Iran zapuściŭ 180 balistyčnych rakiet pa Izraili. Ich iznoŭ paščoŭkali
Rakiety ź Irana da Izraila dalatajuć za 12 chvilin.
01.10.2024 / 19:41
Karta rakietnaj niebiaśpieki ŭ Izraili
U Izraili hučać sireny, usie hramadzianie pavinny dziejničać pa instrukcyjach kamandavańnia tyłu.
Pavodle źviestak telekanała ABC News, Izrail čakaŭ zapusku kala 250 iranskich rakiet dźviuma chvalami. Vydańnie spasyłajecca na krynicy ŭ administracyi ZŠA. Rakiety majuć być skiravanyja pa čatyroch celach u Izraili, uklučajučy štab-kvateru «Masada» i try avijabazy.
ZŠA i Izrail aktyvavali ŭsie srodki abarony, i Izrail «absalutna dakładna» naniasie zvarotny ŭdar, kali heta adbudziecca, — skazaŭ čynoŭnik, jaki razmaŭlaŭ z ABC News.
Pieršaja chvala vypuščanych rakiet, jak miarkujecca, dasiahaje 100 adzinak.
Vidavočcy publikujuć videa pierachopu iranskich rakiet u niebie nad Izrailem.
U toj ža čas miascovyja ŚMI pišuć, što častka iranskich rakiet prabiła izrailskuju SPA «Žalezny kupał». Nibyta jość paškodžanyja budynki, pra paciarpiełych pakul nie paviedamlałasia.
Izrailskaja hazieta «Haarec» pieradaje, što mocnyja vybuchi čulisia i ŭ Jerusalimie, i ŭ Tel-Avivie. Taksama jana paviedamlaje — pakul biez padrabiaznaściaŭ — pra traplańni rakiet u centralnym Izraili i na poŭdni, u pustelni Niehieŭ.
U siecivie raspaŭsiudžvajecca videa nibyta vybuchu na naftavaj vyšcy ŭ Tel-Avivie.
Vydańnie Al Arabiya paviedamiła, što niekalki iranskich rakiet nibyta byli pieriechoplenyja ŭ niebie nad Iardanijaj.
Prezident ZŠA Džo Bajdien sabraŭ z nahody rakietnaj ataki Irana na Izrail terminovuju naradu ŭ Biełym domie.
Miž tym u Korpusie vartavych isłamskaj revalucyi (KVIR) zajavili, što, maŭlaŭ, nanieśli ŭdar «u samaje serca akupavanych ziemlaŭ» u adkaz na «pakutnickuju śmierć» lidara CHAMAS Ismaiła Chanii, lidara «Chiezbały» Chasana Nasrały i kamandujučaha KVIR Abasa Nilfrušana.
Pavodle finalnaha padliku, pa Izraili było vypuščana 180 rakiet. Bolšaść ź ich udałosia źbić — častku źbili amierykanskija VMS, ale bolšaść — izrailskaja supraćpavietranaja abarona. Častka rakiet upała ŭ pustyni i hołym poli — sistema «Žalezny kupał» praličvaje trajetoryi rakiet i źbivaje tyja, jakija laciać u zabudovu, prapuskajučy inšyja, ad jakich nie prahnazujecca škody. Paviedamlajecca, što ŭ Izraili jość paranienyja, ale nichto nie zahinuŭ.
Iran moža raspačać rakietnuju ataku suprać Izraila ŭ najbližejšyja hadziny
Izrail pačaŭ naziemnuju apieracyju na poŭdni Livana
U Iranie padraździaleńnie pa baraćbie ź Izrailem uznačalvaŭ ahient «Masada»