Трое беларусаў выратавалі параненага чорнага бусла
Птушка пасялілася на сажалцы рыбгаса ў Чэрвеньскім раёне, але доўга б там не працягнула, піша «Точка».
23.08.2024 / 10:43
Фота: inashkurko / Instagram
Пра тое, што на сажалцы рыбгаса «Волма» ў Чэрвеньскім раёне жыве паранены чорны бусел, паведаміў спачатку заолаг Аляксандр Вінчэўскі. Ён расказваў, што калі небараку не дапамагчы, ён доўга не пратрымаецца. У птушкі было пашкоджана крыло, і яна не магла лётаць.
На гэта адрэагаваў арнітолаг-аматар Аляксей Дальноў. Да сябе ў кампанію ён паклікаў фатографа дзікай прыроды Іну Шкурко і сябра Дзмітрыя Астапковіча. Так трое беларусаў адправіліся на выратаванне птушкі.
Выратаванне прыйшлося на 21 жніўня, калі надвор'е было непрадказальным. Беларусы прыехалі ў рыбгас. Але першую спробу выратавання перапынілі навальніца, шквалісты вецер і дождж.
Скрыншот: inashkurko / Instagram
Непагадзь перачакалі, выглядзелі ў бінокль бусла, які за гэты час перабраўся на другі бок сажалкі, і адправіліся за ім.
Каб дабрацца да бусла, ім давялося прабірацца па глеі, у які правальваліся па калена.
Скрыншот: inashkurko / Instagram
Птушка ў выніку апынулася ў надзейных руках ратавальнікаў, якія перадалі яе ў Цэнтр падтрымкі дзікіх жывёл «Сірын».