«Наш супольны рускі свет». Сястра кіраўніка МЗС Рыжанкова жыве ў Францыі, але пасля пачатку вайны атрымала расійскае грамадзянства
Сястра кіраўніка МЗС Беларусі Максіма Рыжанкова Дар'я Рыжанкова шмат гадоў жыве ў Ніцы, што не перашкаджае ёй падтрымліваць «русский мир». «Белсат» расказвае, што вядома пра Дар'ю.
25.09.2024 / 17:49
Дар’я Рыжанкова на спартовых спаборніцтвах у гонар ейнага бацькі Уладзіміра Рыжанкова ў Менску. Фота: belarus.basketball
Дар'я Рыжанкова пераехала ў Францыю яшчэ ў 2009 годзе. З ейнага ўласнага аповеду вынікае, што ў Беларусі яна пакінула паспяховую кар'еру маркетолага і пераехала ў Францыю за будучым мужам.
У 2015 годзе яна паступіла ва ўніверсітэт (Université Côte d'Azur) у Ніццы. Там яна атрымала дыплом бакалаўра ў спецыяльнасці «Навукі пра жыццё і здароўе», а потым дыплом магістра па спецыяльнасці «Біябанкі і кіраванне базамі звестак».
Падчас вучобы Дар'я магла сабе дазволіць не працаваць — яе ўтрымліваў муж.
А ў магістратуры ёй паступіла прапанова працаваць у біябанку лабараторыі паталогіяў у Ніццы. Цяпер яна працягвае супрацоўнічаць з лабараторыяй у якасці незалежнай кансультанткі, дзеліцца Дар'я.
Аднак з Беларуссю і братам сувязі Дар'я не губляла. У снежні 2022 года яна была ў Мінску разам з Максімам Рыжанковым на спаборніцтвах па баскетболе памяці іх бацькі — некалі міністра спорту і турызму, першага кіраўніка НАК Беларусі Уладзіміра Мікалаевіча Рыжанкова.
Дар’я Рыжанкова з Максімам Рыжанковым на спартовых спаборніцтвах у гонар іхнага бацькі Уладзіміра Рыжанкова ў Мінску. Фота: belarus.basketball
Пачала заўважаць некарэктнае стаўленне да «русского мира»
Прыкладна ў гэты ж час у кар'еры Дар'і адбыўся новы пераломны момант. Выглядае, што ейнаю новаю мэтаю зрабілася дзяржкіраванне. У 2022—2023 гадах яна сталася ўдзельніцаю і пераможцаю конкурсу «Лідары Расеі» ад платформы Уладзіміра Пуціна «Расія — краіна магчымасцяў».
«Абсалютна відавочна, што будучае прафесійнае жыццё я звязваю менавіта з Расіяй», — распавяла Дар'я.
Дзякуючы конкурсу яна прайшла навучанне ў Расійскай акадэміі народнай гаспадаркі і дзяржаўнай службы пры прэзідэнту Расіі паводле праграмы «Майстар дзяржаўнага ўпраўлення для кіраўнікоў» для краінаў СНД і цяпер, падобна, сканцэнтраваная на Расеі.
«Калі ты доўга перабываеш за мяжою, то розніцу паміж нашымі краінамі — Расеяй і Беларуссю — ужо не адчуваеш, гэта для цябе нашая супольная прастора, «русский мир».
Яшчэ задоўга да падзей 2014 года я пачала заўважаць, скажам так, некарэктнае да яго стаўленне. Гэта маглі быць абразлівыя карыкатуры, звязаныя з нацыянальнымі сімваламі, або нечаканыя трактаванні гісторыі Другой сусветнай вайны ў прыватных гутарках», — кажа Дар'я.
Дар'я настолькі захопленая Расіяй, што пастанавіла атрымаць расейскае грамадзянства.
Адпаведны ўказ 18 лістапада 2022 года падпісаў Уладзімір Пуцін для чатырох пераможцаў конкурсу «Лідары Расіі», у тым ліку для Дар'і Рыжанковай.
Дар’я Рыжанкова (злева) з удзельніцамі праектаў платформы «Расія — краіна магчымасцяў». Крыніца: rsv.ru
Таксама ейны праект «Экспат-навігатар» у межах навучання на платформе «Расія — краіна магчымасцяў» накіраваны на інтэграцыю замежнікаў у расейскае грамадства.
«Гэта інструмент, што дазволіць дапамагчы адаптацыі замежных грамадзянаў, якія працуюць на тэрыторыі Расійскай Федэрацыі, а галоўнае, іхных родных. <…> Місія праекту — не толькі стварыць камфортныя ўмовы, але і зрабіць так, каб чалавек вярнуўся на радзіму з станоўчымі пачуццямі і ўражаннямі пра краіну», — расказала Дар'я.