Maci traich dziaciej Durava nazvała Telegram sumiesna nažytaj majomaściu i namiaknuła, što moža padać u sud
Iryna Bołhar u kancy žniŭnia zajaviła, što Durava pazbavili baćkoŭskich pravoŭ u Šviejcaryi. Tady ž jana padała ŭ sud na alimienty.
18.09.2024 / 15:13
Pavieł Duraŭ ź Irynaj Bołhar i dziećmi. Fota: missbolgar / Instagram
Iryna Bołhar nazyvaje siabie maci traich dziaciej Paŭła Durava. Pavodle jaje słoŭ, jany paznajomilisia letam 2012 hoda, a praz paŭhoda stali žyć razam.
U śniežni 2013-ha ŭ pary naradziłasia dačka Leja, u studzieni 2016 hoda — syn Daniel, a ŭ vieraśni 2017-ha — syn David. Bołhar śćviardžaje, što hetyja dzieci narodžanyja ad Paŭła Durava.
Nie tak daŭno žančyna padavała pazovy ŭ šviejcarski sud — ab vypłacie alimientaŭ i chatnim hvałcie. Ale, zdajecca, heta nie miaža.
Bołhar zamachnułasia, ni mnoha ni mała, na Telegram. U vializnym zapisie ŭ Instagram jana nazvała kampaniju «supolna nažytaj majomaściu».
Žančyna śćviardžaje, što była ŭ adnosinach z Duravym 10 hadoŭ. Rehistravać šlub, pavodle jaje słoŭ, Duraŭ nie chacieŭ, i ŭsia majomaść, nažytaja za hety čas, zapisvaŭ vyklučna na siabie.
«Usie značnyja siamiejnyja aktyvy byli zarehistravanyja na jaho imia. Ja mieła da ich dostup praz pahadnieńni i davieranaści, jakija, choć i dazvalali ich vykarystoŭvać, nie całkam abaraniali maje pravy i intaresy i, jak akazałasia, mahli być parušanyja ŭ luby momant.
Mnie pastajanna davali zapeŭnivańni i abiacańni, jakim ja ščyra vieryła, što ŭ mianie i maich dziaciej zaŭsiody budzie dostup da našych siamiejnych resursaŭ, niahledziačy na toje, što naš šlub nie byŭ aficyjna zarehistravany, a sumiesna nažytaja majomaść, uklučajučy hałoŭny aktyŭ — miesiendžar Telegram — byŭ zarehistravany vyklučna na jaho imia. Ja taksama daviarała jaho abiacańniam i zapeŭnieńniam, što dla dziaciej buduć stvorany trastavyja fondy, jakija harantujuć ich finansavuju biaśpieku», — adznačyła Bołhar.
Pavodle jaje słoŭ, niekalki hadoŭ para vydatkavała na pošuk darahoj nieruchomaści, jakaja mahła b stać prydatnym i pastajannym domam dla dziaciej, ale hetaja nieruchomaść tak i nie była nabytaja dla Bołhar i jaje dziaciej.
«U mianie byli zavieranyja nataryusam biesterminovyja pahadnieńni na majo imia, jakija dajuć mnie dostup da bankaŭskich rachunkach i jakija dajuć prava arandavać lubuju nieruchomaść z abaviazacielstvam spadara Durkva pakryvać arendu biez časovych abmiežavańniaŭ i biez abmiežavańniaŭ pa sumie arendy.
Usie našy vusnyja i piśmovyja damoŭlenaści byli im parušanyja, a abiacańni zastalisia niavykananymi», — zajaviła žančyna.
Bałharaŭ namiaknuła, što moža padać u sud na pryznańnie šlubu aficyjnym i padzieł majomaści.
«Ź jurydyčnaha punktu hledžańnia, u niekatorych krainach niezarehistravanyja adnosiny razhladajucca jak aficyjnyja šluby ŭ dačynieńni da majomasnych pravoŭ. U inšych krainach jość mahčymaść pryznańnia faktyčnaha šlubu aficyjnym. U inšych krainach možna patrabavać dolu sumiesna nažytaj majomaści pa hramadzianskaj zakanadaŭstvu», — ličyć Bołhar.
U zaklučeńnie žančyna parazvažała ab nieabchodnaści nadańnia jurydyčnaha statusu niezarehistravanym adnosinam.
«U sučasnym śviecie, dzie instytut šlubu stanovicca mienš aktualnym, uźnikaje ŭsio bolšaja nieabchodnaść u zabieśpiačeńni pravavoj abarony ŭdzielnikaŭ faktyčnych siamiejnych adnosin. I pakul niekatoryja krainy ŭžo vyrašyli hetuju prablemu, u inšych ludziam davodzicca zmahacca za svaje pravy ŭ sudzie», — adznačyła Bołhar.
Sam Pavieł Duraŭ publična nie kamientavaŭ vykazvańni žančyny, a taksama jaje sudovyja pazovy. Ciapier pradprymalnik znachodzicca pad sudovym nahladam u Paryžy.