Паўднёвую Афрыку накрыў незвычайна моцны снегапад
У некаторых раёнах выпала да двух метраў снегу.
22.09.2024 / 22:42
Фота: сацсеткі
У суботу Паўднёвую Афрыку накрыў незвычайна моцны снегапад, паведамляе агентва AFP.
Асабліва пацярпела шаша, якая злучае гарады Ёханэсбург і Дурбан. Некалькі ўчасткаў былі зачыненыя, і нават аб'язныя шляхі аказаліся непраходнымі, паведамілі афіцыйныя асобы. Людзі захраслі ў аўто і правялі ў іх усю ноч. Адзін з аўтамабілістаў расказваў, што правёў у машыне з дзецьмі больш за 13 гадзін.
Грузавікі былі прыпаркаваны на абочыне дарогі з пятніцы. Аўтобусы, якія курсуюць паміж правінцыямі, затрымаліся на заправачных станцыях прыкладна на сем гадзін.
Адно з мясцовых выданняў піша, што ў выніку пераахаладжэння загінула двое чалавек, якія стаялі ў заторы праз снегапад.
Фота: сацсеткі
Як піша AFP, чакаецца ўзмацненне снегападу, у сувязі з чым у некалькіх раёнах краіны дзейнічае другое па велічыні папярэджанне аранжавага колеру.
Удалечыні ад небяспечных зон гэта рэдкая з'ява прыцягнула ўвагу людзей, якія з нецярпеннем чакалі з'яўлення снегу. Адзін мужчына са сваёй сям'ёй тры гадзіны ехаў з Ёханэсбурга ва Уорд.