U minskich kaledžach źjaviacca novyja śpiecyjalnaści
Adna ź ich — elektramiechanik pa eskałatarach i travałatarach.
22.09.2024 / 17:13
Ilustracyjny zdymak. Fota: «Naša Niva»
U 2024-m u minskija kaledžy pastupili bolš za 4,5 tysiačy vypusknikoŭ škoł, paviedamili ŭ kamitecie adukacyi Minharvykankama, piša ahientcva «Minsk-Naviny».
Samyja vialikija konkursy skłalisia na śpiecyjalnaściach «elektramancior pa ramoncie i absłuhoŭvańni elektraabstalavańnia», «ślesar pa ramoncie aŭtamabilaŭ», «kuchar», «cyrulnik», «paštovaja sprava». Pastupić na hetyja śpiecyjalnaści možna było, majučy siaredni bał dakumienta ab adukacyi 7,5 i vyšej.
Sioleta płanujuć padrychtoŭku pa niekatorych intehravanych prafiesijach.
«Naprykład, nastaŭnik pačatkovych kłasaŭ ź viedańniem anhlijskaj movy. Takaja patreba siońnia jość. My sočym za rynkam pracy — kali źjaŭlajecca deficyt peŭnych kadraŭ, dziakujučy hnutkaj sistemie praftechadukacyi možam mamientalna reahavać. Z toj ža metaj u piedahahičnym kaledžy adkryli padrychtoŭku vykładčykaŭ, jakija akazvajuć prafiesijnaje supravadžeńnie dziaciej z asablivaściami ŭ raźvićci, nastaŭnikaŭ fizkultury ŭ pačatkovaj škole», — adznačyli ŭ Kamitecie pa adukacyi.
U Minskim dziaržaŭnym kaledžy techniki i technałohij budaŭnictva papularnaściu karystalisia prafiesii zvarščyka, santechnika, śpiecyjalista pa suchim budaŭnictvie.
«Akramia taho, rychtujem i pa deficytnych śpiecyjalnaściach. Naprykład, elektramiechanikaŭ pa liftach. Paralelna pa prośbie pradpryjemstva-zakazčyka chłopcy atrymlivajuć prafiesiju vadziciela», — kaža dyrektar kaledža Andrej Jarmolik.
U nastupnym hodzie tam płanujuć uvieści novuju śpiecyjalnaść — «elektramiechanik pa eskałatarach i travałatarach». Navučać pa joj buduć nie tolki vypusknikoŭ škoł, ale i darosłych.