«Mianie zvalniali adusiul!» Ciapier za broškami majstrycy haniajucca modnicy, a lusterki kapirujuć na AliExpress
Historyja žyćcia dyzajniera Sašy Barščovaj — natchnialny raskaz ab tym, jak važna słuchać siabie. Ab tym, što nie treba adčajvacca, kali adny, dvoje i navat troje dźviarej začyniajucca adrazu pierad nosam. Saša adznačaje: kali b nie zvalniali adusiul, jana naŭrad ci pačała b stvarać broški i lusterki i naohuł navažyłasia b adkryć nievialiki biźnies.
19.09.2024 / 12:44
Saša Barščova jašče ŭ dziacinstvie zrazumieła, što samaje cikavaje dla jaje — tvorčaść. Čym tolki nie zajmałasia — malavańniem, lepkaj, valeńniem, vyšyŭkaj, kvilinham, dekupažam! I ŭsiamu hetamu vučyłasia sama. Tamu kali nastaŭ čas pastupać u VNU, vybrała tvorčuju prafiesiju — dyzajnier interjera, raskazvaje jaje historyju BiełTA.
Pieršym miescam raboty stała meblevaja firma, paviljon jakoj raźmiaščaŭsia ŭ vialikim handlovym centry. Davodziłasia malavać kuchni, uličvajučy pažadańni zakazčykaŭ i… haspadaroŭ sałona.
«Faktyčna sumiaščała rabotu dyzajniera i mieniedžara. Načalstva, viadoma, było zacikaŭlena, kab ja pradavała klijentam peŭnyja pazicyi. A ja prosta nienavidžu «ŭciuchvać»! I mianie zvolnili», — raskazvaje Saša.
Niadoŭha prapracavała jana i ŭ inšych miescach — firmach pa vytvorčaści šaf-kupe i lustraŭ.
«Ja rada, što tak skłałasia. Kali ja była najomnym rabotnikam, davodziłasia iści za trendami, a na samaj spravie ja zaŭsiody maryła ich dyktavać», — pryznajecca dyzajnier.
I chutka tak i adbyłosia. Saša pačała biznes u nišy, dzie da hetaha času dyktuje trendy. A pačałosia ŭsio vypadkova.
«Pryblizna 12 hadoŭ tamu źjaviłasia navamodnaja źjava — kirmašy i markiety, dzie dyzajniery i majstry mahli pradavać svoj chendmejd. Jany chutka stali papularnymi. Maja siabroŭka-dyzajnier pradavała tam sumki svajoj vytvorčaści. I niejak prapanavała dałučycca da jaje. Ja nalapiła z palimiernaj hliny koniej, tamu što byŭ hod Kania, i ź imi adpraviłasia na markiet. Jany byli nie idealnymi, ale ich usio roŭna chutka raskupili. Heta dało impuls pasprabavać zrabić štości jašče», — uspaminaje Saša.
Chutka jana prydumała svaje firmiennyja broški-kvietki z palimiernaj hliny sa ściobłami z tonkaha šnurka. Takija da hetaha času papularnyja ŭ amatarak unikalnych upryhažeńniaŭ. Majstar zapeŭnivaje, što viedaje siarod svaich pakupnic sapraŭdnych kalekcyjanieraŭ — u ich byvaje pa 30 kvietak.
Kali niezvyčajnyja kvietki pakaryli sercy modnic, vyśvietliłasia, što ŭ ich aŭtara… alerhija na palimiernuju hlinu. Tamu Saša pačała ekśpierymientavać: stvarać raboty ź japonskaj hliny na asnovie vałoknaŭ celułozy, draŭlanyja broški ź bisieram.
A adnojčy vyrašyła pierajści da bolš bujnych form. Tak źjavilisia kazačnyja lusterki ŭ razmalavanaj draŭlanaj apravie.
«Atrymałasia vielmi kłasna. Maje raboty aktyŭna kuplali na roznych sajtach, dzie pradajuć chendmejd. A potym zdaryłasia našumiełaja historyja z AliExpress», — uspaminaje dyzajnier.
Ab tym, što na papularnym kitajskim markietpłejsie pradajuć kopii jaje lusterkaŭ, jana daviedałasia ad adnoj sa svaich padpisčyc. Taja prysłała spasyłku i Saša achnuła: tam vystaŭleny jaje fatahrafii! Roźnica była tolki ŭ canie: za padrobku prasili ŭsiaho Br25, u toj čas jak aryhinał kaštuje minimum u šeść razoŭ daražej.
«Ź cikavaści zakazała adno lusterka. Jano było mienšym, čym majo, bolš tonkim, malunak skažony. Zamiest lusterka — płastmasa. Viadoma, kryŭdna, što AliExpress kapiruje maje idei, pryčym u strašennaj jakaści. Pieražyvała, što ludzi buduć zakazvać na markietpłejsie biazhłuździcu, prymajučy za aŭtarskija raboty, i maja reputacyja pačnie padać. A potym pierastała niepakoicca», — havoryć dyzajnier.
Za 12 hadoŭ jana pabyvała i IP, i ramieśnicaj, i płacielščykam padatku na prafiesijnuju dziejnaść. Adznačaje, što pačynać ź IP było niaprosta: «Pa-pieršaje, davodziłasia samoj kłapacicca pra svaju zarpłatu. Pa-druhoje, akazałasia, što ŭsia buchhałteryja i dakumientaabarot ciapier taksama na mnie. Asabliva nialohka było z zapaŭnieńniem padatkovaj dekłaracyi — ni razu nie ŭdałosia heta zrabić adrazu pravilna. Papiery dla mianie — ciomny les!»
Z ramieśnictvam akazałasia praściej: padatak Br6, nijakich dekłaracyj i inšych dakumientaŭ.
«Spačatku bajałasia, što składana budzie apłačvać: dumała, pačniecca historyja, jak z padatkovymi dekłaracyjami ŭ IP, ale na spravie ŭsio vielmi lohka i zrazumieła. Darečy, narešcie daviedałasia, kolki zarablaju. Nikoli raniej nie viała padlik, a ciapier abaviazana heta rabić. Kali koratka — žyć možna, pryčym niadrenna», — zapeŭnivaje majstar.
«Adkaz mianie prosta ahałomšyŭ — «500 albomaŭ pa 500 uzoraŭ u kožnym, usiaho 250 000 pisanak»