Śpiavak Ap$ent admianiŭ kancerty ŭ Litvie i Łatvii. U čym pryčyna?
Pieśnia «Možno ja s toboj», jakaja pryśviečana vymušanaj emihracyi, uzarvała tyktok i pryniesła Ap$ent šalonuju papularnaść. Ale ŭčora śpiavak paviedamiŭ, što admianiaje zapłanavanyja kancerty ŭ krainach Bałtyi.
23.09.2024 / 15:23
AP$ent na kancercie ŭ Varšavie. Fota ź jaho instahrama
Arsienij Kiślak (sapraŭdnaje imia śpievaka Ap$ent) pavinien byŭ vystupić 26 vieraśnia ŭ Talinie, 27 vieraśnia ŭ Vilni i 29 vieraśnia ŭ Ryzie. Ale jon źviarnuŭsia da fanataŭ u tyktoku:
— U mianie jość naviny, na žal, nie vielmi dobryja. Kancerty ŭ krainach Bałtyi admianiajucca. Hrošy za kvitki, kaniešnie, buduć viernuty.
Fanaty artysta zaŭvažyli, što fonam hraje jaho pieśnia «Upał — vstavaj» i pačali chvalavacca, ci nie zdaryłasia čaho.
Kamientujučy admienu kancerta «Našaj Nivie», Ap$ent skazaŭ:
— Čarada nie zusim pryjemnych padziej, rasčaravańniaŭ i pierahružanaść arhanizacyjnaj pracaj pasadzili mnie batarejku. Mnie treba krychu času na pieradyšku i tvorčaść.
Na ŭdakładnieńnie, ci atrymałasia sabrać zały ŭ dźviuch jeŭrapiejskich stalicach, śpiavak adkazaŭ, što z takimi pytańniami treba źviartacca nie da jaho. Kancert u Varšavie na minułym tydni ŭ Ap$ent prajšoŭ paśpiachova.
«Pieśniu viasiołaha biełarusa» śpievaka Ap$ent pryznali ekstremisckaj
Biełaruski śpiavak Ap$ent pra svaje zarobki: Rekord na miesiac — $30 tysiač