«Na viaki viečnyja». Pra što budzie sumiesny biełaruska-kitajski film z takoj nazvaj?
Stali viadomy niekatoryja padrabiaznaści sumiesnaha filma, jaki «Biełaruśfilm» budzie zdymać z kitajskimi partniorami.
23.08.2024 / 06:00
Dyrektar kinastudyi «Biełaruśfilm» Juryj Alaksiej (krajni źleva) i hienieralny dyrektar kitajskaj kampanii Sichuan Blue Eyes Film and Television Culture Media Łej Chań (krajni sprava). Skryn videa: kanalkulturabr249 / YouTube
Kinastudyja «Biełaruśfilm» i kampanija pa vytvorčaści kino i telebačańnia pravincyi Syčuań (Sichuan Blue Eyes Film and Television Culture Media) padpisali damovu ab stvareńni mastackaha filma «Na viaki viečnyja». Hienieralnym pradziusaram i hałoŭnym režysioram filma budzie hienieralny dyrektar kitajskaj kampanii Łej Chań.
Niekatoryja padrabiaznaści Łej Chań i hienieralny dyrektar kinastudyi «Biełaruśfilm» Juryj Alaksiej raskazali ŭ efiry kanała «Kultura» Biełaruskaha radyjo.
Pa słovach Alaksieja, padrychtoŭčyja raboty vialisia kala paŭhoda, byŭ napisany scenaryj. Z 24 pa 26 žniŭnia na bazie «Biełaruśfilma» Łej Chań budzie pravodzić kastynh. Alaksiej zapeŭniŭ, što pałova artystaŭ, zaniatych u filmie, budzie ź Biełarusi. Hałoŭnuju mužčynskuju rolu budzie hrać biełarus, žanočuju — kitajanka.
Film koratka apisvajecca tak: «Dvoje maładych ludziej, jakija vychoŭvalisia ŭ raznych krainach i kulturach, adpraŭlajucca ŭ składanaje padarožža».
U filmie budzie dźvie častki — histaryčnaja i sučasnaja. U pieršaj buduć pakazany časy Druhoj suśvietnaj vajny, kali savieckija (u tym liku i biełaruskija) dobraachvotniki dapamahali kitajcam zmahacca ź japonskaj ahresijaj.
Scenaryj napisany kitajskim bokam. Pa słovach Łej Chania, jaki prymaŭ aktyŭny ŭdzieł u jaho stvareńni, «hałoŭnaja zadača — pakazać, što supracoŭnictva i ŭzajemasuviaź pamiž žycharami Biełarusi i Kitaja maje hłybokija karani».
Zdymki buduć pravodzicca jak u Biełarusi, tak i ŭ Kitai. Hałoŭnymi łakacyjami ŭ našaj krainie stanuć Minsk, Brest i Biełaviežskaja pušča. U Kitai zdymać buduć u stalicy pravincyi Syčuań Čeńdu, samym vialikim horadzie Kitaja Čuncyni a taksama pakažuć Uchań, jaki dla kitajcaŭ źjaŭlajecca vielmi važnym histaryčnym miescam.
Rabotu nad filmam płanujuć skončyć u śniežni 2025 hoda.
«Biełaruśfilm» zapuskaje kastynh akcioraŭ dla sumiesnaha z Kitajem kinaprajekta
«Dedpuł i Rasamacha» staŭ samym kasavym u historyi filmam z rejtynham R
Čatyry biełaruskija filmy, jakija vy nie bačyli
«Biełaruśfilm» choča źniać svajo «Słova pacana»