dziakujučy kamientaram dvuch čynoŭnikaŭ stała viadoma, što imaviernaść prymianieńnia jadziernaj zbroi Kramlom va Ukrainie ŭ kastryčniku 2022 hoda adnamamientna i rezka ŭzrasła na 50% i vyšej, što zapatrabavała ad ZŠA surjoznych dypłamatyčnych namahańniaŭ pa deeskałacyi situacyi.
U novaj jadziernaj stratehii ZŠA ciapier prapisana, što «Rasija radykalizavanaja», a ideja prymianieńnia jadziernaj zbroi ŭ zvyčajnych kanfliktach stała całkam realnaj, paviedamlaje The New York Times.
Druhaja tryvožnaja tendencyja — chutkarosły jadzierny arsienał Paŭnočnaj Karei. Pa infarmacyi amierykanskaj vyviedki, ciapier u KNDR jość zvyš 60 jadziernych bojehałovak, što ŭdvaja bolš, čym było pry Trampie, jaki abiacaŭ pazbavić Kim Čen Yna jadziernaj zbroi šlacham asabistych pieramovaŭ pamiž imi.
«Hetaje pašyreńnie arsienału źmianiła charaktar paŭnočnakarejskaha vykliku: kali kraina vałodała tolki žmieńkaj zbroi, jaje možna było strymać z dapamohaj zvyčajnaj supraćrakietnaj abarony. Ale siońnia jadzierny arsienał KNDR chutka nabližajecca da pamieru takoha ŭ Pakistana i Izraila, i jon dosyć vialiki, kab kantralavać usie ryzyki», — padzialilisia amierykanskija čynoŭniki.
Treciaj niebiaśpiečnaj tendencyjaj stała niazhodlivaść Kitaja i vielmi imklivy rost jaho jadziernaha arsienału.
Tak, novaja sakretnaja stratehija ZŠA prahnazuje, što da 2030 hoda Kitaj zajmieje da 1000 jadziernych bojezaradaŭ, a da 2035 hoda — užo 1500. Heta prykładna stolki ž, kolki ciapier majuć ZŠA i Rasija.
«Ale na samaj spravie, Piekin navat apiaredžvaje našy raźliki», — kažuć čynoŭniki.
Pa ich słovach, Kitaj na fonie rostu svajho jadziernaha arsienału ŭsio bolš adychodzić ad pieramovaŭ z ZŠA nakont mahčymych ryzyk jaho prymianieńnia. Z apošniaha, kitajcy niadaŭna skasavali damoŭlenaść, pavodle jakoj jany papiaredžvali amierykancaŭ pra svaje budučyja rakietnyja vyprabavańni i karystalisia haračymi linijami suviazi, kab incydenty abo avaryi nie pierarastali pamiž imi ŭ jadziernyja sutyknieńni, piša The New York Times.
Asnoŭnym faktaram ryzyki ŭ novaj stratehii nazvana kaapieracyja pamiž Kitajem, Rasijaj i KNDR z namiokam na ich budučy imavierny vajskovy aljans. Hetaje partniorstva ŭžo aktyŭna budujecca i karennym čynam upłyvaje na Vašynhton, skazana ŭ dakumiencie.
Razam z USU na terytoryju Rasii ŭvajšła amierykanskaja vajskovaja hrupa FOG. Što za jana?