Źjavilisia spadarožnikavyja FOTY z kančatkovymi vynikami ŭdaru pa składzie ŭ Taropcy. Jany ŭražvajuć
Źniščeńnie 18 vieraśnia 107-ha arsienała Hałoŭnaha rakietna-artyleryjskaha ŭpraŭleńnia Minabarony Rasii ŭ Taropcy stała surjoznaj strataj dla rasijskaj vajennaj infrastruktury. Apublikavanyja spadarožnikavyja zdymki ŭ vysokim razroźnieńni pakazvajuć maštab razbureńniaŭ.
23.09.2024 / 22:25
Jak vyhladaje, u arsienale źniščanyja składy, razburanaja infrastruktura i stračany vialiki čyhunačny sastaŭ.
Asablivuju ŭvahu pryciahvaje samaja novaja i ŭmacavanaja častka arsienała — bolšaść schoviščaŭ ci całkam źniščanyja, ci atrymali surjoznyja paškodžańni. Na miescy adnaho ź ich zastałasia vielizarnaja varonka, jakaja śviedčyć pra mocny vybuch. Niekalki bunkieraŭ usio ž taki zachavalisia, ale, mahčyma, jany byli pustyja.
Udar pa hetym składzie źjaŭlajecca stratehična važnaj padziejaj, jakaja moža asłabić rasijskija siły na peŭny pieryjad, asabliva ŭ kantekście aktyŭnych bajavych dziejańniaŭ va Ukrainie.
Pavodle Instytuta vyvučeńnia vajny (ISW), udar Ukrainy 18 vieraśnia pa rasijskim składzie rakiet i bojeprypasaŭ kala Taropca ŭ Ćviarskoj vobłaści mieŭ značnyja nastupstvy dla rasijskich vojskaŭ.
Ekśpierty miarkujuć, što ŭ vyniku hetaha ŭdaru byli źniščanyja zapasy bojeprypasaŭ, jakich chapiła b na 2−3 miesiacy vajennych dziejańniaŭ.
Heta moža istotna paŭpłyvać na apieracyi Rasii ŭ najbližejšyja miesiacy, bo adnaŭleńnie takich abjomaŭ bojeprypasaŭ patrabuje času i resursaŭ.
Brytanskaja raźviedka: Ataka na arsienał u Taropcy parušyć dziejańni rasijskich vojskaŭ
Vybuch hihanckaha składa bojeprypasaŭ u Ćviarskoj vobłaści: što viadoma na hety momant
Źjavilisia spadarožnikavyja FOTY nastupstvaŭ ukrainskaha ŭdaru pa składzie bojeprypasaŭ u Taropcy
Ukrainskija bieśpiłotniki ŭrazili vializarny skład bojeprypasaŭ u Ćviarskoj vobłaści