U Smarhonskim rajonie prosta ŭ aharodzie vyraśli hihanckija šampińjony FOTAFAKT
U vioscy Kryŭsk, što la Kreva, siarod sadovych dreŭ vyras sapraŭdny cud pryrody. Na ŭčastku siamji Sidarovič źjavilisia zahadkavyja biełaśniežnyja šary, jakija spačatku vyklikali va ŭsich ździŭleńnie i navat źbiantežanaść, piša miascovaje vydańnie «Śvietły šlach».
23.08.2024 / 11:29
Fota: Śvietły šlach
Akazałasia, što heta hryby. Pamieram jany byli ad nievialikaha jabłyka da hihanckaha miača. Samy bujny ekzemplar dasiahnuŭ u dyjamietry 44 sm.
«Kali my z mužam upieršyniu ŭbačyli hetyja hryby, to vyrašyli nie čapać ich i dačakacca pryjezdu dziaciej, — raspaviadaje Antanina Mikałajeŭna, haspadynia ŭčastka. — Dačka ź ziaciem adrazu ž pačali šukać infarmacyju ŭ internecie i vyśvietlili, što heta hałavačy hihanckija, hryby siamiejstva šampińjonavych».
Fota: Śvietły šlach
Akazałasia, što hetyja biełaśniežnyja šary nie tolki biaśpiečnyja, ale i całkam jadomyja. Pierš čym vyrašycca na kulinarnyja ekśpierymienty, siamja źviarnułasia pa kansultacyju da bijołaha i prahledzieła recepty ŭ tyktoku.
«Kali my daviedalisia, što hetyja hryby možna jeści, vyrašyli pasprabavać pryhatavać ich, — raspaviadaje Hanna Iosifaŭna, dačka. — My absmažyli ich u śmiatannym sousie, i vynik pierasiahnuŭ usie čakańni. Strava z hihanckaha hryba akazałasia nadta dalikatnaj, ź lohkim hrybnym vodaram i smakam, jaki nahadvaje kurynuju hrudku».
Fota: Śvietły šlach
Usia siamja zastałasia zadavolenaja niezvyčajnym pačastunkam, a ŭnuki, u svaju čarhu, ź vialikim zadavalnieńniem fatahrafavalisia z hetymi zahadkavymi biełymi šarami, jakija raptam źjavilisia na ich učastku.