Ci vydaść sud u Haazie pastanovu ab aryšcie Łukašenki i jak heta paŭpłyvaje na jaho palityku i atačeńnie? Razvažaje Frydman
«Svoj ordar jon atrymaje. I jon sam adčuvaje, što atrymaje. Ale zaraz palityčna nie toj momant».
02.10.2024 / 15:43
Fota: Gavriil Grigorov Sputnik Kremlin Pool Photo via AP
Alaksandr Frydman vykazaŭ mierkavańnie, što Mižnarodny kryminalny sud u Haazie ŭsio ž vydaść pastanovu ab aryšcie Łukašenki.
«Chutčej za ŭsio, ordar budzie vydadzieny. Pryncypovaje rašeńnie pa hetym jość. Pytańnie tolki, kali heta budzie zroblena», — zajaviŭ Frydman u prahramie «Obyčnoje utro».
Jak tłumačyć analityk, Mižnarodny kryminalny sud sprabuje być niezaležnym, ale nie zaŭsiody ŭ jaho heta atrymlivajecca.
«Jak viadoma, palityčny ŭpłyŭ prysutničaje i tam», — zaŭvažaje Frydman i pryvodzić u jakaści prykładu prakurora MKS Karyma Chana, jaki nieadnarazova zajaŭlaŭ pra svaje namiery vydać ordar na aryšt izrailskich lidaraŭ, uklučajučy premjer-ministra Bińjamina Nietańjachu. Adnak niahledziačy na jaho zajavy i čakańni ŭ presie, uklučajučy izrailskija ŚMI, zrabić heta nie ŭdałosia. Frydman ličyć, što heta źviazana z upłyvam izrailskich partnioraŭ, jakija, vierahodna, dali zrazumieć, što vydača ordara budzie niepažadanaj.
«Miarkuju, što prykładna taki ž miechanizm pracuje i ŭ adnosinach da Alaksandra Łukašenki. Ordar zasłužyŭ? Biezumoŭna. Ale zaraz palityčna nie toj momant», — zaŭvažaje Frydman.
Na pohlad analityka, vydača ordara na aryšt šturchnie Łukašenku z usich sił u abdymki Maskvy. U vyniku jon budzie ŭdzielničać u vajnie suprać zachodnich krain bolš aktyŭna.
«A bolš aktyŭny ŭdzieł zaraz zusim nie patrebny. Absalutna niavyhadna. Pieranos bajavych dziejańniaŭ na terytoryju Biełarusi nie patrebny. Tamu navošta, ułasna kažučy, złavać raniej času. Svoj ordar jon atrymaje. I jon sam adčuvaje, što atrymaje», — havoryć Frydman.
Jak zaŭvažaje analityk, zachodnija krainy aktyŭna nazirajuć za pavodzinami Łukašenki, jaki pakul nie prajaŭlaje aktyŭnaha ŭdziełu ŭ vajnie, i tamu, vierahodna, łohika Zachadu takaja: kali vydać ordar na aryšt Łukašenki, jak heta ŭžo zroblena ŭ adnosinach da Pucina, to dla biełaruskaha dyktatara nie zastaniecca vybaru. Rana ci pozna jaho čakaje Haaha, i heta stanie dla jaho svojeasablivym prysudam.
«U adnosinach da Łukašenki heta byŭ by prysud. U vypadku Pucina nie ŭsio tak adnaznačna», — havoryć Frydman. Jak jon tłumačyć, kali vydali ordar na Pucina, šmat zachodnich palitykaŭ spynili ź im kamunikacyju. Ale niadaŭna źjaviłasia infarmacyja, što kancler Hiermanii Šolc razhladaje mahčymaść patelefanavać Pucinu. Heta śviedčyć ab tym, što ordar nie staŭ surjoznaj pieraškodaj dla takich kantaktaŭ.
Alaksandr Frydman, ličyć, što ordar Mižnarodnaha kryminalnaha suda stanie dla Łukašenki pryhavoram. Skryn videa: utro / YouTube
Ale Pucin — heta lidar jadziernaj dziaržavy, i ŭ historyi nie było precedentaŭ, kali kiraŭnika jadziernaj dziaržavy pryciahnuli da suda. U vypadku z Łukašenkam usio inakš — takija prykłady ŭžo jość, siarod ich były prezident Juhasłavii Słabadan Miłošavič. I mienavita na takija prykłady Łukašenka aryjentujecca, razumiejučy, što jaho mohuć pryciahnuć da adkaznaści».
Ci zrobić Łukašenka kroki, kab źmiakčyć svaju situacyju
Na pytańnie, ci jość u Łukašenki mahčymaść zrabić jakija-niebudź kroki, kab źmiakčyć svaju situacyju, naprykład, vyzvalić palitviaźniaŭ abo pajści na inšyja sastupki, Frydman adkazaŭ, što sumniavajecca ŭ takim. Pa słovach analityka, biełaruski dyktatar ličyć, što miechanizmy ŭžo zapuščany i ničoha zrabić užo niemahčyma.
Łukašenka, miarkujučy pa prapahandzie, časta paŭtaraje, što Zachad nienadziejny i moža padmanuć, i jon u heta ščyra vieryć. U jaho ŭjaŭleńni historyi dyktataraŭ, takich jak Kadafi i Miłošavič, paćviardžajuć jaho aściarohi, bo abodva jany byli, na jaho dumku, «padmanutyja» Zachadam.
«Miłošavič nie zychodziŭ z taho, što jon usio ž u vyniku apyniecca ŭ Haazie, i što jaho pasprabujuć sapraŭdy pryciahnuć za toje, što jon zrabiŭ. Hety los Łukašenka prymiaraje na siabie i razumieje. «Jany paabiacajuć, što jany zrobiać, a ŭ vyniku kinuć». Jon jašče kahości vypuścić, a ŭsio roŭna budzie ordar. Nu i zastaniecca ŭ durniach», — havoryć Frydman.
Raniej, jak zdajecca Frydmanu, Łukašenka sprabavaŭ niejak praduchilić mahčymyja dziejańni Litvy i vioŭ niejkija razmovy, publična sprabavaŭ naładzić dyjałoh. Ale, jak vidać, heta nie dało vynikaŭ, bo Litva ŭsio ž padała dakumienty na zaviadzieńnie spravy.
Ci stanie ordar na aryšt Łukašenki prablemaj dla jaho dziaržaŭnaha aparatu?
Pa słovach Frydmana, mnohija biełaruskija čynoŭniki — «apartunisty i kanjunkturščyki, jakija trymajuć nos pa vietry». Pakul jany nie bačać surjoznych pahroz dla Łukašenki, jany praciahvajuć słužyć jamu z nadziejaj, što «ŭsio abydziecca». Adnak, kali situacyja źmienicca, jany mahli b pasprabavać dystancyjavacca ad jaho.
«Kali-niebudź usio źmienicca, jany buduć sprabavać ad Łukašenki adchryścicca», — padkreślivaje aŭtar.
Analityk uzhadvaje, jak napiaredadni na Jeŭraradyjo daŭ padobny kamientar, jaki vyklikaŭ «sapraŭdnuju isteryku» ŭ biełaruskich prapahandystaŭ. Takaja reakcyja pakazvaje, što ŭ aparacie jość tryvoha. Heta značyć, što isnujuć čynoŭniki, jakija sapraŭdy zadumvajucca ab mahčymych nastupstvach, uklučajučy ordar na aryšt.
«Jany vyrašyli ŭstupić sa mnoju ŭ zavočnuju palemiku. (…) [Heta] ŭžo havoryć ab tym, što šapka-ta haryć, što nastolki im važna dakazvać, što jany nie takija zaraz, što jany buduć jamu viernyja da kanca, što jany buduć słužyć, što b tam ni było, i nichto nikoli nikoha nie vydaść, nichto ničoha nie baicca».
«Ale heta nie značyć, viadoma ž, što jany ad Łukašenki pabiahuć. Tamu što sistema tak pabudavanaja, što tam asabliva nie ŭciačeš. Akramia taho, tyja ludzi, jakija zastalisia ŭ hetaj sistemie paśla 2020 hoda i sama paźniej paśla 2022 hoda, viedajuć, kamu jany słužać, jany viedajuć sutnaść hetaha režymu», — ličyć analityk.
Litva pieradała ŭ Mižnarodny sud u Haazie dakumienty pa złačynstvach režymu Łukašenki
Mižnarodny kryminalny sud moža chutka raspačać pieraśled Nietańjachu — The Times
U Mižnarodnym kryminalnym sudzie vydali ordar na aryšt Uładzimira Pucina