Беларуса, якому Швецыя адмовіла ў прытулку, затрымалі на радзіме
Мужчыну з Беларусі, якому міграцыйная служба Швецыі адмовіла ў прытулку, затрымалі з палітычных матываў па вяртанні на радзіму, пра гэта паведаміла Sveriges Radio, заўважыла «Свабода».
28.08.2024 / 11:53
Адзначаецца, што ён прыбыў у Швецыю з маці два гады таму. Прытулку яны папрасілі, бо «абое ўдзельнічалі ў шырокамаштабных акцыях пратэсту пасля прэзідэнцкіх выбараў 2020 года».
Паводле інфармацыі выдання, у заявах на атрыманне міграцыйнага статусу гаворыцца, што ў Беларусі на маці і сына завялі крымінальную справу і «яны баяцца, што іх пасадзяць у турму».
Нягледзячы на гэта, іх прашэнні адхілілі.
Гэта адбылося яшчэ ў 2023 годзе, а на мінулым тыдні, як сцвярджаецца, мужчыну і ягоную маці дэпартавалі са Швецыі ў Беларусь.
У публікацыі гаворыцца, што беларуса «арыштавалі проста на мяжы». Пра лёс жанчыны не паведамляецца.
Адвакат Стэфан Крысціч, які прадстаўляў інтарэсы некалькіх беларускіх просьбітаў аб прытулку, у каментары выданню адзначыў, што шмат хто з шукальнікаў «пацярпеў», бо міграцыйная служба Швецыі «да нядаўняга часу ацэньвала іх прашэнні на падставе састарэлай інфармацыі».
Шведскае міграцыйнае агенцтва «раней крытыкавалі за выкарыстанне састарэлай інфармацыі аб палітычных рэпрэсіях у Беларусі», адзначаецца ў публікацыі. Пры гэтым у лютым сёлета апублікаваныя новыя звесткі, якія «ясна паказваюць, як узмацніліся рэпрэсіі [у Беларусі] і як людзей усё яшчэ караюць за ўдзел у пратэстах чатыры гады таму».
Як піша «Позірк», 5 жніўня ў Вільні на канферэнцыі «Новая Беларусь» прадстаўнік народнай амбасады ў Швецыі Дзмітрый Васэрман паведаміў, што летась больш за сто беларусаў папрасілі статусу ўцекача ў Швецыі, а далі яго толькі траім.
«Гэта не азначае, што ўсіх астатніх высылаюць у Беларусь, паколькі некаторыя абскарджваюць [судовыя рашэнні], некаторыя едуць у іншыя краіны, і гэтак далей», — падкрэсліў ён.