«Ci nie zašmat vy na siabie ŭziali?» Cichanoŭskaja adkazała na vostryja pytańni pra status Nacyjanalnaj lidarki
Padčas kanfierencyi «Novaja Biełaruś» Kaardynacyjnaja rada, Abjadnany Pierachodny Kabiniet i Ofis Śviatłany Cichanoŭskaj padpisali pratakoł uzajemadziejańnia. Tam byŭ zamacavany status Nacyjanalnaj lidarki, što vyklikała burnyja abmierkavańni. Śviatłana Cichanoŭskaja vybrała samyja vostryja i raspaŭsiudžanyja pytańni i dała na ich adkazy.
12.09.2024 / 12:55
Śviatłana Cichanoŭskaja. Fota: ofis palityka
Vaš status u dakumientach paznačany jak «Nacyjanalnaja lidarka»? Ci nie zanadta šmat vy na siabie ŭziali?
Ja stała lidarkaj, bo biełarusy prahałasavali za mianie i maju prahramu ŭ 2020 hodzie. Paśla abrańnia ja abiacała pravieści novyja sumlennyja vybary prezidenta krainy. Biełarusy mianie padtrymali, adnak były prezident, jaki straciŭ paŭnamoctvy, nie pryznaŭ volu vybarščykaŭ — i za košt siłavoha ŭmiašalnictva dy hvałtu zachapiŭ uładu nasupierak voli ludziej.
Moj abaviazak — vykanać abiacańni i damahčysia svabodnych i spraviadlivych vybaraŭ u Biełarusi. Ja nie budu brać u ich udzieł, a paśla zakančeńnia kampanii pavinšuju pieramožcu i pieradam jamu lidarskija funkcyi.
Vas padtrymała bolšaść? Niešta ja nie pamiataju inaŭhuracyi!
Majoj metaj nikoli nie była ŭłada — vyklučna vykanańnie svajho abiacańnia. Toje, što za mianie na vybarach prahałasavała bolšaść, viedajuć usie — navat Łukašenka. U inšym vypadku svaju niezakonnuju inaŭhuracyju jon nie pravodziŭ by tajemna — «zaprošanyja» na cyrymoniju ludzi navat nie viedali, kudy i navošta jany jeduć.
Na padstavie danych płatformy «Hołas», a taksama analizu dastupnych pratakołaŭ vybarčych kamisij, atrymałasia vyjavić falsifikacyi i z vysokaj vierahodnaściu sprahnazavać sapraŭdnyja vyniki.
Mianie padtrymali miljony biełarusaŭ, adnak paśla vybaraŭ mianie faktyčna departavali ź Biełarusi ŭ Litvu. Pravodzić inaŭhuracyju ci nie — pytańnie, nad jakim my surjozna dumali, railisia z aŭtarytetnymi ekśpiertami i palitykami. U vyniku vyrašyli hetaha nie rabić. Adnak zmahacca za vykanańnie abiacańnia ja praciahvaju — i ŭ hetym zmahańni adčuvaju padtrymku biełarusaŭ.
A chiba možna čałavieka «pryznačyć» lidaram?
Pryznačyć nie, pryznać — tak. I heta pryznańnie — nie nazaŭždy, svajo lidarstva treba dakazvać štodziennaj pracaj.
I što, vy pram-taki kiniecie ŭsio — pajezdki, sustrečy, kiraŭnictva Ofisam — i sydziecie z palityki, kali źjavicca novy lidar ci lidary?
Lidary jość i zaraz. Niaŭžo vy miarkujecie, što ŭ demakratyčnym ruchu tolki adzin lidar?
Ja pierastanu kiravać Ofisam, brać udzieł u pajezdkach dy sustrečach pry dasiahnieńni mety — svabodnych demakratyčnych vybaraŭ u Biełarusi. U hetym vypadku maja misija i misija Ofisa budzie vykanana. A ŭ Biełarusi źjavicca sapraŭdny prezident, a nie złodziej, jaki skraŭ u ludziej ich vybar.
Ja nie razumieju: vybary-2025 u Biełarusi niejak paŭpłyvajuć na vaš status?
Kali b našyja hramadzianie zmahli realizavać svajo prava na svabodny vybar, to, biezumoŭna, tak.
Majoj asnoŭnaj metaj źjaŭlajecca praviadzieńnie svabodnych i sumlennych vybaraŭ. Ale dla hetaha treba spynić represii, vyzvalić palitviaźniaŭ, źniać abmiežavańni na mahčymaści stać kandydatam u prezidenty i zabiaśpiečyć sumlenny padlik hałasoŭ, a taksama admianić zabaronu na pracu niezaležnych miedyja.
Na žal, takija ŭmovy ŭ Biełarusi pakul nie stvoranyja. A imitacyju vybaraŭ biez sapraŭdnaha padliku hałasoŭ nie pryznaju nie tolki ja — jaje nie pryznaje biełaruskaje hramadstva.
To bok, kali sapraŭdnyja vybary ŭ 2025 hodzie nie adbuducca, Vy budziecie lidarkaj biaskonca?
U takim vypadku ja praciahnu svaju spravu.
Majo najvialikšaje žadańnie — jak maha chutčej pravieści ŭ Biełarusi sapraŭdnyja sumlennyja vybary i realizavać volu vybarščykaŭ. Ja chaču, kab vyjšli na volu i byli reabilitavanyja palitźniavolenyja. Kab tyja, chto vymušana pakinuŭ Biełaruś, mahli viarnucca damoŭ. Jak tolki damožamsia hetych metaŭ, ja ź lohkaj dušoj pieradam usie paŭnamoctvy tym, kaho abiare narod.
A što rabić z tym, što navat vašy paplečniki ŭžo ŭsłych kažuć: mandat Cichanoŭskaj skančvajecca 9 žniŭnia 2025 hoda?
Ja čuju tych, chto nastojvaje: status lidara treba paćvierdzić. Heta pravilna — i ja hatovaja da abmierkavańnia idej i prapanoŭ, što dazvolać nam razam abaranić niezaležnaść Biełarusi i damahčysia pierachodu jaje da demakratyi.
Ale pakul takija pracedury nie ažyćciavić, adkaznaść za našych ludziej i abaronu ich intaresaŭ zastajecca na mnie. U mianie jość hołas i mahčymaść havaryć ad imia demakratyčna nastrojenych biełarusaŭ, padymać pytańni palitviaźniaŭ, padtrymki miedyjam i pravaabaroncam. I ja vielmi ŭdziačnaja kožnamu i kožnaj, chto dapamahaje razam damahacca našaj ahulnaj mety — niezaležnaj i demakratyčnaj Biełarusi.