Расійскага «забойцу Вікіпедыі» забілі самога. А Вікіпедыя жыве
Урад Расіі прыняў рашэнне аб згортванні дзейнасці шматмільярднага праекту «Вялікай расійскай энцыклапедыі», якая была створана па замове Уладзіміра Пуціна і якой той яшчэ да вайны праракаў амбіцыйную будучыню «забойцы Вікіпедыі». Вось як тлумачыць закрыццё энцыклапедыі Крэмль і наколькі адрозніваецца ягоная версія ад версіі супрацоўнікаў праекта.
05.10.2024 / 22:22
Уладзімір Пуцін выкідвае эмблему «Вялікай расійскай энцыклапедыі» ў сметніцу. Фоты: AP / Wikimedia Commons. Калаж: «Наша Ніва»
Як паведамляе РБК, ва ўрадзе Расіі прынялі рашэнне аб пачатку ліквідацыі Аўтаномнай некамерцыйнай арганізацыі «Вялікая расійская энцыклапедыя» (АНА «ВРЭ»), якая была створана ў 2019 годзе па замове прэзідэнта Расіі Уладзіміра Пуціна і якая, паводле дзяржаўных медыя, была павінна стаць «забойцай Вікіпедыі» на расійскім рынку.
Афіцыйнай прычынай закрыцця праекту, на які было выдаткавана каля 2 мільярдаў расійскіх рублёў (каля $21 мільёна па цяперашнім курсе), называецца «ўзмацненне канкурэнтных пераваг» інтэрнэт-энцыклапедыі «Рувікі» (яшчэ аднаго расійскага аналага Вікіпедыі — «НН») і «перадача ёй усіх напрацаваных матэрыялаў».
Але галоўнай прычынай закрыцця, як адзначаюць супрацоўнікі «ВРЭ», з'яўляецца адсутнасць фінансавання, якое ідзе з бюджэту краіны. Так, заробкі камандзе праекта не налічваюцца яшчэ са снежня 2023 года.
Паводле расійскіх медыя, усяго ў Расіі было прадпрынята мінімум 7 спроб стварыць паўнавартасны аналаг Вікіпедыі за бюджэтны кошт. Усе яны пацярпелі няўдачу.
Адказны рэдактар «ВРЭ» Сяргей Кравец пацвердзіў выданню наяўнасць праблем з фінансаваннем і выплатамі заробкаў. Па ягоных словах, «з мінулага году не было ні заробку, ні ганарараў аўтарам, ні аплаты ЖКГ, ні падатковых адлічэнняў».
За ўвесь час працы «ВРЭ» было падрыхтавана 98 тысяч розных артыкулаў і матэрыялаў, але з іх толькі палова была апублікаваная на партале «Вялікай расійскай энцыклапедыі».
У рускай Вікіпедыі падумваюць перайменаваць «Белоруссию». Атрымаецца?
Для чыноўнікаў распрацавалі месенджар Depesha. У чым яго галоўная праблема?
У Расіі анансавалі выпуск «першага праваслаўнага месенджара». Што ён будзе сабой уяўляць?