У Асмалоўцы сапсавалі фасады гістарычнага дома. Усё па законе
Кварталы ўтульнай пасляваеннай забудовы ў цэнтры Мінска былі ўзятыя пад ахову законам. Праўда, сам закон, як выявілася, аказаўся крывым.
25.08.2024 / 17:35
Уласнік прабіў вялікія вокны, якія сапсавалі выгляд гістарычнага дома па вуліцы М. Багдановіча, 22. Фота: тэлеграм-канал «Спадчына»
У пасляваенным двухпавярховым доме на рагу вуліц М. Багдановіча і Кісялёва (№ 22 / 51) новы ўласнік памяшкання на першым паверсе прабіў чатыры вялікія праёмы да ўзроўню падлогі, якія сказілі выгляд гістарычнага будынка. На гэта звярнуў увагу тэлеграм-канал «Спадчына».
Дом па вуліцы М. Багдановіча, 22. Фота: тэлеграм-канал «Спадчына»
У 2018 годзе Міністэрствам культуры быў зацверджаны праект зон аховы гісторыка-культурных каштоўнасцей, раскіданых па кварталах за Оперным тэатрам. Тады пад ціскам грамадскасці ў зоны аховы трапіла і забудова Асмалоўкі, якую праз адсутнасць афіцыйнага статусу помніка архітэктуры спрабавалі перыядычна забудаваць новым жытлом.
У дакуменце было прапісана, што забараняецца змена вышыні, архітэктурнага рашэння і дэкору фасадаў усіх пасляваенных будынкаў Асмалоўкі, якія ствараюць непаўторны антураж раёна.
Усе дамы ў Асмалоўцы, хоць не з'яўляюцца афіцыйнымі помнікамі, былі прызнаныя каштоўнымі. Фота: праект зон аховы
Але цяпер выявілася, што ў дакуменце, зацверджаным Міністэрствам культуры, маецца грубая памылка: у рэгламентах для квартала ў межах вуліц М. Багдановіча, Кісялёва, Чычэрына і Камуністычнай адбылася блытаніна — пазначаны дамы, якія знаходзяцца ў суседнім квартале.
Складальнікі праекта зон аховы двойчы прапісалі адны і тыя ж адрасы для розных кварталаў, незнарок пазбавіўшы ўсе дамы ў адным з іх якой-небудзь аховы. Фота: тэлеграм-канал «Спадчына»
Гэтая памылка азначае, што ніводны з дамоў у гэтым квартале нічым не абаронены, а значыць з імі можна рабіць, што заўгодна: надбудоўваць, прабіваць любыя праёмы, збіваць дэкор ці проста абшыць керамагранітнай пліткай — ніякай адказнасці за гэта не будзе.
Закінуты аўтавакзал у Мінску пераробяць для дзяцей і моладзі
У Магілёве перадумалі зносіць першую гарадскую электрастанцыю?
Муляж у натуральную велічыню. У Клімавічах цалкам з новых матэрыялаў адбудоўваюць гістарычны помнік