Miažu Łatvii z boku Biełarusi pierasiek nieapaznany latajučy abjekt, byli padniatyja źniščalniki NATA
U aŭtorak, kala 9 hadzin ranicy, Pavietranyja siły Łatvii zafiksavali niepadalok ad dziaržaŭnaj miažy ź Biełaruśsiu nieapaznany latajučy abjekt, jaki nabliziŭsia da łatvijska-biełaruskaj miažy i pierasiok jaje na terytoryi Krasłaŭskaha kraju, piša Delfi.lv.
17.09.2024 / 13:55
Dla ahladu hetaha rehijonu ŭ pavietra byli padniatyja źniščalniki misii NATA ŭ patrulavańni pavietranaj prastory z vajskovaj bazy ŭ Lijełvardzie. U łatvijskaj pavietranaj prastory padazronych abjektaŭ vyjaŭlena nie było. Samaloty NATA viarnulisia na miesca svajoj dysłakacyi.
Ab tym, što adbyłosia, byli prainfarmavanyja kiraŭniki samakiravańniaŭ Łathalskaha płanirovačnaha rehijonu.
Raniej paviedamlałasia, što nacyjanalnyja ŭzbrojenyja siły (NUS) Łatvii dadatkova ŭzmacnili mahčymaści supraćpavietranaj abarony na ŭschodniaj miažy, adpraviŭšy tudy dadatkovyja padraździaleńni. Łatvija praciahvaje zabiaśpiečvać abaronu źniešnich miežaŭ Jeŭrapiejskaha Sajuza i NATA.