Va Ukrainie biełaruskaha dobraachvotnika pakarali ŭmoŭnym terminam za chulihanstva z vykarystańniem zbroi
Biełaruskamu dobraachvotniku pryznačyli minimalnaje pakarańnie, piša Radyjo Svaboda.
12.09.2024 / 12:56
Lubarski rajonny sud Žytomirskaj vobłaści zasudziŭ na try hady pazbaŭleńnia voli z adterminavańniem vykanańnia pakarańnia na adzin hod hramadzianina Biełarusi, vajskoŭca Zamiežnaha lehijonu (padparadkoŭvajecca Hałoŭnamu ŭpraŭleńniu vyviedki Ministerstva abarony Ŭkrainy) za chulihanstva z vykarystańniem zbroi.
Jak adznačajecca ŭ vyraku, jaki maje ŭ svaim rasparadžeńni Svaboda, biełarus taksama pavinien vypłacić 12116 hryŭniaŭ (pryblizna 300 dalaraŭ u ekvivalencie) za ekspertyzy, što pravodzili ŭ miežach śledztva.
Biełarusa abvinavacili ŭ hrubym parušeńni hramadzkaha paradku «z matyvaŭ jaŭnaj niepavahi da hramadztva, jakoje supravadžałasia asablivaj dziorzkaściu abo vyklučnym cynizmam z vykarystańniem ahniastrelnaj abo chałodnaj zbroi». Hetaje złačynstva, pavodle č. 4 artykułu 296 Kryminalnaha kodeksu Ŭkrainy, praduhledžvała pakarańnie ŭ vyhladzie pazbaŭleńnia voli na termin ad 3 da 7 hadoŭ. Biełaruskamu dobraachvotniku pryznačyli minimalnaje pakarańnie.
Paviedamlajuć, što jon «całkam pryznaŭ svaju vinu», «vykazaŭ škadavańnie» ab svaim učynku i «ščyra pakajaŭsia».
Biełaruski hramadzianin, proźvišča jakoha nie nazyvajecca, u pačatku krasavika 2022 hodu dobraachvotna pajšoŭ na słužbu va Ŭzbrojenyja siły Ŭkrainy i na momant aryštu słužyŭ u Zamiežnym lehijonie, što padparadkoŭvajecca Hałoŭnamu ŭpraŭleńniu vyviedki Ministerstva abarony Ŭkrainy. Paźniej jaho vyzvalili pad hrašovy zakład.
Hramadzianinu Biełarusi na momant zatrymańnia było 37 hadoŭ, da vajny jon razam z žonkaj, hramadziankaj Ukrainy, i małaletniaj dačkoj žyŭ u Kijevie. Za ŭdzieł u bajavych dziejańniach atrymaŭ uznaharodu Ministerstva abarony Ŭkrainy.
Što adbyłosia
Biełarusu inkryminavali napad na ŭłaśnika hatelu «Zołotie Runo» ŭ siale Stary Lubar Žytomirskaha rajonu Žytomirskaj vobłaści, naniasieńnie jamu cialesnych paškodžańniaŭ i zapałochvańnie zbrojaj.
U padazreńni, vystaŭlenym hramadzianinu Biełarusi, adznačałasia, što toj, realizujučy svoj «złačynny namier», dziejničajučy «z asablivaj dziorzkaściu», padyšoŭ da ŭłaśnika hatelu i biespadstaŭna nanios pravaj rukoj niekalki ŭdaraŭ pa tvary, tułavie i hałavie.
Potym, pavodle śledztva, jany vyjšli razam na vulicu i biełaruski dobraachvotnik «praciahnuŭ złačynnyja dziejańni, hruba parušajučy elementarnyja praviły pavodzinaŭ u hramadzkim miescy, maral i prystojnaść, z matyvaŭ vidavočnaj niepavahi da hramadztva, pavodziŭ siabie nachabna i imknuŭsia da samavyjaŭleńnia», try razy streliŭ u pavietra z tabelnaha pistaleta Glock-17.
Incydent adbyŭsia 11 śniežnia 2023 hodu pryblizna a 21-j hadzinie. Śledčyja taksama śćviardžali, što hramadzianin Biełarusi znachodziŭsia ŭ stanie alkaholnaha apjanieńnia.
Na padjeździe da pasiołku Lubar u biełaruskaha dobraachvotnika złamaŭsia aŭtamabil. Jaho adbuksavali da hatelu «Zołotie Runo». Tam ža jon apłaciŭ za numar, ale, pakolki pakoj byŭ nieprybrany, paprasiŭ hatelnaha supracoŭnika pierasialić jaho ŭ inšy. Toj nie pahadziŭsia i vyklikaŭ ułaśnika hatelu. Haspadar hatelu pastaviŭsia da jaho z pahardaj, i biełarus jaho adšturchnuŭ, a kali ŭžo vyjšli na vulicu i haspadar hatelu pačaŭ jamu pahražać i niešta šukać u kišeniach svajoj kurtki, to dastaŭ svoj pistalet i try razy streliŭ u pavietra, kab pakazać, što ŭ jaho jość zbroja, i takim čynam spynić eskalacyju kanfliktu.
Biełaruski dobraachvotnik pierakonvaŭ śledčych, što kanflikt spravakavaŭ paciarpieły, a svaje pavodziny jon patłumačyŭ reakcyjaj na abrazu i adčuvańnie pahrozy z boku haspadara hatelu.