Nie paśpieli amierykancy ŭvajści pad Kursk, jak prapahanda abvieściła ab ich źniščeńni. Što viadoma?
Rasijskija Z-kanały spravazdačylisia ab źniščeńni «najmitaŭ amierykanskaj pryvatnaj vajennaj kampanii FOG», jakija nibyta sprabavali ŭziać nasieleny punkt na ŭschod ad Sudžy. U toj ža čas u internecie stała źjaŭlacca ŭsio bolš śviedčańniaŭ ab prysutnaści na terytoryi Rasii byłych marpiechaŭ ZŠA, jakija dapamahajuć ukrainskaj armii ŭ nastupie.
22.08.2024 / 19:06
Foty byłych amierykanskich marpiechaŭ, jakija razam z USU znachodziacca ŭ Kurskaj vobłaści. U hetym ža rajonie svoj udzieł va ŭkrainskim nastupie paćvierdziła amierykanskaja niedziaržaŭnaja vajskovaja arhanizacyja Forward Observations Group («Hrupa napadu i nazirańnia»/FOG). Foty: akaŭnty FOG / zachodni siehmient tvitara (X)
Prakramloŭski telehram-kanał Shot sa spasyłkaj na krynicy śćviardžaje, što «najmity pryvatnaj vajennaj kampanii ZŠA Forward Observations Group» razam z USU sprabavali šturmavać siało Ruskaja Kanapielka, što na ŭschod ad Sudžy.
Pa viersii prapahandy, padčas ataki byli zabityja da 60 ukrainskich vajskoŭcaŭ, u liku jakich byli «amierykanskija najmity», i źniščanyja niekalki adzinak braniatechniki USU.
Čornym ukazalnikam paznačana siało Ruskaja Kanapielka, jakoje znachodzicca na ŭschod ad padkantrolnaha USU rasijskaha horada Sudžy. Krynica: Vikipiedyja
Ukrainskaje kamandavańnie hetuju infarmacyju pakul nijak nie kamientavała, ale sama hrupa FOG vykłała ŭ instahramie storyz, dzie iranična adkazała rasijskaj prapahandzie i prapanavała zakuplać svoj mierč.
«Sumna, ale daviadziecca pryznać — usie supracoŭniki FOG ciapier miortvyja. Pamierli našyja amierykanskija braty-najmity-hiei. My budziem pamiatać pra ich, kuplajučy mierč, jaki praz 20 chvilin źjavicca ŭ prodažy», — iranična adkazała hrupa FOG.
Hrupa FOG prakamientavała infarmacyju rasijskaj prapahandy ab nibyta ŭłasnych stratach pad horadam Sudžy. Skrynšot storyz z aficyjnaj instahram-staronki FOG
U toj ža čas u siecivie stała źjaŭlacca bolš fota, jakija mohuć śviedčyć ab najaŭnaści ŭ Kurskaj vobłaści dobraachvotnikaŭ z ZŠA. Niekatoryja zdymki publikavalisia niepasredna ŭ sacsietkach hrupy FOG i ŭ inšych akaŭntach, źviazanych ź joj.
Dva amierykanskija dobraachvotniki trymajuć ściah ZŠA na fonie rasijskaha prapahandysckaha biłborda ŭ Sudžy. Krynica: zachodni siehmient tvitara (X)
Amierykanskija dobraachvotniki, na čyjoj brani jość znak Forward Observations Group (FOG), trymajuć ukrainski ściah. Krynica: instahram-akaŭnt @saintjavelin
Nahadajem, što amierykanskaja niedziaržaŭnaja vajskovaja arhanizacyja Forward Observations Group («Hrupa napadu i nazirańnia»/FOG), jakaja składajecca z byłych marpiechaŭ i śpiecnazaŭcaŭ ZŠA, niadaŭna pryznała svoj udzieł va ŭkrainskim nastupie pad Kurskam.
Adpaviednuju publikacyju FOG zrabiła na svajoj aficyjnaj staroncy ŭ instahramie, kudy nabiehła vielizarnaja kolkaść prarasijskich botaŭ i zvyčajnych rasijskich karystalnikaŭ, jakija pačali pahražać amierykancam raspravaj i sprabavać ich pierakonvać u «niepaźbiežnaj pieramozie ruskaj zbroi».
Nie zastalisia ŭ baku i rasijski MZS, Saviet Fiederacyi Rasii i mnostva Z-kanałaŭ, jakija abvinavacili ZŠA ŭ adkrytaj ahresii suprać Rasii i abviaścili «amierykanskich najmitaŭ» zakonnaj vajskovaj cellu, paabiacaŭšy im «abo śmierć, abo pažyćciovaje źniavoleńnie za najomnictva ŭ vypadku ich traplańnia ŭ pałon».
Ab tym, što saboj ujaŭlaje amierykanskaja vajskovaja hrupa FOG, jak daŭno jana dziejničaje va Ukrainie i jakimi mahčymaściami vałodaje, «Naša Niva» pisała tut.
Ukraincy sprabavali prarvacca ŭ Klimaŭski rajon Branskaj vobłaści — jon miažuje ź Biełaruśsiu
Academi suprać Hrupy Vahniera: jakaja siła pryvatnych vajskovych kampanij