Palinu Šarendu-Panasiuk pavieźli na sud u Rečycu. Jaje stan pahoršaŭ
«Palina pamiraje ŭ turmie. Stan jaje zdaroŭja rezka pahoršyŭsia. Siońnia pryjšli dźvie ciažkija naviny», — napisaŭ u fejsbuku jaje muž Andrej Šarenda.
04.09.2024 / 13:08
Palina Šarenda-Panasiuk. Fota z fejsbuka jaje muža
«Pa-pieršaje — stała viadoma ab rezkim paharšeńni stanu zdaroŭja Paliny. Jana pakutuje ad rezkich bolaŭ z boku žyvata, jakija addajuć u śpinie. Patrebnuju miedycynskuju dapamohu Palinie nie akazvajuć, dajuć tolki abiazbolvajučyja. My dahetul nie viedajem ničoha ab stanie zdaroŭja Paliny. Nam viadomy tolki jaje dyjahnaz — chraničny pankreatyt. Heta vielmi ciažkaja chvaroba, jakaja patrabuje strohaj dyjety i stałaha kantrolu lekaraŭ. Va ŭmovach, jakich utrymlivajuć Palinu, heta prosta adterminavany śmiarotny prysud.
Taksama siońnia stała viadoma, što Palinu etapavali z homielskaha SIZA-3 u IČU horada Rečycy dla praviadzieńnia «śledčych dziejańniaŭ». Značycca, što ŭ najbližejšyja niekalki tydniaŭ, albo navat miesiacaŭ da suda, Palina budzie ŭtrymlivacca tam. Umovy ŭ rečyckim IČU navat horšyja za kamiery ŠIZA ŭ kałonii.
Tam nie vydajuć matracaŭ, u kamierach adsutničajuć prybiralnia, i vielmi šmat kłapoŭ. Spać davodzicca na padłozie. U minułym hodzie Palinu taksama trymali tam niekalki tydniaŭ. Pratestujučy suprać žudasnych umoŭ utrymańnia, Palina tady abjaŭlała haładoŭku. Łukašysty byli vymušanyja pajści na sastupki i viarnuli tady Palinu ŭ homielskaje SIZA-3 da sudu. Etap u rečyckaje IČU nie maje nijakaha sensu, akramia taho kab źniavažyć i źniasilić Palinu, padarvać i da taho słaboje zdaroŭje.
Palina pavinna była vyjści na volu ŭžo dva z pałovaj hady tamu. Za čas źniavoleńnia jana praviała ŭ žachlivych umovach štrafnoha izalatara i karcara bolš 350 dzion. Jaje pierakidvali šmatdzionnymi etapami bolš dvaccaci razoŭ. Mienavita za kratami ŭ Paliny źjaviłasia nievylečnaje ciažkoje zachvorvańnie — pankreatyt siaredniaj ciažkaści. I zaraz čakaje čaćviorty sud i čaćviortaje koła piekła, jakich Palina prosta nie vytrymaje», — napisaŭ Andrej.
Jon kaža, što Palinu treba ratavać.
«Jaje žyćcio sapraŭdy ŭ niebiaśpiecy. Tamu prašu srodki masavaj infarmacyi, pravaabarončyja arhanizacyi ab raspaŭsiudžvańni infarmacyi i patrabavańni vyzvaleńnia Paliny dla akazańnia joj patrebnaj miedyčnaj dapamohi», — napisaŭ jon.
***
Palinu Šarendu-Panasiuk zatrymali ŭ pačatku studzienia 2021 hoda ŭ Bieraści, u jejnym domie. U červieni 2021 hoda sud Maskoŭskaha rajona horada pryhavaryŭ žančynu da 2 hadoŭ kałonii pavodle art. 364 («hvałt u dačynieńni supracoŭnika orhanaŭ unutranych spraŭ»), 369 («abraza pradstaŭnika ŭłady») i 368 («abraza Łukašenki») KK.
U krasaviku 2022 hoda palitźniavolenuju pryhavaryli jašče da adnaho hoda źniavoleńnia pavodle č. 1 art. 411 KK, u kastryčniku 2023-ha — jašče da adnaho hoda pavodle taho ž artykuła.
Palina Šarenda-Panasiuk musiła vyjści na volu ŭ kancy maja 2024 hoda, ale suprać jaje była zaviedzienaja novaja kryminalnaja sprava. U pačatku lipienia jaje adpraŭlali na ekśpiertyzu ŭ Centr sudovych ekśpiertyz u Navinkach, ale «ekśpiertyza skončyłasia, tak i nie pačaŭšysia».