Biełarusa, jaki kinuŭ dva «kaktejli Mołatava» ŭ karaleŭski pałac u Osła, prysudzili da šaści miesiacaŭ turmy
Na sudzie mužčyna rastłumačyŭ, što dziejničaŭ u rospačy.
24.09.2024 / 10:52
Fota: VG-tipser / Jan Gregersen
Biełarusa, jaki 8 lipienia kinuŭ dva «kaktejli Mołatava» ŭ karaleŭski pałac u Osła, prysudzili da šaści miesiacaŭ turmy, piša «Biełaruś i śviet» sa spasyłkaj na Dagbladet.
Abvinavačvańnie prasiła pryznačyć 50-hadovamu biełarusu vosiem miesiacaŭ pazbaŭleńnia voli. Pry vyniasieńni prysudu akruhovy sud Osła ŭličyŭ słaboje zdaroŭje mužčyny i toje, što jon pierasoŭvajecca na invalidnym vazku.
Na sudzie mužčyna rastłumačyŭ, što dziejničaŭ u rospačy: chacieŭ pryciahnuć uvahu da niespraviadlivaściaŭ, jakim jon padvierhnuŭsia, asabliva ŭ centry pryjomu biežancaŭ u Niderłandach, a taksama, što nie moža viarnucca va Ukrainu, dzie pražyvaŭ raniej. Jon pryznaŭ siabie vinavatym, pahadziŭsia z prysudam i paprasiŭ prabačeńnia ŭ žycharoŭ Osła i Narviehii.
8 lipienia mužčyna na invalidnym vazku kinuŭ dva «kaktejli Mołatava» ŭ budynak karaleŭskaj rezidencyi ŭ Osła. Jany patrapili ŭ dźviery ŭ zadniaj častcy budynka, jana zaharełasia. Nichto nie paciarpieŭ, ahoń zmahli chutka patušyć.
Pavodle infarmacyi narviežskaha vydańnia, biełarus pryjechaŭ u Narviehiju za tydzień da zdareńnia. Viadoma, što mužčyna znachodzicca ŭ vyšuku ŭ Niderłandach za inšaje pravaparušeńnie.
U Osła biełarus kinuŭ dva kaktejli Mołatava ŭ karaleŭski pałac