Duraŭ źbiraŭsia sustrakacca z Makronam pierad zatrymańniem? Voś chto pra heta vydumaŭ
Hetuju navinu apublikavali šmatlikija miedyja sa spasyłkaj na francuzskuju hazietu Le Canard enchaîné. Razabralisia, što za vydańnie pra heta napisała i ci sapraŭdy Makron siabruje sa stvaralnikam Telegram.
28.08.2024 / 08:30
Pavieł Duraŭ i Emanuel Makron. Fota: NickLubushko/wikimedia.org, dvidshub.net
Padchapili hetuju infarmacyju jak rasijskija prapahandysty, hetak i niekatoryja telehram-kanały i miedyja, a taksama francuzskija krajnie pravyja papulisty.
Što za vydańnie Le Canard enchaîné
Le Canard enchaîné pierakładajecca z francuzskaj jak «prykavanaja kačka». Heta najstarejšaje ź dziejučych francuzskich satyryčnych vydańniaŭ, zasnavanaje ažno ŭ 1915 hodzie. Spačatku hazieta była blizkaja da krajnie levych ciačeńniaŭ, ale z 20-ch admiežavałasia ad ich, choć jaje aŭtary trochu bolš simpatyzujuć levym, čym pravym, i dahetul.
Admietna, što pry nakładzie bolš čym 500 tysiač asobnikaŭ hazieta zusim nie publikuje rekłamy. Pry hetym čysty prybytak haziety — miljony dalaraŭ. Reč u sotniach tysiač łajalnych čytačoŭ pa ŭsioj Francyi.
Sama hazieta składajecca z karykatur, fieljetonaŭ i skietčaŭ. Pry hetym časta hazieta daśleduje davoli składanyja temy i robić hučnyja rasśledavańni, ale nikoli nie zdradžvaje firmovamu stylu.
Što napisała hazieta?
U apošnim vypusku nieviadomy aŭtar, schavany pad psieŭdanimam J.C., piša, što «Makron nie paśpieŭ napaśledak paviačerać z Paŭłam Duravym». Duraŭ, piša hazieta, adrazu paśla zatrymańnia zajaviŭ palicyi, što źbirajecca na viačeru ŭ Jelisiejski pałac.
Paśla hetaha, praciahvaje aŭtar, žurnalisty haziety Le Palmipède (takoj nie isnuje) zapytalisia ŭ Jelisiejskim pałacy, ci praŭda heta. Tam, maŭlaŭ, adkazali: prezident u toj viečar byŭ na kurorcie Le-Tukie (jaho žonka maje tam dom), a Duraŭ adrazu paśla zatrymańnia pačaŭ chvalicca svaimi suviaziami i znajomstvami dy vydumaŭ viačeru z Makronam.
Dalej idzie bolš surjoznaja častka natatki. Aŭtar schilajecca da dumki, što Pavieł Duraŭ pryjechaŭ u Francyju, bo mierkavaŭ, što francuzskija ŭłady nie buduć vystaŭlać jamu anijakich abvinavačańniaŭ i buduć stavicca asabliva. «Makron maje zvyčku rasściłać čyrvonuju dyvanovuju darožku pierad usimi zapar technamahnatami, navat takimi mutnymi, jak Iłan Mask», — piša aŭtar.
«Ale, padobna, hetym razam telehrama da Makrona nie dajšła…» – iranizuje hazieta, abyhryvajučy padabienstva francuzskaha słova télégramme i nazvy miesiendžara Durava.
Dyk ci źbiraŭsia Duraŭ sustrakacca z Makronam?
Nie, heta žart.
Le Canard enchaîné prosta chacieŭ u charakternaj maniery ŭpiknuć francuzski ŭrad za nierazborlivaść u suviaziach. Akramia ŭsiaho inšaha, hazieta spačatku, jašče da vychadu numaru, apublikavała hetuju natatku ŭ tvitary, imavierna, kab pavialičyć prodažy.
Pavieł Duraŭ paśla emihracyi ŭ 2014 hodzie byvaŭ u Rasii nie mienš za 50 razoŭ
Makron daŭno i aktyŭna karystajecca Telegram. Jon amatar miesiendžara — Politico
Ci pahražaje niešta Telegram paśla zatrymańnia Paŭła Durava?