«Nikoli nie byli paraj, prosta damovilisia zavieści dziaciej». U Durava prakamientavali pretenzii jaho mierkavanaj žonki
Apoviedy mierkavanaj žonki Paŭła Durava Iryny Bołhar pra sumiesnuju historyju kachańnia i žyćcia pary prakamientavaŭ pradstaŭnik miljardera. Jahonyja słovy pryvodzić vydańnie The New York Times.
03.10.2024 / 19:54
Pavieł Duraŭ ź Irynaj Bołhar i dziećmi. Fota: missbolgar / Instagram
Pavieł Duraŭ i Iryna Bołhar, jakaja naradziła ad jaho traich dziaciej, «nikoli nie byli paraj», zajaviŭ pradstaŭnik Durava haziecie The New York Times.
«Adnosiny pamiž imi byli dziełavymi, a nie ramantyčnymi. Bołhar, jakaja na toj momant była trenieram Durava pa jozie, prapanavała jamu zavieści dziaciej, i toj pahadziŭsia. U vyniku naradzilisia troje dziaciej», — skazaŭ pradstaŭnik Durava.
Pa słovach pradstaŭnika biznesmiena, u Paŭła Durava šmat dziaciej, i jon vydatkoŭvaje na padtrymku kožnaha ź ich adnolkavuju sumu — 10 tysiač dalaraŭ u miesiac. A Bołhar nibyta rastračvaje hrošy, jakija pradprymalnik davaŭ na ich ahulnych dziaciej, śćviardžaje pradstaŭnik Durava.
Iryna Bołhar nazyvaje siabie maci traich dziaciej Paŭła Durava. Pavodle jaje słoŭ, jany paznajomilisia letam 2012 hoda, a praz paŭhoda stali žyć razam.
U śniežni 2013-ha ŭ pary naradziłasia dačka Leja, u studzieni 2016 hoda — syn Daniel, a ŭ vieraśni 2017-ha — syn David. Bołhar śćviardžaje, što hetyja dzieci narodžanyja ad Paŭła Durava.
Nie tak daŭno žančyna padavała pazovy ŭ šviejcarski sud — ab vypłacie alimientaŭ i chatnim hvałcie. Ale, zdajecca, heta nie miaža.
Bołhar zamachnułasia, ni mnoha ni mała, na Telegram. U vializnym zapisie ŭ Instagram jana nazvała kampaniju «supolna nažytaj majomaściu».
Žančyna śćviardžaje, što była ŭ adnosinach z Duravym 10 hadoŭ. Rehistravać šlub, pavodle jaje słoŭ, Duraŭ nie chacieŭ i ŭsiu majomaść, nažytuju za hety čas, zapisvaŭ vyklučna na siabie.
«Usie značnyja siamiejnyja aktyvy byli zarehistravanyja na jaho imia. Ja mieła da ich dostup praz pahadnieńni i davieranaści, jakija, choć i dazvalali ich vykarystoŭvać, nie całkam abaraniali maje pravy i intaresy i, jak akazałasia, mahli być parušanyja ŭ luby momant.
Mnie pastajanna davali zapeŭnivańni i abiacańni, jakim ja ščyra vieryła, što ŭ mianie i maich dziaciej zaŭsiody budzie dostup da našych siamiejnych resursaŭ, niahledziačy na toje, što naš šlub nie byŭ aficyjna zarehistravany, a sumiesna nažytaja majomaść, uklučajučy hałoŭny aktyŭ — miesiendžar Telegram — byŭ zarehistravany vyklučna na jaho imia. Ja taksama daviarała jaho abiacańniam i zapeŭnivańniam, što dla dziaciej buduć stvorany trastavyja fondy, jakija harantujuć ich finansavuju biaśpieku», — adznačyła Bołhar.
Sam Pavieł Duraŭ publična nie kamientavaŭ vykazvańni žančyny, a taksama jaje sudovyja pazovy. Ciapier pradprymalnik znachodzicca pad sudovym nahladam u Paryžy.
Duraŭ nazvaŭ paryžskim śledčym svoj zarobak
«Sapraŭdny hienij»: što viadoma pra Mikałaja Durava, suzasnavalnika Telegram