U Hrodzienskim harnizonie farmirujecca zienitny rakietny połk
U składzie Zachodniaha apieratyŭnaha kamandavańnia (ZAK) farmujecca novaje padraździaleńnie — Zienitny rakietny połk (vajskovaj SPA), v/č 96871, piša Biełaruski Hajun.
11.09.2024 / 15:37
Zadača padraździaleńniaŭ vajskovaj SPA — prykryćcio vojskaŭ ad dziejańniaŭ srodkaŭ pavietranaha napadu praciŭnika pry viadzieńni bajavych dziejańniaŭ ahulnavajskovymi abjadnańniami i złučeńniami.
Vajskovy haradok №99 «Višniaviec» u Hrodnie / Google Earth
Viadoma, što połk budzie dysłakavacca ŭ vajennym haradku № 99 «Višniaviec» (Hrodna, vuł.Słavinskaha, 2/1). Dla hetaha idzie padrychtoŭka adpaviednaj infrastruktury. Nie vyklučana, što ŭ budučyni v/č 96871 źmienić punkt pastajannaj dysłakacyi.
Zaraz u vajennym haradku № 99 «Višniaviec» užo raskvataravanyja padraździaleńni ZAK: adzin z bataljonaŭ 557-j inžyniernaj bryhady, 74-y asobny połk suviazi, 250-y asobny bataljon achovy i absłuhoŭvańnia, 22-ja asobnaja rota śpiecyjalnaha pryznačeńnia, a taksama Hrodzienskaja vajennaja kamiendatura (apošniaja ŭ skład ZAK nie ŭvachodzić).
Vybar miesca raźmiaščeńnia pałka nie źjaŭlajecca vypadkovym. Tak, da svajho rasfarmiravańnia ŭ 2011 h.u vajennym haradku № 99 «Višniaviec» dysłakavałasia 62-ja zienitnaja rakietnaja bryhada VS RB (v/č 16377, na ŭzbrajeńni — ZRK «Asa»).
Ab uzbrajeńni, jakoje atrymaje v/č 96871, pakul ničoha nieviadoma. Zychodziačy sa svajho pryznačeńnia (vajskovaja SPA) jość zdahadku, što połk atrymaje ZRK «Asa-AKM» abo jaho madernizavanyja na pradpryjemstvach biełaruskaha VPK viersii (ZRK «Asa—1b», ZRK «Asa—2b»).
U struktury kožnaha apieratyŭnaha kamandavańnia Suchaputnych vojskaŭ US RB jość zienitny rakietny połk. Tak, u skład ZAK uvachodzić 147-y zienitny rakietny połk (v/č 96869, Babrujsk). Na ŭzbrajeńni pałka znachodzicca ZRK «Asa-AKM».