U Varoniežy buduć sudzić biełarusa, jaki «ździejśniŭ dyviersiju suprać Rasii»
Jamu pahražaje da 20 hadoŭ turmy.
11.09.2024 / 13:22
Videa zatrymańnia biełarusa. Skrynšot videa TASS
U Varoniežskim abłasnym sudzie rychtujecca da razhladu kryminalnaja sprava, zaviedzienaja ŭ dačynieńni da 26-hadovaha hramadzianina Biełarusi, pišuć «Mocnyja naviny».
Małady mužčyna abvinavačvajecca ŭ ździajśnieńni dyviersii ŭ Tulskaj i Varoniežskaj abłaściach u lutym 2024 hoda. Dziejańni biełarusa kvalifikavanyja śledstvam, jak «padpał, nakiravany na paškodžańnie abjektaŭ transpartnaj infrastruktury ŭ metach padryvu ekanamičnaj biaśpieki i abaranazdolnaści Rasijskaj Fiederacyi, a taksama zamach na ŭčynieńnie dyviersii, heta značyć padpału, nakiravanaha na paškodžańnie abjektaŭ žyćciazdolnaści nasielnictva ŭ metach padryvu ekanamičnaj biaśpieki Rasijskaj Fiederacyi».
Pieršaja častka abvinavačvańnia tyčycca padziei, jakaja adbyłasia ŭviečary 6 lutaha, kali ŭ Tule zaharełasia ciahavaja elektrapadstancyja AT «Tulskija haradskija elektrasietki». Tady abhareli častka ściany i dźviery, paciarpiełych nie było.
Praź niekalki dzion pres-słužba FSB paviedamiła ab zatrymańni ŭ Varoniežy hramadzianina Biełarusi 1998 hoda naradžeńnia, jaki nibyta ździejśniŭ dyviersiju «pa zadańni ŭkrainskich śpiecsłužbaŭ».
«5 lutaha 2024 h. pa zadańni [supracoŭnika ŭkrainskich śpiecsłužbaŭ] «Juryja» fihurant prybyŭ u h. Tułu, dzie vyrabiŭ samarobnuju zapalnuju pryładu i ažyćciaviŭ padpał elektrapadstancyi», — śćviardžałasia ŭ pres-relizie FSB.
Rasijskaja śpiecsłužba śćviardžała, što dyviersantu pieraviali hrošy i dali novaje zadańnie — adpravicca ŭ Varoniež «dla ździajśnieńnia padpałaŭ transfarmatarnaj elektrapadstancyi i pompavaj stancyi». Tam jaho i zatrymali z tryma hatovymi da ŭžyvańnia zapalnymi sumiesiami. Adsiul i druhaja častka abvinavačvańnia — zamach na ździajśnieńnie dyviersii. U mabilnym telefonie biełarusa znajšli pierapisku z kurataram.
Pieršaje sudovaje pasiadžeńnie pavinna było adbycca 2 vieraśnia, adnak, jak paviedamlajuć varoniežskija ŚMI, razhlad spravy adkłali ŭ suviazi z tym, što fihuranta jašče nie etapavali ŭ Varoniež z Tuły.
Biełarusu pahražaje pazbaŭleńnie voli na termin ad 10 da 20 hadoŭ.