Stali viadomyja proźviščy jašče dvuch biełarusaŭ, jakija vajavali na baku Rasii i zahinuli va Ukrainie
Vałanciory, jakija pradstaŭlajuć roznyja krainy, i źbirajuć źviestki pra pałonnych i zahinułych va Ukrainie vajskoŭcaŭ rasijskaj armii, paviedamili ab vialikaj kolkaści zapytaŭ ź Biełarusi ab pošuku svaich svajakoŭ, jakija pajšli vajavać na baku Rasii i nie vychodziać na suviaź.
23.08.2024 / 11:58
Ilustracyjnaje fota: Alex Babenko / AP
Va Ukrainie zahinuli biełarusy Andrej Aviaruška i Alaksandr Sianiuk, jakija vajavali ŭ składzie padraździaleńniaŭ rasijskaj armii. Jak paviedamili Svabodzie ŭ vałanciorskim prajekcie «Nie ždi mienia iz Ukrainy», abodva vajavali ŭ rasiejskaj armii pa kantrakcie.
Ab hibieli Andreja Aviaruški ŭ prajekt paviedamili jahonyja dzieci, jakija pačali pošuk baćki sioleta ŭ pačatku žniŭnia. 10 žniŭnia stała viadoma pra jahonuju hibiel.
Andrej Aviaruška naradziŭsia 11 lipienia 1969 hoda ŭ pasiołku Indura pad Hrodnam i vajavaŭ u 254-m hvardziejskim motastrałkovym pałku (vajskovaja častka 91704) — heta taktyčnaje farmiravańnie Suchaputnych vojskaŭ Rasii. Padraździaleńnie dysłakavałasia ŭ Klincach Branskaj vobłaści. Dzieci ŭžo atrymali paćviardžeńnie ab hibieli svajho baćki.
24 krasavika 2024 hoda stała viadoma ab hibieli Alaksandra Sieniuka ź Minska. Da kantraktu ŭ rasijskim vojsku jon, imavierna, pracavaŭ kiroŭcam pasažyrskaha aŭtobusa ŭ Minsku. Vajavaŭ pad pazyŭnym «Bieły» ŭ pieršaj asobnaj šturmavoj rocie 33 motastrałkovaha pałka, jaki ŭdzielničaŭ u bajach u Chiersonskaj i Mikałajeŭskaj abłaściach Ukrainy.
«Pra jaho hibiel paviedamiŭ vajskoviec ź jahonaha pałka», — udakładnili vałanciory.
Jak jany śćviardžajuć, abstaviny i detali padpisańnia hetymi biełarusami kantraktaŭ na słužbu ŭ rasijskaj armii im nieviadomyja.
Ź Biełarusi šmat zapytaŭ paśla bajoŭ pad Danieckam
Vałanciory paviedamili, što da ich apošnim časam źviartajecca šmat ludziej ź Biełarusi pa pošuk svajakoŭ.
«U časie bajoŭ za Aŭdziejeŭku było šmat zvarotaŭ ź Biełarusi pa pošuku. Ale ŭsie jany bajalisia publikavać svaje zvaroty», — skazaŭ surazmoŭca Svabody.
Bai za Aŭdziejeŭku pačalisia ŭ lutym 2022 hoda i praciahvalisia da siaredziny lutaha 2024-ha, kali ŭkrainskija vojski paśla ciažkich bajoŭ vyjšli z hetaha horada. U Aŭdziejeŭcy vajavali farmavańni tak zvanaj «DNR», a taksama 1439-y samachodna-artyleryjski połk, sfarmavany ŭ Irkucku. U 2023 i pačatku 2024 hodu Rasija pierakidvała na aŭdziejeŭski kirunak bataljon za bataljonam. Pavodle źviestak raźviedki ZŠA, tolki za kastryčnik-śniežań 2023 hodu pad Aŭdziejeŭkaj zahinuli abo atrymali ranieńni kala 13 tysiač vajskoŭcaŭ rasijskaj armii.
Na pytańnie, ci źviartalisia ź Biełarusi pa pošuk svajakoŭ paśla pačatku ŭkrainskaj apieracyi ŭ Kurskaj vobłaści, u prajekcie adkazali: «Kali budzie infarmacyja pra pałonnych, apublikujem na našym kanale».
Ciapier, pavodle jašče adnaho prajekta poteru.net, jaki viadzie bazu zahinułych va Ukrainie, paćvierdzili hibiel 16 biełarusaŭ i vychadcaŭ ź Biełarusi, jakija vajavali ŭ składzie pryvatnaj vajskovaj kampanii «Vahnier», rasiejskaj armii i ŭ vajenizavanych farmavańniach tak zvanych «DNR» i «ŁNR».
Siarod ich — Raman Hrovič, Mikałaj Markaŭ, Alaksandr Šyjanaŭ, Dźmitryj Leŭčanka, Ivan Ihnacienka, Alaksiej Ciškievič, Vital Zahnietkin, Alaksandar Michajłaŭ, Ihar Vałačyłaŭ, Jarasłaŭ Astaškoŭ, Siarhiej Łanavienka, Vital Čybisaŭ, Dzianis Łazaraŭ, Alaksandr Sianiuk, Rusłan Nikicin, Andrej Aviaruška.
Inšyja krynicy paviedamlali pra hibiel jašče piaci biełarusaŭ, jakija vajavali za Rasiju, — Vasila Kurłoviča, Paŭła Jaŭhleŭskaha, Piatra Łuzanava, Uładzisłava Čarnova i Andreja Babko.
Dakładnaja kolkaść zahinułych va Ukrainie biełarusaŭ i vychadcaŭ ź Biełarusi, jakija vajavali na baku Rasii, nieviadoma.