Na sustrečy z «Maci Biesłana» Pucin istotna źniziŭ kolkaść zahinułych dziaciej
A taksama abvinavaciŭ u dapamozie terarystam, jakija zachapili škołu, niejkija zamiežnyja siły.
21.08.2024 / 06:58
Uładzimir Pucin. Skryn videa
Uładzimir Pucin na sustrečy z pradstaŭnicami hramadskaj arhanizacyi «Maci Biesłana» istotna źniziŭ kolkaść zahinułych pry terakcie dziaciej, piša Rasijskaja słužba Radyjo Svaboda.
«My sustrakajemsia napiaredadni vialikaj trahiedyi, jakaja zabrała žyćci 334 čałaviek, u tym liku 136 dziaciej», — skazaŭ prezident Rasii, adkryvajučy sustreču. Na samaj spravie padčas teraktu ŭ biesłanskaj škole zahinuli 186 dziaciej.
Taksama padčas sustrečy i z «Maci Biesłana» Pucin abvinavaciŭ u dapamozie terarystam, jakija zachapili škołu, niejkija zamiežnyja siły.
«My viedajem, što z-za miažy sprabavali nie tolki apraŭdać, ale i akazvali terarystam dapamohu, u tym liku maralnuju», — zajaviŭ rasijski prezident, dadaŭšy, što tyja ž «vorahi praciahvajuć sprabavać razhajdać našu krainu, robiać złačynstvy ŭ Kurskaj vobłaści, Danbasie i Navarosii». U kancy Pucin paabiacaŭ damahčysia «metaŭ u baraćbie ź nieanacyzmam — hetak ža, jak damahlisia ŭ baraćbie z teraryzmam».
Šerah ŚMI adznačyli, što na raspaŭsiudžvanym fiederalnymi telekanałami videa z sustrečy kaža tolki prezident Rasii, reakcyja na jahonuju pramovu «maci Biesłana» zastałasia za kadram.
***
1 vieraśnia 2004 hoda ŭ budynku škoły №1 u Biesłanie byli zachoplenyja bolš za 1100 zakładnikaŭ, bolšaja častka ź jakich byli dziećmi. Napadniki patrabavali vyvadu rasijskich vojskaŭ z Čačni. 3 vieraśnia śpiecnaz i vajskoŭcy pačali šturm škoły, padčas jakoha zahinuli 334 čałavieki, u tym liku 186 dziaciej, zvyš 800 čałaviek paciarpieli. Napad staŭ najbujniejšym u historyi Rasii pa kolkaści achviar i zastajecca takim pa hety dzień.
Svajaki zahinułych, u tym liku arhanizacyja «Maci Biesłana», dahetul praciahvajuć damahacca ad uładaŭ Rasii praviadzieńnia rasśledavańnia. Aficyjnaja viersija mała kaho zadavalniaje, bo razychodzicca sa šmatlikimi śviedčańniami tych, chto vyžyŭ, i vidavočcaŭ, a taksama z vysnovami niezaležnych ekśpiertaŭ i śledčych.
Śledčyja, siarod jakich zabitaja paźniej žurnalistka «Novaj haziety» Hanna Palitkoŭskaja i jaje kaleha Alena Miałašyna, siarod inšaha ŭstanavili, što za sutki da teraktu ŭłady atrymali ahienturnyja źviestki ab płanach bajevikoŭ, ale nie pryniali nijakich mier; što aficyjnyja pradstaŭniki Kramla śviadoma źnižali ŭ niekalki razoŭ kolkaść zakładnikaŭ, u suviazi z čym ich stanovišča rezka pahoršyłasia; što Uładzimir Pucin śviadoma nie išoŭ na pieramovy z zakładnikami, śćviardžajučy, što ŭ ich nie było nijakich patrabavańniaŭ, i što šturm škoły śpiecnazam i vajskoŭcami pačaŭsia z abstrełu škoły zvonku, a nie paśla vybuchu bomby ŭnutry budynka, jak miarkuje aficyjnaje śledstva.