Litva moža pieradać Ukrainie pažarnyja mašyny ź Biełarusi, pryznačanyja dla Zimbabve
Mašyny zaviśli ŭ Kłajpiedzie.
21.09.2024 / 13:26
Fota: @HeraldZimbabwe
Litva razhladaje mahčymaść pieradačy Ukrainie 17 pažarnych mašyn ź Biełarusi, nakiravanych u Zimbabve i kanfiskavanych u Kłajpiedzie letaś u suviazi z sankcyjami. Pra heta paviedamiła hienieralny prakuror Nida Hrunskienie žurnalistam u piatnicu, piša 15min.lt.
«Tak, viadziecca dasudovaje rasśledavańnie, i prakuror pryniaŭ pastanovu, kali ja nie pamylajusia, što 17 mašyn, jakija pavinny byli adpravicca ŭ Zimbabve, pavinny być kanfiskavanyja, i ciapier prymajecca pastanova ab mahčymaj pieradačy ich Ukrainie», — skazała hienprakuror.
Na minułym tydni Paŭdniovaafrykanski dziaržaŭny partał navinaŭ The Herald zaklikaŭ Litvu pieradać 17 aŭtamabilaŭ, nabytych Zimbabve ŭ Biełarusi letaś. Sa słoŭ hienprakurora Zimbabve, aŭto byli zatrymanyja ŭ Kłajpiedskim marskim porcie ŭ sakaviku minułaha hoda.
«Jość rasparadžeńnie prakurora, jakoje infarmuje prakuraturu Zimbabve ab tym, što 17 aŭtamabilaŭ kanfiskavanyja, bo kampanija, jakaja vyrablała hetyja aŭtamabili, znachodzicca pad sankcyjami, i Zimbabve taksama znachodzicca pad sankcyjami», — skazała Hrunskienie.
Pavodle jaje słoŭ, afrykanskaja kraina taksama była prainfarmavanaja ab hetym rašeńni pa dypłamatyčnych kanałach.
«My čakajem, kali jany skarystajucca svaim pravam na apielacyju,» dadała jana.
ZimLive taksama adznačaje, što hienprakuror Zimbabve naviedaŭ Litvu ŭ pačatku hetaha hoda, kab viarnuć aŭtamabili.
U červieni minułaha hoda MNS pravodziła pieramovy ab pastaŭkach biełaruskaj techniki, bajavoha adzieńnia, ryštunku pažarnych-ratavalnikaŭ u Zimbabve. Siarod inšaha Biełaruś źbirałasia pastavić Zimbabve 131 pažarnuju aŭtacysternu vytvorčaści zavoda»Požsnab». Paźniej u žniŭni zimbabvijskija ŚMI paviedamlali ab atrymańni partyi pažarnych mašyn, piša Reform.news.
U 2022 hodzie ŭ Zimbabve pastaŭki biełaruskich pažarnych mašyn supravadžalisia skandałam. Ministerstva pa spravach miascovaha samakiravańnia zajaviła ab zakupcy pažarnaj techniki ź Biełarusi na sumu 32 młn dalaraŭ. Mašyny płanavałasia kupić u kampanii, jakoj vałodaje Alaksandr Zinhman, hanarovy konsuł Zimbabve ŭ Biełarusi. Ministerstva chacieła, kab kuplu prafinansavali miascovyja saviety. Apazicyja vystupiła suprać ździełki, nazvaŭšy ceny na mašyny zavyšanymi i abvinavaciŭšy ŭrad u sprobie abyjści sistemu publičnych tarhoŭ. Adzin z rehijonaŭ navat adchiliŭ rasparadžeńnie ab ich zakupcy.