Pamior lehienda biełaruskaha panka Viktar «Mao» Žarkievič. Hubazikaŭcy prymušali jaho nieści z saboj dźviery ad chaładzilnika
«Mao» byŭ vakalistam Hate to state, adnoj ź pieršych palityčnych pank-bandaŭ Biełarusi.
23.09.2024 / 21:56
Viktar «Mao» Žarkievič. Fota ź jahonaj staronki ŭ fejsbuku
Viktaru «Mao» Žarkieviču byŭ 51 hod. Jon najbolš viadomy jak minski pank-rokier.
Viktar zachapiŭsia pankam jašče ŭ padletkavym uzroście, u saviecki čas. U pačatku 1990-ch jon pajechaŭ u Hiermaniju i žyŭ tam u zachoplenym pankami budynku, udzielničaŭ u miascovym pank-ruchu. Paśla viartańnia ŭ Minsk «Mao» pryvioz nie tolki ŭražańni, ale i viedy pra tamtejšuju pank-scenu.
«Mao» chacieŭ hrać u styli, jaki zaviecca krast-pank — heta zvyčajna hrubaja i ciažkaja, «haražnaja» muzyka razam z radykalnymi sacyjalnymi tekstami. Viktar Žarkievič u 1997 hodzie byŭ zasnavalnikam i aŭtaram tekstaŭ minskaha pank-hurta Hate to state, jaki vystupaŭ pobač z vybitnymi dziejačami biełaruskaha roku taho času.
Afiša fiestyvalu «Razdavim fašysckuju hadzinu», kaniec 90-ch. Razam z Hate to State vystupaje haradzienski hurt Deviation, u jakim vakalistam byŭ Stas Pačobut, brat palitviaźnia Andžeja Pačobuta.
Hurt praisnavaŭ da 2000 hoda, a apošni kancert jany hrali razam z hurtom «Pravakacyja», u jakim byŭ vakalistam Alhierd Bacharevič. Paśla hetaha Viktar epizadyčna hraŭ u roznych hurtach dy zajmaŭsia mienš viadomymi prajektami.
Žarkieviča zatrymlivaŭ HUBAZiK u vieraśni 2022 hoda. Padčas zatrymańnia Viktara mocna źbili. U dadatak jamu złamali ab hałavu patelniu dy prymusili ciahnuć z saboj u adździaleńnie dźviery ad chaładzilnika, na jakija byli naleplenyja pank-rokierskija dy anarchisckija nalepki i mahnity za roznyja hady.
Siabry mužčyny kažuć, što jaho zdaroŭje dy maralny stan mocna padarvali 13 sutak na Akreścina. Jon skardziŭsia na boli i paśla vychadu z-za krataŭ.
Žarkieviča zvolnili z pracy na budoŭli i, prynamsi ŭ pieršy čas, nie brali na novuju praz palityčnyja abvinavačańni. Viktar pierabivaŭsia vypadkovymi zarobkami dy časta skardziŭsia siabram na prablemy sa zdaroŭjem.
Viktar «Mao» Žarkievič pamior 22 vieraśnia 2024 hoda ŭ svajoj kvatery ŭ Minsku. Pa źviestkach znajomych, nie vytrymała serca.
U Minsku łukašysty zmusili budaŭnika ŭ naručnikach nieści z saboj dźviery ad chaładzilnika
42-hadovy haradzieniec pakinuŭ radzimu paśla zatrymańnia. I praz tydzień nie vytryvała serca
«Bajsoł» zajaviŭ pra rezkaje pavieličeńnie zajavak na dapamohu