Chto taki Arciom Žoha i čamu Pucin jaho tak uzvysiŭ?
Paŭnamocnym pradstaŭnikom prezidenta Rasii va Uralskaj fiederalnaj akruzie pryznačany Arciom Žoha. Urał — heta najvažniejšy rehijon, dzie skancentravany rasijski VPK. I mienavita tudy adpraŭlajuć čałavieka, jaki 10 hadoŭ nazad byŭ prostym handlarom ryby, ale staŭ adnym z tvaraŭ «DNR». Raskazvajem, jak u 2022-m zahinuŭ jahony syn Uładzimir i jakuju darohu prajšoŭ sam Žoha.
03.10.2024 / 15:07
Uładzimir Pucin i Arciom Žoha (sprava) na sustrečy ŭ Kramli, 8 śniežnia 2023 hoda. Fota: Wikimedia Commons
Va ŭsioj Rasii Arciom Žoha staŭ viadomy paśla 8 śniežnia 2023 hoda, kali na sustrečy z Pucinym zadaŭ jamu pytańnie, ci budzie toj vyłučacca na čarhovy termin. «Nie budu chavać, u rozny čas u mianie byli roznyja dumki, ale ciapier vy majecie racyju», — adkazaŭ toj.
Heta była nie pieršaja sustreča danieckaha kamandzira z Pucinym. Prezident Rasii asabista prymaŭ Žohu ŭ svaim kabiniecie 9 maja 2023 hoda. Tady Pucin pieradaŭ jamu zorku i paśviedčańnie Hieroja Rasii, vypisanaje na imia syna Žohi — Uładzimira, jaki zahinuŭ pry šturmie ŭkrainskaha horada Vałnavacha.
U vieraśni taho ž hoda Arciom Žoha byŭ abrany ŭ Narodnuju radu «DNR», dzie staŭ jaho staršynioj. Akramia hetaha, jon uvajšoŭ u hienieralnuju radu kiraŭničaj u Rasii partyi «Adzinaja Rasija».
Usiaho praz hod paśla hetaha Arciom Žoha trapiŭ na samy alimp rasijskaj viarchoŭki — byŭ pryznačany paŭnamocnym pradstaŭnikom prezidenta va Uralskaj fiederalnaj akruzie.
Ašałamlalnaja karjera dla čałavieka, jaki jašče niadaŭna handlavaŭ rybaj i maje tolki siaredniuju śpiecyjalnuju adukacyju, jakuju atrymaŭ tolki ŭ 2020 hodzie, skončyŭšy Dakučajeŭski technikum.
Biezumoŭna, biez asabistaj sustrečy z Pucinym nie było b takich zruchaŭ. A sustrečy nie było b biez hibieli adzinaha syna, ź jakim baćka pačaŭ vajavać na baku rasijskich siłaŭ u 2014 hodzie.
U Słaviansk na Danieččynie ŭradženiec Mahadanskaj vobłaści pryjechaŭ u pačatku 1990-ch, ažaniŭsia. U 1993 hodzie ŭ 18-hadovaha Arcioma naradziŭsia syn Uładzimir. Jak zhadvaŭ sam mužčyna, spačatku jon pracavaŭ zvarščykam na zavodzie, a paśla zaniaŭsia drobnym biznesam. Z hetym u jaho atrymałasia. Praź niekatory čas Žoha mieŭ niekalki rybnych kramaŭ u horadzie.
Bajavy šlach Arcioma Žohi
Paśla pačatku vajennych dziejańniaŭ na Danbasie ŭ 2014 hodzie Žoha razam z synam dałučyŭsia da rasijskich siłaŭ, jakija zachapili častku Danbasa. Jany ŭstupili ŭ bataljon «Sparta», jakim kamandavaŭ rasijski kamandas Arsien Paŭłaŭ (pazyŭny Mataroła). Z Matarołam baćka i syn Žohi chutka pasiabravali. Viadoma, što Žoha-małodšy byŭ chrosnym baćkam dački Paŭłava.
Mataroła byŭ viadomy svajoj žorstkaściu. Isnuje zapis, na jakim jon chvalicca, što zabiŭ 15 pałonnych ukraincaŭ. Jak marski piechaciniec, Mataroła ŭdzielničaŭ u zachopie Kryma, paśla jaho nakiravali ŭ Charkaŭ, sproba zachopu jakoha skončyłasia niaŭdačaj. Paśla trapiŭ u Słaviansk. Jon braŭ udzieł va ŭsich hałoŭnych bajach 2014 i 2015 hadoŭ.
Bataljon «Sparta», jakim kamandavaŭ Paŭłaŭ, časopis Foreign Policy nazvaŭ «biaźlitasnym». Jaho bajcy abvinavačvajucca ŭ vajennych złačynstvach za abychodžańnie z pałonnymi.
16 kastryčnika 2016 hoda Arsien Paŭłaŭ byŭ zabity ŭ šachcie lifta. Vybuchovuju pryładu zamacavali na trosie lifta. U zamachu padazravali ŭkrainskuju dyviersijnuju hrupu.
Paśla zabojstva Paŭłava jaho pasadu zaniaŭ telehieničny Žoha-małodšy — jakomu tady było ŭsiaho 23 hady, a Žoha-starejšy byŭ pryznačany načalnikam štabu.
Uładzimir Žoha (sprava) z Matarołam (u centry), 2015 hod. Fota z Ukantakcie Žohi
Uładzimir Žoha-małodšy zahinuŭ 5 sakavika 2022 hoda ŭ bajach za Vałnavachu. U toj ža dzień kiraŭnik tak zvanaj «DNR» Pušylin prysvoiŭ jamu zvańnie hieroja respubliki.
Pa słovach Pušylina, pałkoŭnik Žoha atrymaŭ śmiarotnaje ranieńnie, «zabiaśpiečvajučy vychad z hetaha nasielenaha punkta mirnych žycharoŭ». U sapraŭdnaści Vałnavachu ŭ toj čas kantralavała Ukraina, jakaja i patrabavała spynieńnia ahniu dla vyvadu mirnych žycharoŭ.
U tyktoku «Našaj Nivy» jość emacyjny raspovied pra tyja strašnyja dni žycharki Vałnavachi.
Na nastupny dzień paśla hibieli — 6 sakavika 2022 hoda — Pucin padpisaŭ ukaz ab prysvajeńni Uładzimiru Žohu paśmiarotna zvańnia Hieroja Rasii.
Pachavali chłopca pobač z Matarołam. Paśla hibieli syna pasadu kamandzira «Sparty» zaniaŭ baćka.
U sakaviku 2022 hoda pa ŭsich rasijskich telekanałach było pakazana vystupleńnie Žohi na mitynhu ŭ Maskvie. U im jon pałka raspalvaŭ varožaść da ŭkraincaŭ.
U červieni 2022 hoda Žoha razam z rasijskim prapahandystam Siamionam Piehavym stvaryŭ u «DNR» Respublikanski centr bieśpiłotnych avijacyjnych sistem, dzie prachodziać navučańnie apieratary dronaŭ. U 2023 hodzie i sam atrymaŭ zorku hieroja «DNR». U tym ža hodzie byŭ uklučany ŭ sankcyjny śpis ZŠA, a ŭ 2024 hodzie trapiŭ pad sankcyi ES.
Što značyć pryznačeńnie Žohi paŭpradam
2 kastryčnika hetaha hoda hvardyi pałkoŭnik Arciom Žoha byŭ pryznačany paŭnamocnym pradstaŭnikom Pucina va Uralskaj fiederalnaj akruzie. Jon staŭ siomym na hetaj pasadzie z momantu zasnavańnia akruhi ŭ 2000 hodzie, źmianiŭšy na pasadzie Uładzimira Jakušava, jaki staŭ pieršym namieśnikam Valanciny Matvijenki ŭ Saviecie Fiederacyi.
Arciom Žoha ŭ 2023 hodzie. Fota: duma.gov.ru
Jak piša telehram-kanał «Priejemnik», doŭhi čas pasada paŭprada niehałosna ličyłasia palityčnaj piensijaj. Pry hetym užo vidavočna, što dla maładoha Žohi akurat praca paŭprada siniekuraj nie budzie.
«Pakul što my majem uviadzieńnie va ŭralskuju kanfihuracyju novaj mocnaj postaci, jakaja nie afilavanaja ni ź miascovymi elitami, ni ź fiederalnymi hrupami, u arbity ŭpłyvu jakich uvachodziać rehijony, što ŭvachodziać u fiederalnuju akruhu.
Pryznačeńniem Žohi Kreml pa sutnaści pravodzić ekśpierymient. Jaho vynik pakaža, nakolki dyrektyŭnym moža być palityčnaje administravańnie ŭ siońniašniaj Rasii»
Sam ža Žoha ŭ svaim telehram-kanale napisaŭ:
«Na novym pracoŭnym miescy budu abapiracca na dośvied, jaki ja atrymaŭ na vajskovaj słužbie, a taksama kirujučy Narodnym savietam Danieckaj narodnaj respubliki».
Naziralniki pakul ustrymlivajucca ad mierkavańniaŭ, jak daloka i vysoka moža pajści Arciom Žoha i ci moža taki čałaviek ź nizoŭ stać pierajemnikam Uładzimira Pucina. Ale Maskva jaŭna starajecca prademanstravać biaźmiežnyja mahčymaści karjernaha rostu dla žycharoŭ zaniatych Rasijaj rehijonaŭ Ukrainy.
Rasijskaha chłopca, jakoha za spaleny Karan źbiŭ syn Kadyrava, abvinavacili i ŭ dziaržzdradzie
Voś kolki bajcoŭ Pucin pakłaŭ za dva hady šturmaŭ Vuhladara