Vienhierski palityk ź Jeŭraparłamienta padaŭ u adstaŭku paśla pjanaj bojki i svarki z žančynaj u bary
Bałaž Dźjorfi, deputat Jeŭraparłamienta ad partyi premjer-ministra Vienhryi Viktara Orbana «Fides», skłaŭ mandat paśla bojki ŭ bary.
23.08.2024 / 17:16
Bałaž Dźjorfi. Fota: fejsbuk palityka
Pra heta Dźjorfi napisaŭ u Facebook 23 žniŭnia.
Jon paviedamiŭ, što ŭviečary ŭ čaćvier, 22 žniŭnia, «uviazaŭsia ŭ pjanuju sprečku z žančynaj, jakaja, na žal, pierarasła ŭ hvałt».
«Choć ja, na žal, nie pamiataju, što adbyłosia, toje, što ja zrabiŭ, było nieprymalnym. Kali ja zrabiŭ, mnie niama miesca ŭ hramadskim žyćci. Tamu ja padaju ŭ adstaŭku z usich svaich publičnych pasad i vychodžu z «Fides». Heta samaje małoje, što ja mahu zrabić u hetaj situacyi», — dadaŭ jon.
Palityk taksama pakinuŭ pasadu prezidenta Vienhierskaj sielskahaspadarčaj pałaty, jakuju ŭznačalvaŭ z 2013 hoda.
U «Fides» paćvierdzili zvalnieńnie Dźjorfi, padkreśliŭšy, što pavodzinam jeŭradeputata «niama apraŭdańnia», a partyja «nie tryvaje hvałtu, asabliva ŭ dačynieńni da žančyn!», piša «Jeŭrapiejskaja praŭda».
Choć publična baki nie ŭdakładniali padrabiaznaściaŭ incydentu, vienhierskija ŚMI śćviardžajuć, što Dźjorfi padčas viečarynki ŭ adnym z baraŭ Budapiešta, padpiŭšy, nakryčaŭ na žančynu, na što jaje tavaryšy adreahavali bojkaj.
Na miesca zdareńnia daviałosia vyklikać palicyju, adnamu z udzielnikaŭ bojki spatrebiłasia dapamoha miedykaŭ. Dźjorfi fihuruje ŭ rasśledavańni, jakoje pa fakcie incydentu pačała Centralnaja hałoŭnaja śledčaja prakuratura Vienhryi.
Bałaž Dźjorfi staŭ deputatam Jeŭraparłamienta ad «Fides» u červieni paśla 14 hadoŭ pracy ŭ parłamiencie Vienhryi.
Heta nie pieršy vypadak, kali Jeŭradeputaty ad partyi Orbana traplajuć u padobnyja skandały. U 2020 hodzie Jožef Sajer skłaŭ mandat paśla taho, jak jaho zaśpieli na hiej-orhii ŭ Bruseli z narkotykami, a ad palicyi jon uciakaŭ, spuściŭšysia pa vadaściokavaj trubie.