Kamunist sa Škłova, u jakoha dzieci-vunderkindy ŭ 8-9 hadoŭ pastupajuć u VNU. Chto taki Jaŭhien Cieplakoŭ?
Jaŭhien Cieplakoŭ, jaki choča daryć śvietu hienijaŭ optam, asoba supiarečlivaja. Jon maje svoj padychod i da adukacyi dziaciej, i da stvareńnia siamji — bo kali dziaŭčaty ŭ 15 hadoŭ mohuć skončyć univiersitet, to i dziaciej možna pačać naradžać u hetym uzroście.
21.09.2024 / 22:23
Siamja Cieplakovych u 2021 hodzie. Fota: e1.ru
Zorkaj ŚMI roznych krain Jaŭhien Cieplakoŭ staŭ u 2021 hodzie, kali jaho starejšaja dačka Alisa va ŭzroście 9 hadoŭ pastupiła ŭ Maskoŭski dziaržaŭny ŭniviersitet imia Łamanosava vučycca na psichołaha. Na płatnaje — ale vynik usio adno ŭražvaje, uličvajučy toj fakt, što adnahodki dziaŭčynki vučylisia ŭ trecim kłasie.
Paśla hetaha siamja Cieplakovych litaralna kupajecca va ŭvazie. Niechta zachaplajecca addanaściu baćkoŭ i tym, jak jany zajmajucca dziećmi, niechta krytykuje za toje, što ŭ małych zabrali dziacinstva.
Ale što ž adbyvałasia da hetaha?
Naradziŭsia ŭ Škłovie, pieramahaŭ u alimpijadach pa biełaruskaj movie (i nie tolki)
U intervju mužčyna raskazvaŭ, što naradziŭsia ŭ Škłovie i skončyŭ tam pieršyja dzieviać kłasaŭ škoły.
— U vośmym ci ŭ dziaviatym kłasie vyjhraŭ školny etap [alimpijady] pa ŭsich pradmietach: ruskaja mova, biełaruskaja mova, ruskaja litaratura, biełaruskaja litaratura, hieahrafija, bijałohija, historyja. Heta była «absalutka» — absalutnaje pieršaje miesca. Usiaho dzieviać pradmietaŭ, dzieviać pieršych miescaŭ. U kłasie mnie rabić nie było čaho. Ja prosta čakaŭ, pakul astatnija mianie dahoniać.
Darečy, u pracesie taho intervju vyśvietliłasia, što Jaŭhien nie lubić tvorčaść Lva Tałstoha i z zadavalnieńniem vykinuŭ by «Vajnu i mir» sa školnaj prahramy.
Ci sapraŭdy Jaŭhien u školnyja hady byŭ vydatnikam? Heta ŭzialisia vyśvietlić žurnalisty vydańnia «Kamsamolskaja praŭda Sankt-Pieciarburh». Jany daviedalisia, što mužčyna vučyŭsia ŭ škole №4 Škłova. A voś što raskazała tahačasnaja dyrektarka navučalnaj ustanovy Alena Harbačeŭskaja (jana ŭdakładniła, što niekali vykładała ŭ Jaŭhiena hieahrafiju).
— Heta sapraŭdy było adoranaje dzicia, hałoŭnaje — pa ŭsich pradmietach! Jon schoplivaŭ źlotu, mieŭ niestandartny pohlad na ŭsio. Byŭ kruhłym vydatnikam, jaho mama, darečy, taksama skončyła škołu z załatym miedalom. Tak što Alisie jość u kaho być talenavitaj.
Fota: pb.kp.ru
Kłasnaja kiraŭnica Jaŭhiena Halina Dadyka kazała pra byłoha vučnia šmat pryjemnaha.
— U Ženi ŭ škole była mianuška «chadziačaja encykłapiedyja», tamu što jon vyjhravaŭ u nas va ŭsich alimpijadach, konkursach. Uvohule, jon byŭ zorkaj našaj škoły. Jon viedaŭ usio i pa ŭsich pradmietach. I ŭsie pradmiety byli ŭ jaho lubimymi. Jon vielmi šmat čytaŭ, dziakujučy hetamu apiaredžvaŭ u raźvićci svaich adnahodkaŭ i moh raskazać pra ŭsio, što b u jaho ni spytali.
Halina Dadyka taksama zhadała, što chłopiec žyŭ z babulaj (a adnakłaśniki dadali, što baćki, zdajecca, pracavali ŭ Maskvie). Žančyna ličyła, što Jaŭhien byŭ takim razumnym ad pryrody, vučycca jaho nichto nie prymušaŭ.
Adnakłaśniki Jaŭhiena kazali, što jaho nielha było nazvać dušoj kampanii, ale i zamknionym školnik taksama nie byŭ.
Škłoŭ — Aktaŭ — Maskva
Potym Jaŭhien z baćkami apynuŭsia ŭ Kazachstanie, bo jany vyrašyli pierajechać da svajakoŭ u horad z ekśpierymientalnaj atamnaj elektrastancyjaj. Dziasiaty i adzinaccaty kłas chłopiec skončyŭ u horadzie Aktaŭ.
Fota: pb.kp.ru
Paśla hetaha dva hady dumaŭ, dzie choča atrymać vyšejšuju adukacyju, i aktyŭna zajmaŭsia sportam. U vyniku vyrašyŭ pastupać u VNU ŭ Maskvie. Jon śćviardžaje, što skončyŭ dva fakultety MDU imia Łamanosava (fakultet psichałohii i fakultet vyličalnaj matematyki i kibiernietyki) z čyrvonymi dypłomami.
U 2014 hodzie Jaŭhien daŭ vialikaje intervju «Anłajnieru». U im mužčyna pachvaliŭsia, što pracavaŭ u maskoŭskich ofisach «Jandeksa» i SAP, mieŭ zarobak $7 tysiač, jaki vyrašyŭ pramianiać na vučobu ŭ Kitai.
Jaŭhien i Natalla Cieplakovy. Fota: onliner.by
U toj momant Jaŭhien byŭ užo žanaty z Natallaj (taksama vypusknicaj MDU), mieŭ dačku Alisu. «Hienij sa Škłova», jak jaho nazvali biełaruskija žurnalisty, kazaŭ, što moh razam z žonkaj dla emihracyi abrać ZŠA ci Kanadu. Ale nie zachacieŭ emihravać u krainu, «jakaja zajmajecca bambiožkami niazhodnych ź joj dziaržaŭ i ładzić revalucyi pa pryncypie zalahańnia nafty». Jaŭhien abraŭ dla svajoj siamji dziaržavu, jakaja buduje sacyjalizm, — Kitaj. Jon vyjhraŭ stypiendyju CAS-TWAS ad Akademii navuk Kitaja.
Asnoŭnym dachodam Jaŭhiena stała stypiendyja pamieram prykładna $1300. Jon kazaŭ u intervju, što na hetyja hrošy možna šykoŭna žyć u Huančžoŭ. Na toj momant pamier stypiendyi sapraŭdy byŭ vyšejšy za siaredni zarobak prykładna ŭ 2,5 raza.
U Kitai ŭ pary naradziŭsia syn Chiejmdal, a potym jašče dźvie dački — Leja i Tera. U Huančžoŭ siamja zdymała kvateru (125 kvadrataŭ) u novym domie, z basiejnam na achoŭnaj terytoryi, z padziemnym parkinham. Cieplakovy mahli dazvolić sabie pryvatny dziciačy sadok i niańku.
Fota: onliner.by
Mužčyna, jaki ŭžo tady nazyvaŭ siabie kamunistam, zachaplaŭsia krainaj. Voś što jon kazaŭ «Anłajnieru», paraŭnoŭvajučy Kitaj ź Biełaruśsiu i Rasijaj:
— Čamu Kitaj u realnym vyražeńni z 1990 hoda vyras u dziesiać razoŭ, a my ŭsio bolš adstajom? Dvaccać hadoŭ tamu siaredniestatystyčny kitajec pracavaŭ za kubak rysu. Ciapier u ich siaredni zarobak $800.
— A z ulikam taho, što ceny ŭ Kitai nižejšyja, čym u Rasii i Biełarusi, to realny zarobak u ich vyšejšy. Nam ža praciahvajuć raskazvać, što kitajcy za $100 pracujuć… Pry hetym u Rasii i Biełarusi idzie realnaje padzieńnie kultury i adukacyi. U škołach vučać usio horš. I na heta zapluščvajuć vočy.
Miarkujučy pa ŭsim, Jaŭhien i Natalla vielmi chacieli zastacca žyć u Kitai. Cieplakoŭ navat apublikavaŭ u svaim ŽŽ zvarot da kitajskich ŚMI, u jakim raskazvaŭ pra ciažkaści, ź jakimi sutykajucca zamiežniki ŭ Kitai.
Alisa Cieplakova ŭ Kitai. Fota: onliner.by
Mužčyna skardziŭsia, što navat praz try hady žyćcia ŭ adnym i tym ža rajonie siamja nie moža spakojna pajści ŭ kramu, bo za 10 chvilin ź imi paprosiać sfatahrafavacca nie mienš za 20 čałaviek, a jašče 5-10 zachoča pahładzić dziaciej pa tvary.
— Našy maleńkija dzieci naradzilisia i vyraśli ŭ Kitai, jany havorać pa-kitajsku, jany dumajuć, što stalica ich radzimy — Piekin. Jany sapraŭdy takija ž, jak usie kitajskija dzieci, akramia koleru vałasoŭ i vačej. Pry hetym kožny sustrečny admovicca razumieć ich, kali jany zahavorać ź im pa-kitajsku, abaviazkova skaža svajo «chałoŭ», abaviazkova pasprabuje sfatahrafavać.
Jaŭhien śćviardžaŭ, što ŭ dziciačym sadočku vychavalniki trymajuć dziaciej zamiežnikaŭ jak maleńki zaapark — jak chatnich pandaŭ ci małpačak.
— Ź imi nichto nie razmaŭlaje, nichto nie choča ich vučyć pa-sapraŭdnamu, usie ličać ich paciešnymi źviarkami. Ich tolki kormiać i ŭkładvajuć spać. Im nikoli nie dajuć adnolkavyja zadańni z kitajskimi dziećmi, ich prymušajuć pisać paŭhoda pa dva ijerohlify kožny dzień, ličačy, što zamiežniki — nie ludzi, i nie zdolnyja vučycca ŭ pryncypie.
U hetym ža zvarocie Jaŭhien pisaŭ:
«Nam vielmi padabajecca Kitaj, my hanarymsia jahonymi navukova-techničnymi, ekanamičnymi i inšymi dasiahnieńniami. My bačym, jak jon mianiaje žyćcio zvyčajnych ludziej da lepšaha ad hoda da hoda. I my b vielmi chacieli dałučycca da kitajskaj mary, i budavać sacyjalizm razam z vami».
Viedaje, jak zrabić «bolš Ejnštejnaŭ»
Zdajecca, ad kitajskaj mary pryjšłosia ŭsio ž admovicca. Siamja — užo z čatyrma dziećmi — viarnułasia ŭ Rasiju ŭ 2017 hodzie. U adnym ź intervju Jaŭhien kazaŭ:
— Z punktu hledžańnia demahrafii ŭ siamji pavinna być chacia b piać dziaciej. Z punktu hledžańnia marali lepš dziesiać.
I da hetaj ličby Cieplakovy ŭpeŭniena nabližajucca. U žniŭni Cieplakoŭ paviedamiŭ pra toje, što ŭ ich naradziłasia dziaviataje dzicia. Chłopčyku dali imia Alryk Finist Alryjon. Akramia jaho, u Jaŭhiena i Natalli jość Chiejmdal, Fiejłunh, Ajłunh, Tesiej, Sulejman, Tera, Leja i Alisa.
Darečy, Jaŭhien aficyjna pracuje vychavacielem dla svaich dziaciej. U Rasii ŭ šmatdzietnych baćkoŭ jość mahčymaść aformić siamiejny dziciačy sadočak (pry ŭmovie, što ŭ siamji adnačasova try dziciaci daškolnaha ŭzrostu). Tamu ciapier Jaŭhien — vychavaciel u siamiejnym dziciačym sadočku «Žuravuška», jaki jon adkryŭ razam z žonkaj. U adnym ź videa jon raskazvaŭ, što jahony zarobak štomiesiac składaje prykładna 1750-2100 biełaruskich rubloŭ.
Usie dzieci Cieplakovych navučajucca vyklučna doma pa aŭtarskich mietodykach baćkoŭ. Starejšaj dačce Alisie (toj samaj, jakaja ŭ 9 hadoŭ pastupiła va ŭniviersitet na psichołaha) užo 12 hadoŭ.
Darečy, sioleta siamihadovaja Tera Cieplakova skončyła 9 kłas. A jaje vaśmihadovaja siastra Leja stała samaj junaj vypusknicaj, skončyŭšy 11 kłasaŭ. Chutčej za ŭsio, jana taksama sprabavała pastupić u MDU, bo dva miesiacy tamu šmatdzietny tata raskazvaŭ, što padavaŭ va ŭniviersitet dakumienty jašče adnaho svajho dziciaci.
Leja Cieplakova atrymlivaje atestat. Skrynšot videa YouTube-błohu «Vučymsia z Alisaj»
U inšym videa Cieplakoŭ kazaŭ, što jahony syn Chiejmdal pastupiŭ va ŭniviersitet va ŭzroście 8 hadoŭ. Ci praciahvaje jon vučobu, zrazumieć składana, bo baćka nie nazyvaje VNU.
Sioleta sajt mogilev.news pisaŭ, što i Alisa, i Chiejmdal — studenty Biełaruska-Rasijskaha ŭniviersiteta, jaki znachodzicca ŭ Mahilovie.
Pavodle infarmacyi vydańnia, Alisa zavočna vučycca pa śpiecyjalnaści «Aŭtamatyzavanyja sistemy apracoŭki infarmacyi», a jaje brat Chiejmdal pa śpiecyjalnaści «Elektronny markietynh» (taksama zavočna). Apublikavali navat fatahrafiju ekzamienacyjnaj viedamaści hrupy. Nieviadoma, ci źjaŭlajecca jana sapraŭdnaj.
Fota: mogilev.news
Ale Cieplakoŭ praź niekalki miesiacaŭ paśla vychadu tekstu zajaviŭ, što jaho dačka «v Biełoruśsii» nikoli nie vučyłasia. Pa jaho słovach, jana praciahvaje navučańnie ŭ MDU.
Dakładna adno: adnosiny ŭ siamji z administracyjaj i vykładčykami MDU składanyja. U YouTube-błohu «Vučymsia z Alisaj» Cieplakoŭ dva miesiacy tamu raskazvaŭ, što jany sudziacca z VNU i dajšli ŭžo da Viarchoŭnaha suda Rasii.
Jaŭhien dapuskaje, što kali ŭ dziaciej układać jašče bolš sił, to jany zmohuć rabicca studentami jašče raniej — u tym uzroście, kali zvyčajna dzieci iduć u pieršy kłas.
U Cieplakova svoj pohlad nie tolki na sistemu adukacyi (jakoj u Rasii jon šalona niezadavoleny), ale i na toje, jakim čynam treba palapšać demahrafičnuju situacyju. Jon źniavažliva vykazvaŭsia pra fieministak, jakija raskrytykavali prapanovu vice-śpikierki Dziarždumy Rasii Hanny Kuźniacovaj naradžać pieršaje dzicia adrazu paśla zakančeńnia škoły.
— Mnohija radykalnyja fieministki stali adrazu kryčać, što naradžać prymušajuć školnic — biednych-niaščasnych. Ale jak vy razumiejecie na prykładzie našaj siamji, školnicami jany źjaŭlajucca tolki tamu, što vy ich vyrakajecie na razumovuju adstałaść, addajučy dziaciej u škołu ŭ 7 hadoŭ. Nichto nie pieraškadžaje ŭziać na ŭzbrajeńnie našy technałohii i paskoryć praces.
Cieplakoŭ nastojvaje, što dzieci mohuć mieć adukacyju ŭzroŭniu mahistratury ŭžo hadoŭ u 15-16.
— Dla realnaha raźvićcia ekanomiki nam patrebny navukova-techničny praryŭ. Nieabchodna pavyšać siaredni ŭzrovień adukacyi ŭ krainie. Kali ŭ vas budzie šmat fizikaŭ vysokaha ŭzroŭniu, siarod ich znojducca Ejnštejny. Kab byli spartsmieny vysokaha ŭzroŭniu, nieabchodny dziciačy sport. Sport vysokich dasiahnieńniaŭ niemahčymy biez masavaha sportu. Saviecki Sajuz heta pakazalna demanstravaŭ. Tamu dla taho, kab kraina išła napierad, treba vysokaja adukacyja, a nie PTV.
U płanie adukacyi Jaŭhien prapanuje raŭniacca na Paŭdniovuju Kareju, Sinhapur, Makaa, Kitaj. Krytykuje jon ZŠA, jakija raźvivajucca za košt taho, što mohuć pryciahvać vysokakvalifikavanych mihrantaŭ z usiaho śvietu.
— Dzicia, jakoje ŭ 15 hadoŭ skončyła VNU, moža — hałoŭnaje słova «moža», bo nichto jaho nie prymušaje — budavać siamju. U toj čas jak u vašaj schiemie niaščasnaja dziaŭčynka, jakaja pastupiła va ŭniviersitet u 18-19 hadoŭ, skončyła bakałaŭryjat i mahistraturu… Voś joj 25 — i napierad naradžać. Jana ŭžo dastatkova staraja. U jaje jość niekatory vopyt u intymnym žyćci.
U 2020 hodzie Jaŭhien Cieplakoŭ sprabavaŭ tłumačyć rasijanam, što adbyvajecca ŭ Biełarusi: «Ja razumieju, vielmi składana pavieryć u toje, što biełaruski NAROD prosta prahałasavaŭ SUPRAĆ Łukašenki, ale heta praŭda»
Cieplakoŭ śćviardžaje, što ŭ takim vypadku na dziaŭčynu budzie cisnuć hramadstva, tamu jana naŭrad ci navažycca naradzić chacia b try-čatyry dziciaci.
— Dziaŭčynie budzie vielmi składana, bo cisnuć buduć frazaj: «Navošta ty vučyłasia? Kab potym u dekrecie siadzieć?!». Navat pra dekret nie skažuć — prosta «Ty nie pracuješ! Nichto ciabie potym na pracu nie voźmie, nikomu ty nie patrebna sa svaim bahažom».
Matematyka ŭ Jaŭhiena prostaja: kali žančyna naradžaje troch dziaciej, jana pravodzić u dekrecie 6-9 hadoŭ, kali čatyroch — 12.
— Kali dziaŭčynka ŭ 18-19 hadoŭ paśla škoły pojdzie ŭ dekret na 12 hadoŭ, heta sapraŭdy mocna ŭdaryć pa situacyi ŭ krainie. Tamu što ŭ dziaŭčynki niama adukacyi, jana nie zmoža dać adukacyju svaim dzieciam, bo ŭ jaje niama kaštoŭnaści adukacyi. Ni pra jaki praryŭ možna i nie maryć. Možna maryć tolki, što my ŭ niejki momant abhonim Zimbabve.
Vyjście Cieplakoŭ bačyć u tym, kab dzieci mieli vyšejšuju adukacyju hadoŭ u 15-16, a potym pačynali zajmacca pytańniami stvareńnia siamji (pažadana, šmatdzietnaj).
Alisa Cieplakova z mamaj Natallaj
Amal kožnaje svajo videa na YouTube Jaŭhien zakančvaje pažadańniem hledačam «naradžać novych Alis».
Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?
«Ja nie Miesi — ja lepšy za jaho». Madrydski «Reał» padpisaŭ 12-hadovaha biełaruskaha futbalista
U Indyi 13-hadovy matacyklist raźbiŭsia na spabornictvach. Jaho nazyvali nadziejaj krainy