Zialenski abmierkavaŭ ź Blinkienam i Łemi pytańnie ŭdaraŭ pa Rasii dalnabojnaj zbrojaj. Vialikabrytanija ŭžo zhodnaja?
Prezident Ukrainy Uładzimir Zialenski sustreŭsia ŭ Kijevie ź dziaržaŭnym sakratarom ZŠA Entani Blinkienam i ministram zamiežnych spraŭ Vialikabrytanii Devidam Łemi. Siarod inšych pytańniaŭ abmiarkoŭvałasia sprava atrymańnia dazvołu na praviadzieńnie ŭdaraŭ zachodniaj dalnabojnaj zbrojaj pa terytoryi Rasii.
11.09.2024 / 22:08
Źleva naprava — Entani Blinkien, Uładzimir Zialenski i Devid Łemi. Fota: AP Photo/Mark Schiefelbein, Pool
Zialenski nazvaŭ praviedzienuju razmovu «vielmi źmiastoŭnaj i praciahłaj» i adznačyŭ, što padčas jaje atrymałasia abmierkavać «usie klučavyja pytańni» — u tym liku i dalnabojnuju zbroju.
Entani Blinkien, u svaju čarhu, paabiacaŭ pieradać prezidentu ZŠA Džo Bajdenu pažadańni ŭkrainskich uładaŭ adnosna ŭdaraŭ amierykanskaj zbrojaj pa terytoryi Rasii.
U toj ža čas hazieta The Guardian paviedamiła, što Vialikabrytanija nibyta ŭžo vyrašyła dazvolić Ukrainie nanosić udary svaimi dalnabojnymi rakietami Storm Shadow pa rasijskaj terytory.
Vydańnie sa spasyłkaj na krynicy va ŭradzie piša, što, niahledziačy na toje, što rašeńnie ŭžo pryniataje, pra jaho ŭsio ž nie buduć abviaščać u piatnicu pa vynikach sustrečy brytanskaha premjera Kira Starmiera z prezidentam ZŠA Džo Bajdenam.
Pa słovach surazmoŭcaŭ haziety, sumiesny vizit Blinkiena i Łemi ŭ Kijeŭ uvohule nie adbyŭsia b, kali b stanoŭčaha rašeńnia pa vykarystańni zachodnich dalnabojnych rakiet dla ŭdaraŭ pa terytoryi Rasii nie było pryniata.
ZŠA hatovyja dazvolić Ukrainie ŭdary dalnabojnymi rakietami pa Rasii
Były ministr abarony Vialikabrytanii prapanavaŭ vystavić ultymatum Pucinu
ZŠA ŭzhadnili pieradaču Ukrainie kryłatych rakiet vialikaj dalokaści dla F-16 — Reuters