Rasija nie budzie ŭdzielničać u samicie miru pa Ukrainie — MZS RF
Aficyjny pradstaŭnik MZS Rasii Maryja Zacharava zajaviła, što rasijskija ŭłady nie buduć udzielničać u samicie miru, jaki da kanca 2024 hoda płanuje arhanizavać Ukraina.
22.09.2024 / 12:39
Pieršy samit miru prajšoŭ u Šviejcaryi 15-16 červienia. Fota: AP Photo / Laurent Cipriani
Pavodle jaje słoŭ, samit miru nie maje ničoha ahulnaha z urehulavańniem rasijska-ŭkrainskaha kanfliktu. Jana nazvała jaho «čarhovaj prajavaj machlarstva anhłasaksaŭ i ich ukrainskich maryjanietak».
«Tak zvany druhi samit maje ŭsio tuju ž metu — praciahnuć absalutna niežyćciazdolnuju «formułu Zialonskaha» ŭ jakaści biezalternatyŭnaj asnovy rašeńnia kanfliktu, damahčysia jaje padtrymki z boku suśvietnaj bolšaści i ad jaje imia pradjavić Rasii ŭltymatum ab kapitulacyi. My ŭ takich «samitach» udzielničać nie budziem», — zajaviła pradstaŭnik MZS Rasii.
Zacharava dadała, što rasijskija ŭłady «nie admaŭlajucca ad palityka-dypłamatyčnaha ŭrehulavańnia kryzisu» i hatovy da abmierkavańnia «sapraŭdy surjoznych prapanoŭ, jakija ŭličvajuć situacyju «na ziamli».
Prezident Rasii Uładzimir Pucin 14 červienia nazvaŭ umovy dla mirnych pierahavoraŭ. Zhodna ź im, Ukraina pavinna zajavić ab poŭnym vyvadzie vojskaŭ z terytoryi Danieckaj, Łuhanskaj, Chiersonskaj i Zaparožskaj abłaściej i pačać realny vyvad vojskaŭ, a taksama aficyjna zajavić ab admovie ad płanaŭ pa ŭstupleńni ŭ NATA. Imavierna, heta Zacharava nazyvaje prapanovami, jakija ŭličvajuć situacyju «na ziamli».
20 vieraśnia prezident Ukrainy Uładzimir Zialenski zajaviŭ, što Kijeŭ aktyŭna pracuje nad płanam pieramohi i padrychtavaŭ try punkty dla razmovy z Rasijaj. Pavodle jaho słoŭ, sajuźniki Ukrainy zhodny z tym, što na druhi samit miru nieabchodna paklikać pradstaŭnikoŭ rasijskaha boku. «I, jak my skazali, u pačatku listapada ŭvieś płan budzie hatovy. Heta budzie start i padmurak dla taho, kab razmaŭlać u lubym farmacie z Rasijaj. U lubym farmacie, ź lubymi jaje pradstaŭnikami, tamu što budzie płan i budzie što pakazać», — skazaŭ Zialenski.
Padrabiaznaści hetych płanaŭ ukrainskaha boku nieviadomyja.
Zialenski zaklikaŭ zaviaršyć vajnu da zimy
«Nichto jašče nie pieramahaŭ Rasiju». Što ž, davajcie ŭspomnim historyju
Rekordnaja kolkaść rasijan vykazałasia za zaviaršeńnie vajny biez dasiahnieńnia metaŭ Pucina