Іран можа ўжо ў найбліжэйшы час пачаць пастаўкі балістычных ракет у Расію
Еўрапейскія афіцыйныя асобы чакаюць, што Іран найбліжэйшым часам паставіць Расіі балістычныя ракеты, паведамляе агенцтва Bloomberg са спасылкай на дасведчаныя крыніцы.
02.09.2024 / 22:35
Прэзідэнт Расіі Уладзімір Пуцін з Вярхоўным кіраўніком Ірана аяталой Алі Хаменэі. Здымак ілюстрацыйны. Фота: Pool / Iranian Supreme Leader Press Office/Anadolu Agency/Getty Images
Іран ужо паставіў Расіі шмат беспілотнікаў Shahed, якія штодня выкарыстоўваюць расійскія войскі для нападаў на ўкраінскія гарады. А ў пачатку года агенцтва Reuters паведамляла, што Тэгеран мог перадаць Маскве і каля 400 балістычных ракет.
Крыніцы Bloomberg не раскрываюць магчымыя тэрміны паставак, тып ракет і маштабы паставак, але пры гэтым адзін з іх выказаў здагадку, што пастаўкі могуць пачацца цягам некалькіх дзён.
На ўзбраенні ў Ірана, у прыватнасці, ёсць ракеты «Фатх-360» з радыусам дзеяння да 120 км, пра іх магчымыя пастаўкі гаварылася ў матэрыяле Reuters. Аднак таксама Іран мае і істотна больш дальнабойныя ракеты, у прыватнасці «Саджыл», радыус якой дасягае 2500 км — па прынятай класіфікацыі, гэта ракета сярэдняй далёкасці.
ЗША і хаўруснікі ў НАТА неаднаразова перасцерагалі Тэгеран ад такога кроку і рабілі дыпламатычныя намаганні, каб прадухіліць яго, адзначае агенцтва. Прадстаўнік Рады нацыянальнай бяспекі ЗША, па паведамленні Reuters, заявіў, што пастаўкі Іранам у Расею зброі такога класа будуць расцэньвацца як эскалацыя агрэсіі супраць Украіны, і што ЗША, а таксама краіны НАТА і G7 гатовыя даць на гэтыя дзеянні «хуткі і жорсткі адказ». Які, праўда, не ўдакладняецца.
Стары паплечнік Лукашэнкі параўнаў яго з аяталой Хамейні. Параўнанне так сабе
Пуцін прапанаваў Ірану рэкордныя аб'ёмы расійскага газу са зніжкай 75%
МАГАТЭ аказвала прамую падтрымку іранскай ядзернай праграме