ZŠA ŭzhadnili pieradaču Ukrainie kryłatych rakiet vialikaj dalokaści dla F-16 — Reuters
ZŠA blizkija da zaklučeńnia pahadnieńnia ab pieradačy Ukrainie kryłatych rakiet vialikaj dalokaści JASSM kłasa «pavietra-ziamla», jakija staviacca na zachodnija samaloty, piša Reuters sa spasyłkaj na svaje krynicy.
03.09.2024 / 17:48
Fota: Wikimedia Commons
Sa słoŭ surazmoŭcaŭ vydańnia, kančatkovaje rašeńnie jašče nie pryniataje. U vypadku stanoŭčaha adkazu Kijevu pryjdziecca čakać niekalki miesiacaŭ, pakolki ZŠA vyrašajuć «techničnyja prablemy», źviazanyja ź pieradačaj rakiet.
Rakiety JASSM da hetaha času stavili tolki na samaloty, raspracavanyja ŭ ZŠA — u pryvatnaści, na źniščalniki F-16, atrymanyja Ukrainaj. Kožny taki samalot moža nieści pa dźvie rakiety).
Pa słovach adnaho z surazmoŭcaŭ Reuters, rabilisia sproby zrabić rakietu prydatnaj dla vykarystańnia sa źniščalnikami inšaha pachodžańnia, ale infarmacyi pra toje, jakija samaloty z ukrainskaha arsienała padyduć dla hetaha, niama. Ukrainskija vajskoŭcy, jak adznačaje Reuters, ekspłuatujuć savieckija samaloty MiH-29, Su-24 i Su-27.
Vajskovyja analityki i ekśpierty adznačajuć, što adpraŭka JASSM va Ukrainu moža istotna źmianić chod kanfliktu, pakolki vialikaja častka Rasii apyniecca ŭ zonie dasiažnaści vysokadakładnych bojeprypasaŭ.
Heta moža prymusić rasijskich vajskoŭcaŭ adsunuć płacdarmy i składy zabieśpiačeńnia na sotni kiłamietraŭ uhłyb terytoryi.
Zapusk rakiet z punktaŭ pablizu paŭnočnaj miažy Ukrainy moža dazvolić im paražać vajskovyja abjekty na adlehłaści až da Varonieža i Branska. Na poŭdni, skancentravaŭšy ich pablizu linii frontu, možna nanieści ŭdary pa aeradromach abo vajenna-marskich abjektach u Krymie.
Staryja madeli JASSM ad Lockheed Martin Corp majuć dalokaść dziejańnia kala 230 mil (370 km). Rakiety daŭžynioj kala 14 futaŭ (4 m) ciažka vyjavić radaram. Jany taksama mohuć lotać blizka da ziamli i mohuć być zaprahramavanyja na źvilistyja maršruty dla abychodu srodkaŭ SPA.
Isnuje taksama bolš dalnabojnaja rakieta JASSM, zdolnaja pralacieć bolš za 500 mil. Kožnaja JASSM abstalavanaja vialikaj 1000-funtavaj bojehałoŭkaj, ale, u adroźnieńnie ad rakiet Storm Shadow i Scalp, jana nie pryznačanaja dla ŭdaraŭ pa bunkierach.
Najnoŭšyja viersii kaštujuć kala 1 miljona dalaraŭ kožnaja. Naviadzieńnie robicca z dapamohaj sihnałaŭ hłabalnaj sistemy pazicyjanavańnia (GPS) i iniercyjnaj navihacyjnaj sistemy. Kali rakieta nabližajecca da celi, infračyrvony šukalnik dapamahaje nakiravać jaje ŭ punkt paražeńnia z dakładnaściu kala 10 futaŭ (3 m).
Adnak ža pakul zabarona na ŭdary pa celach u hłybini Rasii amierykanskaj zbrojaj pa-raniejšamu zastajecca ŭ sile. Administracyja Džo Bajdena aścierahajecca, što źniaćcie abmiežavańniaŭ spravakuje Rasiju na jašče bolš ahresiŭnyja dziejańni ŭ dačynieńni da Ukrainy.
Pa słovach supracoŭnika amierykanskaha Kanhresa, fakt pieradačy Ukrainie rakiet JASSM budzie dalej cisnuć na Vašynhton, kab źniać abmiežavańni na vykarystańnie amierykanskaj zbroi dla ŭdaraŭ pa terytoryi Rasii.
Rasijski ŭdar «Iskanderam» pa Pałtavie: bolš za 40 zabitych i 180 paranienych
Iran moža ŭžo ŭ najbližejšy čas pačać pastaŭki balistyčnych rakiet u Rasiju
Ukraina ŭpieršyniu ŭžyła svaju rakietu-dron «Palanica» pa celi ŭ Krymie