У Маскве школьныя лінейкі пройдуць у памяшканнях. І бацькоў на іх не пусцяць
Святочныя лінейкі, прысвечаныя пачатку навучальнага года, у Маскве будуць праводзіць не на вуліцы, як звычайна, а ў памяшканнях. Пра гэта РБК паведамілі трое настаўнікаў маскоўскіх школ. Навучальны год у гэтым годзе пачнецца 2 верасня, як і ў Беларусі.
30.08.2024 / 09:07
Ілюстрацыйнае фота
Аналагічную інфармацыю бацькам паведаміла дырэктар школы ў Някрасаўцы на паўднёвым усходзе Масквы Мая Булаева.
«Сёлета фармат будзе некалькі нетрадыцыйным: усе лінейкі, у тым ліку і сама галоўная лінейка для першых і 11 класаў, пройдуць у памяшканнях. Гэта, я думаю, будзе зроблена абсалютна ва ўсіх школах нашага горада», — сказала яна.
Пры гэтым бацькі на лінейках прысутнічаць не будуць. Па словах дырэктара, гэта звязана з бяспекай дзяцей, а школа будзе весці анлайн-трансляцыю мерапрыемства. Першы ўрок у школе пачнецца з «Размовы пра важнае», адзначыла Булаева.
Пра перанос лінеек у Маскве ў закрытыя памяшканні таксама паведаміў тэлеграм-канал Baza.
Па словах настаўніка гісторыі школы ў Зеленаградзе Аляксандра Оджа, гэта рашэнне прадыктавана «пытаннямі бяспекі». Іншы настаўнік маскоўскай школы паведаміў, што фармальна правядзенне лінейкі ў памяшканні тлумачаць занадта гарачым надвор'ем.
У іншых рэгіёнах Расіі фармат святочных лінеек таксама будзе зменены.
Так, прэс-служба губернатара Растоўскай вобласці Васіля Голубева 24 жніўня паведаміла аб рашэнні правесці ўсе лінейкі ў закрытых памяшканнях. Такое ж рашэнне прынялі ўлады Бранскай вобласці.
У абласцях, якія мяжуюць з Украінай, навучанне будзе ісці па змяшанай сістэме.