Kolki razoŭ na dzień treba jeści i jak šmat vady pić? Adkaz vas moža ździvić
Viadomy papularyzatar zdarovaha ładu žyćcia, kandydat miedycynskich navuk Andrej Biełavieškin patłumačyŭ, čamu biełarusy pierajadajuć i jak z hetym zmahacca, kolki vady treba pić i ŭ čym sakret daŭhalećcia.
21.09.2024 / 07:00
Aleś Čachoŭski i Andrej Biełavieškin. Skryn videa: AlesChakhouski / YouTube
Parady viadomy biełaruski doktar daŭ u novym vypusku jutub-kanała Alesia Čachoŭskaha «Biełaruski vajb».
Što rabić, kab nie pierajadać?
Biełavieškin tłumačyć, što ŭ asnoŭnym ludzi pačynajuć bolš jeści ŭ zimovy pieryjad, kali mienš sonca, vandrovak, prostych prahułak:
«Ty siadziš doma i tabie banalna sumna. I kab było viesialej, samy prosty, nadziejny sposab — heta niešta padjeści. Tamu ludzi jaduć vielmi šmat i nabirajuć vahu. Asabliva na Kalady i Novy Hod».
Jak tłumačyć ekśpiert, kali čałaviek niekalki dzion zapar pierajadaje, heta całkam łamaje ŭsiu sistemu nasyčeńnia i samarehulacyi (hamieastazu), jakija padtrymlivajuć bałans kałoryj u arhaniźmie, i paśla ŭžo vielmi ciažka spynicca i viarnucca da zvyčajnaha režymu charčavańnia.
«Śviatkavać možna, ale nie bolš za adzin dzień», — daje svaju paradu Biełavieškin.
Kolki razoŭ na dzień jeści
Biełavieškin krytykuje raspaŭsiudžany pohlad ab karyści drobnaha i častaha charčavańnia.
«Jano zasnavana na absalutna nieadekvatnym ujaŭleńni, što čym čaściej ty budzieš jeści, tym bolš razhoniš svoj mietabalizm. Heta całkam hłupstva», — ličyć doktar i rekamienduje:
«Dla mužčyn dva, dla žančyn lepš try razy — norma. I hetaha całkam chapaje. Bolš nie treba. My mienš ruchajemsia. Ježa bolš kałaryjnaja, bolš tłustaja. Tamu heta pytańnie vyžyvańnia».
Ilustracyjnaje fota: Getty Images
Ci treba pić šmat vady
Adnosna taho, kolki pić vady, Biełavieškin havoryć, što normy niama. «Treba pić stolki, kolki chočacca. Bolš vady nie zrobić ciabie bolš zdarovym».
Zrazumieć, ci patrabuje arhanizm vadu, prosta. Dastatkova schadzić u prybiralniu i pahladzieć na koler svajoj mačy. Jon musić być śvietła-žoŭty ci śvietły.
Akramia hetaha śpiecyjalist dzielicca łajfchakam, jaki nazyvajecca «testavy hłytok»:
«Ty robiš adzin hłytok i prysłuchoŭvaješsia [da arhanizma]. Kali tabie paśla chočacca pić, ty pješ kolki chočacca. Kali ty zrabiŭ hłytok i bolš nie chočaš (unutranaje adčuvańnie), tabie bolš nie treba pić. Mozh vielmi kłasna bałansuje pačućcio smahi».
Dyscyplina — załoh pośpiechu
Biełavieškin źviartaje ŭvahu na raspaŭsiudžanuju zvyčku ludziej uznaharodžvać siabie paśla niejkaj fizičnaj aktyŭnaści vypiŭkaj piva ci spažyvańniem niečaha niezdarovaha:
«Nikoli nie varta siabie ŭznaharodžvać tym, što tabie škodzić. Kali ty chočaš pachudzieć, nie ŭznaharodžvaj siabie kanapaj i fastfudam. Kali ty na dyjecie, nie ŭznaharodžvaj siabie pierajadańniem. Lepš uznaharodź pachodam u saŭnu».
Piva — taksama ałkahol
Adnosna piva Biełavieškin adznačaje: «Jakaja roźnica, jaki chimičny skład piva. Heta prosta ałkahol. Niama nijakaj roźnicy, jon u vyhladzie vina, harełki ci piva. Heta prosta forma. Ludzi spažyvajuć piva, tamu što tam jość ałkahol».
«Minimalna niebiaśpiečnaj kolkaści ałkaholu niama», — havoryć doktar. A viadomy pohlad ab tym, što kielich vina nie škodzić arhanizmu, źviazany ź niapravilnaj traktoŭkaj navukovych daśledavańniaŭ.
Parady dla daŭhalećcia
Biełavieškin źviartaje ŭvahu, što naša zdaroŭje trymajecca na čatyroch asnovach:
Režym charčavańnia — važna, što ty jasi i kali.
Režym fizičnaj aktyŭnaści — jak časta ty ruchaješsia ciaham dnia.
Režym «praca-adpačynak-stres» — jak ty arhanizuješ svoj dzień, kab nie «zhareć».
Režym snu — nieabchodna dobra vysypacca.
«Heta čatyry režymy, na jakich trymajecca naša zdaroŭje i naš psichičny «dach». Kali jość niejkaja pradkazalnaść, niejki paradak u zvyčkach, to ŭsio astatniaje dabavicca», — zapeŭnivaje Biełavieškin.
Jak nie trapić u pastku vychadnoha dnia
Miedyk papiaredziŭ: jeści ŭ rozny čas škodna dla zdaroŭja
Navukoŭcy vyjavili, što ŭdziačnaść dapamahaje žyć daŭžej
Dažyć da 120 moža stać mahčymaj pierśpiektyvaj
Ci možna pić biezałkaholnaje piva štodzień i kolki