U Izraili abvieščany nacyjanalny strajk. Ludzi patrabujuć vyzvaleńnia ŭsich zakładnikaŭ
Dziasiatki tysiač izrailcian u niadzielu ŭziali ŭdzieł u demanstracyjach z patrabavańniem vyzvalić zakładnikaŭ, zachoplenych CHAMAS padčas napadu na Izrail u minułym kastryčniku. Tym časam izrailskaja Fiederacyja prafsajuzaŭ Histadrut abviaściła ab praviadzieńni ŭ krainie ŭsieahulnaj zabastoŭki. Akcyi pratestu prachodziać nieŭzabavie paśla taho, jak izrailskija vajskoŭcy vyjavili ŭ siektary Haza cieły šaściarych zakładnikaŭ.
02.09.2024 / 06:59
Fota: Oren Ziv / AP
Demanstranty ź izrailskimi ściahami ŭčora pryjšli ŭ centr najbujniejšych haradoŭ krainy, u tym liku Tel-Aviva i Jerusalima, piša Bi-bi-si.
Jany abvinavačvajuć premjer-ministra Bińjamina Nietańjachu ŭ tym, što jaho ŭrad robić niedastatkova dla zaklučeńnia ŭhody z CHAMASam u spravie vyzvaleńnia zakładnikaŭ.
Staršynia prafsajuza Arnon Bar-David zajaviŭ, što pahadnieńnie ab vyzvaleńni zakładnikaŭ «važniejšaje za ŭsio astatniaje».
«Habrejaŭ zabivajuć u tunelach Hazy. Heta niemahčyma ŭśviadomić i treba spynić», — zajaviŭ jon na pres-kanfierencyi ŭ Tel-Avivie paśla sustrečy z Forumam zakładnikaŭ i źnikłych bieź viestak (arhanizacyja abjadnoŭvaje svajakoŭ izrailcian, zachoplenych u pałon paśla napadu CHAMASa na Izrail u kastryčniku minułaha hoda).
Zabastoŭka pačałasia a 6 ranicy i praciahniecca na praciahu ŭsiaho dnia. Z 8 ranicy budzie zakryty mižnarodny aeraport «Ben-Huryjon».
Bar-David zajaviŭ, što rašeńni ab dalejšych dziejańniach buduć pryniatyja paźniej. «Zamiest uhody[ab vyzvaleńni zakładnikaŭ] my atrymlivajem miaški z trupami», — dadaŭ jon.
Histadrut načytvaje kala 800 tysiač členaŭ.
Demanstracyi byli ŭ asnoŭnym mirnymi, adnak u Tel-Avivie ŭdzielniki akcyi pratestu prarvalisia praz palicejskija zaharody i zabłakavali adnu z asnoŭnych mahistralaŭ. Niekatoryja z demanstrantaŭ raspalili vohniščy.
U Jerusalimie vialikaja kolkaść praciŭnikaŭ Nietańjachu sabrałasia kala jaho ofisa.
Adzin z udzielnikaŭ akcyi pratestu skazaŭ, što ŭ joj biare ŭdzieł našmat bolš ludziej, čym u papiarednich vystupach. «Siońnia ŭsio zusim pa-inšamu. Inšy maštab u paraŭnańni z usim, što było», — kaža hety čałaviek.
«Paśla taho jak my pačuli pra šeść [zahinułych] zakładnikaŭ, my bolš nie mahli maŭčać. Heta vielmi važna. U nas bolš niama vybaru», — skazaŭ našamu karespandentu Jotam Piir, jašče adzin udzielnik demanstracyi, 21-hadovy brat jakoha byŭ zabity padčas napadu 7 kastryčnika.
Hibiel zakładnikaŭ
Akcyi pratestu i strajk prachodziać nieŭzabavie paśla taho, jak izrailskija vajskoŭcy vyjavili cieły šaści zakładnikaŭ u siektary Haza.
U zajavie Armii abarony Izraila havorycca, što cieły zahinułych byli vyjaŭlenyja ŭ subotu ŭ padziemnym tuneli ŭ rajonie Rafacha na poŭdni ankłava.
Pres-sakratar CACHAŁ Daniel Chahary skazaŭ, što, pavodle papiaredniaj acenki, jany byli «žorstka zabityja terarystami CHAMAS niezadoŭha da taho, jak my zdoleli da ich dabracca».
Forum siemjaŭ zakładnikaŭ zajaviŭ, što ŭsie šaściora izrailcian byli « zabityja ŭ apošnija niekalki dzion, pieražyŭšy amal 11 miesiacaŭ ździekaŭ, katavańniaŭ i hoładu ŭ pałonie CHAMAS».
«Zatrymka z padpisańniem ździełki pryviała da ich hibieli i hibieli mnohich inšych zakładnikaŭ», — havorycca ŭ im.
Na premjer-ministra Izraila Bińjamina Nietańjachu akazvajecca ŭsio bolšy cisk z metaj dasiahnieńnia pahadnieńnia ab viartańni pakinutych zakładnikaŭ.
Nietańjachu zajaviŭ, što maje namier zaklučyć pahadnieńnie, ale «toj, chto zabivaje zakładnikaŭ, nie choča ździełki».
Niezrazumieła, kolki zakładnikaŭ zastałosia ŭ Hazie. U chodzie biesprecedentnaha napadu na Izrail 7 kastryčnika minułaha hoda bajeviki CHAMAS vykrali bolš za 250 čałaviek i zabili 1200 čałaviek na izrailskaj terytoryi.
Izrail u adkaz pačaŭ maštabnuju apieracyju ŭ siektary Haza i paabiacaŭ źniščyć CHAMAS. Pavodle źviestak padkantrolnaha bajevikam Ministerstva achovy zdaroŭja Hazy, z 7 kastryčnika tam było zabita bolš za 40 tysiač čałaviek.
Izrail abjaviŭ, što šeść załožnikaŭ u Hazie znojdzieny miortvymi, adzin ź ich rasijanin
CACHAŁ znajšoŭ u siektary Haza cieły šaści zahinułych izrailskich zakładnikaŭ