Ноччу ў Беларусь заляцелі восем дронаў. Адзін амаль дабраўся да мяжы з Літвой
І ці не ўпершыню ў Беларусь заляцеў разведвальны Supercam.
07.09.2024 / 14:38
Беларускі Гаюн
Мінімум восем дронаў зайшлі ўначы ў Беларусь — адзін «шахед» знаходзіўся за 70 км ад мяжы з Літвой, паведамляе Беларускі Гаюн.
За ноч на 7 верасня на тэрыторыю Беларусі заляцелі не менш за 7 дронаў-камікадзэ тыпу «шахед» і, як мяркуецца, упершыню зайшоў таксама адзін разведвальны расійскі БПЛА тыпу Supercam.
Першы «шахед» зайшоў з Чарнігаўскай вобласці Украіны ў напрамку Лоева каля 23:20 і ўжо праз 40 хвілін вылецеў назад ва Украіну ў напрамку Кіеўскага вадасховішча.
Далейшыя заходы «шахедаў» былі прыкладна ў 02:45, 03:10, 03:37, 03:49, 05:16, 05:54. А каля 08:13 у Беларусь заляцеў разведвальны БПЛА тыпу Supercam.
Акрамя заходаў у Гомельскую вобласць, мінулай ноччу адзін з «шахедаў» заляцеў і ў Брэсцкую вобласць каля 05:16 у раёне Пінска і працягнуў рух на поўнач.
Дадзены «шахед» зайшоў у Гродзенскую вобласць (упершыню за ўвесь маніторынг) і даляцеў да самых Карэлічаў і Навагрудка, трымаючы курс у напрамку мяжы з Літвой. Гэны шахед мог праляцець над Беларуссю на поўнач каля 200 км, што з ім здаралася далей — невядома.
На працягу ўсёй ночы ў небе над Беларуссю працавалі знішчальнікі і верталёты ВПС РБ.
Усяго знішчальнікі ВПС РБ узляталі з аэрадрома Баранавічы 4 разы, а верталёты з Мачулішчаў падымаліся двойчы. Авіяцыя была заўважаная не толькі на поўдні краіны, але таксама і на самай поўначы — у раёне Астраўца і Вілейкі, што можа казаць пра тое, што да поўначы краіны мог даляцець не адзін, а два «шахеды».