Karparacyja ABBYY za adzin dzień zvolniła sotni supracoŭnikaŭ z rasijskimi pašpartami
Siarod ich jość i tyja, kaho rełakavali z Rasii paśla pačatku vajny.
02.10.2024 / 14:11
Ofis kampanii ABBYY u Maskvie. 2016 hod. Fota: Wikimedia Commons
1 kastryčnika źjaviłasia infarmacyja ab masavych zvalnieńniach u IT-karparacyi ABBYY, najbolš viadomaj svajoj prahramaj FineReader dla raspaznavańnia adskanavanaha tekstu.
Kampanija litaralna za hadzinu zvolniła ŭsich hramadzian Rasii ŭ troch ofisach: na Kipry, u Białhradzie i Budapiešcie. Hetyja ludzi raniej byli rełakavanyja za miažu dla pracy ŭ jeŭrapiejskich ofisach.
Mnohija z supracoŭnikaŭ na momant publikacyi znachodzilisia ŭ stanie «garden leave» — heta praktyka, kali supracoŭnika, jakoha ŭžo apaviaścili ab zvalnieńni, adchilajuć ad pracy, ale jon usio jašče farmalna ličycca supracoŭnikam i atrymlivaje zarpłatu. Niekatorym ź ich prapanavali padpisać mutual agreement — pahadnieńnie ab zvalnieńni pa ŭłasnym žadańni z dadatkovymi vypłatami, pry hetym prosiać admovicca ad lubych jurydyčnych pretenzij da kampanii.
Asnoŭnymi achviarami skaračeńniaŭ stali raspracoŭščyki, teściroŭščyki i mieniedžary, jakija byli rełakavanyja z Rasii i Biełarusi. Pa infarmacyi znajomych ź situacyjaj ludziej, pad skaračeńnie nie patrapili sierby, vienhry i rełakavanyja ŭkraincy. Nie paciarpieli taksama i niekatoryja supracoŭniki z rasijskimi pašpartami, jakija nie mieli dostupu da koda.
Fota: mash / Telegram
Na adnoj z anłajn-sustreč dla supracoŭnikaŭ ź Sierbii prysutničali vyklučna hramadzianie Rasii. Na sustrečy vystupili hienieralny dyrektar ABBYY Ulf Piersan i dyrektar pa praduktach Patryk Žan, jakija padziakavali supracoŭnikam za pracu i zajavili, što «ŭsie małajcy, ale kampanija pavinna ruchacca dalej». Paśla sustrečy zvolnienym supracoŭnikam adklučyli dostupy da karparatyŭnych sistem, a pahadnieńni ab zvalnieńni paabiacali dasłać na ich asabistyja elektronnyja pošty.
Pryčyny zvalnieńniaŭ nazyvalisia roznyja. Niekatorym supracoŭnikam kampanija tłumačyła heta nieabchodnaściu adpaviadać praviłam biaśpieki (compliance and security), inšym paviedamili, što ich praca mahła być lepšaj. Niekatoryja supracoŭniki taksama pačuli, što «kampanija nie moža praciahvać supracoŭnictva z rasijskimi kalehami ŭ adpaviednaści sa svajoj palitykaj».
Zhodna z infarmacyjaj, atrymanaj Forbes, ABBYY płanuje pieranieści svaje IT-raspracoŭki ŭ Indyju, dzie zarpłaty śpiecyjalistaŭ značna nižejšyja za jeŭrapiejskija. Miarkujecca, što kampanija pajšła na hety krok dla źnižeńnia vydatkaŭ, bo zarpłaty ŭ indyjskich śpiecyjalistaŭ mohuć być u dva-try razy mienšymi, čym u ich rasijskich kaleh.
Pavodle acenak, pad skaračeńni trapiła ad 200 da 300 supracoŭnikaŭ pa ŭsim śviecie. Najbujniejšyja zvalnieńni adbylisia na Kipry, dzie, pa infarmacyi krynic, amal uvieś R&D-adździeł (daśledavańniaŭ i raspracovak) byŭ rasfarmiravany.
Pradstaŭnik kampanii ŭ intervju RBK adznačyŭ: «Hetaja hłabalnaja transfarmacyja dazvalaje nam reinviestavać u budučy rost i paskarać inavacyi ŭ praduktach i rašeńniach dla našych klijentaŭ».
Krynicy RBK kažuć, što apošnija paŭhoda kampanija dekłaravała adkryćcio dadatkovych ofisaŭ u Barsiełonie, Novi-Sadzie, Miunchienie, i najm supracoŭnikaŭ; u karparatyŭnych kamunikacyjach kampanija paviedamlała, što ŭ jaje rekordnyja prybytki.
***
ABBYY — mižnarodnaja IT-kampanija, jakaja była zasnavana ŭ 1989 hodzie ŭ Rasii Davidam Janam. Jana najbolš viadomaja svaim prahramnym praduktam FineReader, jaki dazvalaje raspaznavać tekst u adskanavanych dakumientach i malunkach, pieratvarajučy ich u farmaty, prydatnyja dla redahavańnia i pošuku.
U 2022 hodzie, paśla pačatku vajennych dziejańniaŭ va Ukrainie, ABBYY spyniła prodažy, raspracoŭki i akazańnie pasłuh u Rasii i Biełarusi, a jurydyčnyja asoby ŭ hetych krainach byli likvidavany. U kastryčniku taho ž hoda kampanija abviaściła ab płanach pieravieści bolšuju častku rasijskich i biełaruskich supracoŭnikaŭ u ofisy na Kipry, u Vienhryi i Sierbii.
Wargaming ukłaŭsia ŭ kuplu 100 kvater u Litvie. I, imavierna, zarablaje na ich prodažy i arendzie
Google zapłaciła $2,7 miljarda za hienija štučnaha intelektu. Čym admietny hety čałaviek?
Apple pavinna vypłacić Irłandyi 13 młrd jeŭra